Kangai 2:1-23
2 Muna lumbu kia 21 kia ngonde ya nsambwadi, e diambu dia Yave dizidi muna Kangai+ wa ngunza, oku vo:
2 “Dodokolo, yuvula Zerubabele+ wa mwan’a Saletiele wa nguvulu a Yuda+ yo Yosua+ wa ngang’ambuta, wa mwan’a Yosadake+ ye nsadisw’a nkangu:
3 ‘Nga vovo nuina vena yo muntu ona wamona e nzo* yayi muna nkembo andi una wavita?+ Aweyi numwenene yo owau? Nga ke mpasi nzo ko avo itezaneso ye ina yantete?’+
4 “‘Kansi owau, kumama e Zerubabele,’ u kavovele o Yave, ‘kumama e Yosua wa ngang’ambuta, wa mwan’a Yosadake.’
“‘Nukumama, yeno awonso e nkangu a nsi,’+ u kavovele o Yave, ‘nusia moko muna salu.’
“‘Kadi, omono ngina yeno,’+ u kavovele o Yave a vu.
5 Nusungamena nsilu yanusila vava nuavaika muna Engipito,+ e mwand’ame ukalanga vovo nuina.*+ Ke numoni wonga ko.’”+
6 Kadi i wau wuwu kavovele o Yave a vu: ‘Nkumbu mosi diaka—fikolo kaka fisidi—izakamesa e zulu ye nza yo kalunga yo ntoto ayuma.’+
7 “‘Izakamesa nkangu miawonso, e lekwa yantalu ya zula yawonso ikota mu nzo yayi,+ izadisa e nzo yayi yo nkembo,’+ u kavovele o Yave a vu.
8 “‘E palata yame, e wolo mpe wame,’ u kavovele o Yave a vu.
9 “‘O nkembo a nzo yayi usunda una wa nzo yavita,’+ u kavovele o Yave a vu.
“‘Isikidisa luvuvamu va fulu kiaki,’+ u kavovele o Yave a vu.”
10 Muna lumbu kia 24 kia ngonde yavua, muna mvu wanzole wa luyalu lwa Dareyuse, e diambu dia Yave diayiza kwa Kangai+ wa ngunza, oku vo:
11 I wau wuwu kavovele o Yave a vu: ‘Dodokolo, yuvula diambu edi kwa anganga mu kuma kia nsiku:+
12 “Avo muntu onatini mbizi avauka vana mfokola a mvuatu andi, o mvuatu waviakana mbolo yovo madia, vinyu yovo mazi yovo konso madia, nga mekituka mavauka?”’”
Anganga bavutwidi vo: “Ve!”
13 Kangai oyuvuidi vo: “Avo muntu ofunzukidi wau kasimbidi o muntu* wafwa, kasimba e lekwa yayi yawonso, nga e lekwa yayi ifunzuka mpe?”+
Anganga bavutwidi vo: “Funzuka yifunzuka.”
14 Muna kuma kiaki, Kangai ovovele vo: “‘I wina o nkangu wau, i wau wina e zula kiaki ova ndose ame,’ u kavovele o Yave, ‘i wau wina e salu yawonso ya moko mau; yawonso besunzula mu nzo yayi yafunzuka.’
15 “‘Kansi owau, tuka o unu nusia e sungididi muna diambu edi: Adieyi diabwanga vitila kiatensekwa e tadi vana ntandu a tadi muna tempelo a Yave?+
16 Vava muntu kayendanga vana zudika dia masa ye vuvu kia solola nzongo 20, kansi nzongo 10 kaka kasololanga; vava muntu kayendanga vana kaminu dia vinyu ye kani dia zonga nzongo 50, nzongo 20 kaka kazonganga;+
17 Yanuwandanga—muna salu yawonso ya moko meno—muna mbangazi,+ mbubu ye mvul’a matadi, kansi ke mosi ko omu yeno wavutuka kwa mono,’ u kavovele o Yave.
18 “‘Dodokolo, nusia e sungididi* muna diambu diadi tuka o unu, tuka lumbu kia 24 kia ngonde yavua, e lumbu kiasikidiswa e nkubilwa a tempelo a Yave;+ nusia e sungididi muna diambu edi:
19 Nga mbongo yakinu muna malundilu e?+ E nsing’a vinyu, nsanda, nganata* ye olive—nga ke ziyimini mbongo ko e? Tuk’o unu, sambula ikunusambula.’”+
20 Muna lumbu kia 24 kia ngonde,+ e diambu dia Yave dizidi mu nkumbu anzole kwa Kangai, oku vo:
21 “Vovesa Zerubabele wa nguvulu a Yuda, oku vo: ‘Zakamesa izakamesa e zulu ye ntoto.+
22 Ibangula kunda ya yintinu, ifwasakesa nkum’a yintinu ya zula;+ ibangula makalu ma vita y’awana bediatisanga mo, e mvalu ye awana bekwendelanga mo, konso muntu obwila muna nsosolo a mpangi andi.’”+
23 “‘Muna lumbu kiakina,’ u kavovele o Yave a vu, ‘Ikubonga, e Zerubabele+ wa selo kiame, wa mwan’a Saletiele,’+ u kavovele o Yave, ‘ikukitula nga mpeto yasila e dimbu, kadi ngeye nsolele,’ u kavovele o Yave a vu.”
Mvovo vana yand'a lukaya
^ Yovo “tempelo.”
^ Nanga, “vava e mwand’ame wakala yeno.”
^ Yovo “moyo.” Tala Nsas’a Mvovo.
^ Yovo “nubadika.”
^ I sia vo, bundu kina nze ngavua yovo mfuluta.
