Zasoneka Matai 16:1-28
16 Afarisi ye Asaduki bezidi kwa yandi muna kuntonta, banlombele vo kabasonga e sinsu kituka kuna zulu.+
2 Ubavutwidi vo: “Muna nkokela nuvovanga vo: ‘O kuma kwambote kukala, kadi e zulu dibweke,’
3 muna mene vo: ‘O unu o kuma kwambi kukala, kadi e zulu dibweke yo yitalala.’ Oyeno nuzeye bakula e mpw’a zulu, kansi e sinsu ya tandu ke nulenda yo bakula ko.
4 E mbandu ambi ye minta-zumba,* nuvavanga mona e sinsu, kansi kana sinsu kimosi ke nusongwa kio ko,+ nanga sinsu kia Yona+ kaka.” Muna kuma kiaki, wele kwandi, ubasisidi.
5 I bosi, alongoki basaukidi kuna simu diankaka, bavilakene nata e mbolo.+
6 Yesu ubavovese vo: “Nulungalala, nuyikeba ye mfuna ya Afarisi ye Asaduki.”+
7 Muna diadi, bayantikidi vovaziana, oku vo: “Ke tunete mbolo ko.”
8 Wau kazeye wo, Yesu ovovele vo: “Ekuma nuvovanenanga vo ke nunete mbolo ko, oyeno akwa filukwikilu?
9 Nga ke nubakwidi ko dina ikunuvovesanga? Nga ke nusungamene ko vo muna mbolo tanu yadikila 5.000 m’akala ye vasuva yitunga yayingi yanene?+
10 Yovo, nga ke nusungamene ko vo muna mbolo nsambwadi yadikila 4.000 m’akala ye vasuva ulolo wa yitunga e?+
11 Ekuma nulembele bakulwila vo kinuvovese mambu ma mbolo ko? Kansi, nuyikeba mu kuma kia mfuna ya Afarisi ye Asaduki.”+
12 I bosi, babakwidi vo ke mfun’a mbolo ko kabavovese vo bayikeba, kansi muna malongi ma Afarisi ye Asaduki.
13 Vava kalweke muna zunga kia Kaisaria-Filipi, Yesu oyuvuidi alongoki andi vo: “O wantu nani beyikilanga o Mwan’a muntu?”+
14 Bavutwidi vo: “Ankaka bevovanga vo Yoane wa Mvubi,+ ankaka vo Eliya,+ ankaka mpe vo Yeremiya yovo mosi muna angunza.”
15 Ubavovese vo: “Oyeno, nani nukungikilanga?”
16 Simone Petelo ovutwidi vo: “Ongeye u Kristu,+ wa Mwan’a Nzambi amoyo.”+
17 O Yesu umvutwidi vo: “U nkwa nsambu, e Simone wa mwan’a Yona, kadi ke nitu ye menga* ko isengomwene dio kwa ngeye, kansi Se diame kaka una kuna zulu.+
18 Ivovese mpe vo: Ongeye u Petelo,+ muna tadi diadi+ itungila e nkutakani ame, mielo mia Ziami* ke misunda yo nkuma ko.
19 Ikuvana e nsabi za Kintinu kia zulu, konso mana okanga ova ntoto makangama kala kuna zulu, konso mana okutulula ova ntoto makutululwa kala kuna zulu.”
20 I bosi, otomene kanikina alongoki andi vo ke bazayisi kwa muntu ko vo yandi i Kristu.+
21 Tuka muna ntangwa yayina, Yesu oyantikidi sasila alongoki andi vo kafwete kwenda kuna Yerusaleme yo mweswa e mpasi zayingi kw’akuluntu, kwa nganga zambuta ye asoneki yo vondwa yo fulwa muna lumbu kiatatu.+
22 Muna diadi, Petelo unète vana ndambu, oyantikidi kunsemba, oku vo: “Kuvovi wo ko e Mfumu, e diambu diadi ke dikubwila ko.”+
23 Ovilukidi, ovovese Petelo vo: “Viluka oku nim’ame, e Satana! Ongeye u sakuba kwa mono, kadi kuna ye ngindu za Nzambi ko, za wantu kaka.”+
24 I bosi, Yesu ovovese alongoki andi vo: “Konso ona ozolele kwiza ndandi, yambula kayivanina o nkalu yo nata nti andi ampasi* yo kwamanana kundanda.+
25 Kadi, konso ona ozolele vuluza o moyo andi vidisa kevidisa wo, kansi konso ona ovidisa moyo andi mu kuma kiame, solola kesolola wo.+
26 Ozevo, nkia mfunu dikala kwa muntu avo obakidi e nza yawonso kansi ovidisi moyo andi?+ Yovo nkia lekwa kalenda vana o muntu vana fulu kia moyo andi?+
27 Kadi Mwan’a muntu okwiza ye mbasi zandi muna nkembo a Se diandi, osenda konso muntu mun’owu wa mavangu mandi.+
28 Kieleka, inuvovese wo vo ankaka batelamene vava ke beyeleka nkutu lufwa ko yavana bemona o Mwan’a muntu okwiza muna Kintinu kiandi.”+
Mvovo vana yand'a lukaya
^ Yovo “minkondwa kwikizi kwa Nzambi.”
^ Yovo “muntu.”
^ Yovo “Hades,” i sia vo, ziami kia wantu awonso. Tala Nsas’a Mvovo.
^ Tala Nsas’a Mvovo.
