Zasoneka Matai 18:1-35
18 Muna ntangwa yayina alongoki bezidi kwa Yesu, banyuvuidi vo: “Nani kieleka osundidi o nene muna Kintinu kia zulu?”+
2 Obokele kingiana-ngiana, untelamese vana kati kwau,
3 ovovele vo: “Kieleka inuvovese wo vo, avo ke nusobele fu* ko yo kituka nze yingiana-ngiana,+ ke nukota mu Kintinu kia zulu ko.+
4 Ozevo, konso ona okuyikulula nze kingiana-ngiana kiaki, yandi osundidi o nene muna Kintinu kia zulu;+
5 konso ona otambwidi kingiana-ngiana nze kiaki muna nkumbu ame, mono mpe katambwidi.
6 Kansi, konso ona otesesa sakuba kwa mosi mun’awaya andwelo bekwikilanga omu mono, diambote kakangwa e tadi dianene muna nsingu nze dina dizietomonuangwa kwa buluku yo dimunua muna kalunga.+
7 “Tâtu kwa nza wau itesesanga o wantu masakuba! Kieleka, e masakuba kwiza kaka mekwiza, kansi tâtu kwa ndiona mekwizila o masakuba!
8 Avo koko kwaku yovo kulu kwaku kutesese sakuba, zenga ko, waveta ko.+ Kadi diambote kwa ngeye wavua o moyo ye koko yovo kulu kumosi, vana fulu kia tubwa yo moko mau mole yovo malu mau mole vana tiya twa mvu ya mvu.+
9 Avo disu diaku mpe ditesese sakuba, dunguna dio, waveta dio. Diambote kwa ngeye wavua o moyo ye disu dimosi kaka, vana fulu kia tubwa yo meso mau mole vana tiya twa Ngeena.*+
10 Nuyikenga nualembi veza mosi mun’awaya andwelo; kadi inuvovese vo e mbasi zau kuna zulu ntangwa zawonso zitalanga e ndose a Se diame una kuna zulu.+
11 * ——
12 “Adieyi nubenze? Avo muntu una ye 100 mameme, ovidisi dimosi,+ nga kesisa 99 ko vana miongo yo kwenda vavi dina divididi e?+
13 Avo osolwele dio, kieleka inuvovese vo, otoma dio yangalela ke mu 99 ko lulembele vila.
14 Diau dimosi mpe, ke luzolo lwa Se diame* ko una kuna zulu vo vavila kana nkutu mosi mun’awaya andwelo.+
15 “Kansi, avo mpangi aku usumukini, wenda kunsonga o bi wandi* vana va yeno wole kaka.+ Avo uwididi, obakidi o mpangi aku.+
16 Kansi avo kawididi ko, nata muntu mosi yovo wole kimana muna kimbangi kia* wantu wole yovo atatu, mambu mawonso malenda sikidiswa.+
17 Avo kabawididi ko, vova kwa nkutakani. Avo kazolele nkutu wila nkutakani ko, yambula kakala kwa ngeye nze musi zula+ ye mvakulwisi a mpaku.+
18 “Kieleka inuvovese vo, konso mana nukanga ova ntoto makangama kala kuna zulu, konso mana nukutulula ova ntoto makutululwa kala kuna zulu.
19 Kieleka, inuvovese diaka vo, avo nwole muna yeno ova ntoto bawizanene muna konso diambu diamfunu belomba, o Se diame una kuna zulu okubavana dio.+
20 Kadi vana vakutakene nwole yovo ntatu muna nkumbu ame,+ omono ngina vana.”
21 I bosi, Petelo ofinamene yo kunyuvula vo: “E Mfumu, o mpangi ame nkumbu kwa kafwete kunsumukina, omono yanloloka e? Yamuna nkumbu nsambwadi e?”
22 Yesu umvovese vo: “Kivovese ko vo yamuna nkumbu nsambwadi, kansi yamuna nkumbu 77.+
23 “Kiaki i kuma e Kintinu kia zulu kilenda tezanesenua yo ntinu ozolele lomba e mfuka kwa ntaudi zandi.
24 Vava kayantikidi kubalomba e mfuka, bantwasidi muntu wandia e mfuka ya 10.000 ma talanta.*
25 Kansi, wau vo kakala ye kina kafuta ko, o mfumu andi okanikini vo katekwa, yo nkaz’andi yo wan’andi ye yawonso kakedi yau, kimana kafuta e mfuka.+
26 O ntaudi ofukamene yo kundodokela, oku vo: ‘Umpana e ntangwa, ikufuta yawonso.’
27 O mfumu a ntaudi ndioyo, umfwididi e nkenda, unsindikidi kenda kwandi, unyambulwidi e mfuka.+
28 O ntaudi ndioyo ovaikidi, owanane ye ntaudi wa nkwandi ona wandia e mfuka ya 100 denali,* umbakidi, unsimbinini vana laka, oku vo: ‘Futa e mfuk’ame yawonso.’
29 Ozevo, o ntaudi wa nkwandi ofukamene yo kundodokela, oku vo: ‘Umpana e ntangwa, ikufuta.’
30 Kansi kazolele ko, wele kunsia muna pelezo yavana kefuta e mfuka.
31 Vava akwandi ntaudi bamwene mana mavangamene, bakendalele kikilu, bele zayisa mawonso kwa mfumu au.
32 I bosi, o mfumu andi umbokelese yo kumvovesa vo: ‘Ntaudi ambi, omono yayambulwidi e mfuka yawonso wau wandodokele.
33 Ongeye, kulendi fwila ntaudi wa nkwaku e nkenda ko nze una yafwididi e nkenda?’+
34 Muna kuma kiaki, o mfumu andi ofungidi kikilu makasi, unyekwele kwa ayingidi a pelezo yavana kefuta mfuka yawonso.
35 O Se diame una kuna zulu i wau mpe kevanga+ kwa konso muntu mu yeno ona olembi loloka mpangi andi muna ntima.”+
Mvovo vana yand'a lukaya
^ Mvovo wa sina: “nuvilukidi.”
^ Tala Nsas’a Mvovo.
^ Nanga, “Se dieno.”
^ Mvovo wa sina: “kunsemba.”
^ Mvovo wa sina: “nua mia.”
