Levitiku 24:1-23
24 Yave okwamanene vovesa Mose vo:
2 “Kanikina Aneyisaele batwasila mazi mavelela ma olive yatutwa mu kuma kia minda, malemesanga e minda ntangwa zawonso.+
3 O Arone kafwete vanga nkubika kimana e minda miakalanga miakwama tuka nkokela yamuna mene vana ndose a Yave, kuna mbazi a rido ya Nkel’a Kimbangi, muna saba kia wananina. Owau nkanikinu wa mvu ke mvu muna mbandu zeno zawonso.
4 Kafwete kiatika e minda vana zangikilwa kia minda+ kia wolo walembi sangwa lekwa vana ndose a Yave ntangwa zawonso.
5 “Bonga mfumfu ambote, yoka mbolo 12 zina nga nlunga muna mfumfu yoyo. Konso mbolo ovangila yo mu tini yole muna tini kumi ya efa.*
6 Kundakesa zo mu kunku yole, mbolo sambanu muna konso kunku+ vana meza ma wolo walembi sangwa lekwa, vana ndose a Yave.+
7 Ofwete sia ndumbu a nti a lebona yalembi sangwa lekwa vana ntandu a konso kunku. E ndumbu a nti a lebona ikala se sinsu kisunzulanga lukau lwawonso*+ mu kuma kia mbolo, i lukau luvewa kwa Yave vana tiya.
8 Muna konso Lumbu kia Vundu, kafwete zo kundakesanga vana ndose a Yave.+ Ediadi kangu diakwele mvu yo Aneyisaele.
9 E mbolo zikala za Arone yo wan’andi,+ bedila zo va fulu kiavauka,+ kadi ekiaki lekwa kisundidi vauka kwa yandi, kitukidi muna tukau twa Yave vana tiya. Nkanikinu wa mvu ke mvu.”
10 Vana kati kwa Aneyisaele vakedi mwan’ayakala wawutwa kwa nkento wa musi Isaele yo yakala wa musi Engipito.+ E nkindu inikukini muna ndo vana vena mwana ndioyo ye yakala dimosi wa musi Isaele.
11 O mwana ndioyo wa nkento a musi Isaele oyantikidi veza e Nkumbu* yo siba yo.+ Muna kuma kiaki bantwese kwa Mose.+ Kinga, o ngudi andi Selomite, wa mwan’ankento a Dibere, wa kanda dia Dani.
12 Bansidi mu pelezo yavana nzengo za Yave zasengomonua kwa yau.+
13 Yave ovovese Mose vo:
14 “O muntu osibidi unata kuna mbazi a ndo, awonso ana banwidi bafwete tenseka moko mau vana ntu andi, i bosi o nkangu awonso ukuntuba matadi.+
15 Ofwete zayisa Aneyisaele vo: ‘Avo muntu osibidi Nzambi andi, tumbwa ketumbwa mu kuma kia sumu diandi.
16 Muna mpila yayi, konso ona oveza e nkumbu a Yave kafwete vondwa kikilu.+ O nkangu awonso ufwete kuntuba matadi. Kiakala nzenza yovo Nyisaele, avo ovezel’e Nkumbu, kafwete vondwa.
17 “‘Avo muntu ovondele nkwandi, kafwete vondwa kikilu.+
18 Konso muntu owanda yo vonda bulu kia vata, kafwete kio futa, moyo mu moyo.
19 Avo muntu olwekele nkwandi, dina kavangidi kwa nkwandi i diau mpe kafwete vangwa.+
20 Tolola mu tolola, disu mu disu, dinu mu dinu, e mputa kalwekele nkwandi i yau mpe kelwekwa.+
21 Konso muntu owanda yo vonda bulu, kafwete kio futa,+ kansi ndiona owanda yo vonda muntu, kafwete vondwa.+
22 “‘Nzengo zau zimosi zifwete sadilwa kwa yeno, kiakala kwa nzenza ozinganga yeno yovo kwa mungutukila,+ kadi mono i Yave wa Nzambi eno.’”
23 I bosi, Mose ovovese Aneyisaele, banete o muntu osibidi e nkumbu a Nzambi kuna mbazi a ndo, bantubidi matadi.+ Muna mpila yayi, Aneyisaele bavangidi wauna o Yave kakanikina Mose.
Mvovo vana yand'a lukaya
^ Yovo “se kunku kia luyindulu kia lukau.”
^ I sia vo, nkumbu a Yave, wauna usonganga e tini kia 15 ye 16.
