Zasoneka Matai 22:1-46
22 O Yesu ubavovesele diaka muna yingana, oku vo:
2 “E Kintinu kia zulu kilenda tezaneswa yo ntinu ona okubikidi o nkinzi a longo+ lwa mwan’andi.
3 Otumini ntaudi zandi benda susumuna awana babokelo kuna nkinzi a longo, kansi ke bazolele kwiza ko.+
4 Otumini diaka ntaudi zankaka, oku vo, ‘Nuzayisa awana babokelo vo: “Nkubikidi e lambu diame, mvondese ngombe ye twelezi yame ya mazi, yawonso imene kubikwa. Nuiza ku nkinzi a longo.”’
5 Kansi, ke bavuidi wo mfunu ko, omosi wele kuna mpatu andi, wankaka wele muna kinkita kiandi;+
6 kansi, ankaka babakidi ntaudi zandi, babawende yo kubavonda.
7 “O ntinu ofungidi makasi, otumini vu kia makesa mandi, bavondele avondi awaya yo yoka e mbanz’au.+
8 I bosi, ovovese ntaudi zandi vo: ‘O nkinzi a longo ukubamene, kansi awana babokelo ke bafwanukinu wo ko.+
9 Dianu vo, nuenda muna nzila zivaikanga kuna mbazi a mbanza, nubokela awonso nusolola beza oku nkinzi a longo.’+
10 E ntaudi zele muna mpambu za nzila, babokele awonso basolwele, wantu ambi ye ambote; e seka dia nkinzi a longo dizele ye awana babokeleso kuna lambu.
11 “O ntinu vava kakotele katala ana babokeleso, omwene muntu walembi vuata mvuatu a longo.
12 Unyuvuidi vo: ‘E nkwame, aweyi okotele mwamu kondwa kwa mvuatu a longo?’ Kavutwidi diambu ko.
13 I bosi, o ntinu ovovese selo yandi vo: ‘Nunkanga o moko yo malu, nuntuba kuna mbazi, kuna tombe. I kûna kedidila yo kwetesa o meno.’
14 “Kadi ndonga babokelo, kansi akete kaka basolelo.”
15 I bosi, Afarisi bele vuanda e mfulu kimana bambakila muna mvovo miandi.+
16 Muna kuma kiaki, batumini alongoki au ye alandi a Erodi+ kwa Yesu, oku vo: “E Nlongi, tuzeye wo vo ludi ovovanga, olongelanga e nzil’a Nzambi muna ludi, kuvavanga dienga dia muntu ko, kadi kutalanga mpw’a muntu ko.
17 Utuzayisa, adieyi obenze? Nga diansongi dia futa e mpaku kwa Kaisa yovo ve?”
18 Yesu wau kazeye makani mau mambi, ovovele vo: “Akwa kivunina, ekuma nuntontele?
19 Nunsonga e nzimbu zina nufutilanga e mpaku.” Bamvene denali* mosi.
20 Ubayuvuidi vo: “E fwaniswa ye sono yayi ya nani e?”
21 Bavutwidi vo: “Ya Kaisa.” Ubavovese vo: “Ozevo, nuvana kwa Kaisa ina ya Kaisa, kwa Nzambi ina ya Nzambi.”+
22 Vava bawidi ediadi, basivikidi, bansisidi, bele kwau.
23 Muna lumbu kiakina, Asaduki ana bevovanga vo ke vena lufuluku ko,+ bezidi kwa yandi, banyuvuidi vo:+
24 “E Nlongi, Mose wavova vo: ‘Avo muntu ofwidi lembi wuta wana, o nleke andi kafwete sompa nkaz’a mpangi andi kimana kanwutila o wana.’+
25 Vakala mpangi nsambwadi vava twina. Ona wantete osompele yo fwa lembi wuta wana, osisidi nkaz’andi kwa nleke andi.
26 Diau dimosi diavangama kwa ndiona wanzole, kwa ndiona wantatu yamuna ndiona wansambwadi.
27 I bosi, o nkento mpe ofwidi.
28 Ozevo, muna lufuluku, nkento a nani kekala muna yau nsambwadi e? Kadi yau awonso bambonga se nkaz’au.”
29 Yesu ubavovese vo: “Nuavila, wau nulembele zaya e Sono ngatu nkum’a Nzambi;+
30 kadi muna lufuluku akala ke besompa ko ngatu akento basompeswa, kansi bekala nze ambasi kuna zulu.+
31 Muna diambu dia lufuluku lwa mafwa, nga ke nuatanga wo ko una nuavoveswa kwa Nzambi, oku vo:
32 ‘Omono i Nzambi a Abarayama, Nzambi a Isaki ye Nzambi a Yakobo e’?+ Oyandi ke Nzambi a mafwa ko, kansi Nzambi y’awana bena o moyo.”+
33 Vava bawidi ediadi, e ndonga isivikidi e mpila andi ya longela.+
34 Afarisi vava bawidi vo Yesu okangidi e nua mia Asaduki, balungalakene vamosi, bezidi kwa yandi.
35 Mosi muna yau nlongi a Nsiku, untontele, oku vo:
36 “E Nlongi, nkia nkanikinu wanene muna Nsiku?”+
37 Umvutwidi vo: “‘Ofwete zola Yave* wa Nzambi aku muna nsi a ntim’aku wawonso, muna moyo* aku wawonso ye muna nyindu aku wawonso.’+
38 I wau wuwu i nkanikinu wanene ye wantete mpe.
39 Owu wanzole ufwanane y’owu wantete, i wau wuwu: ‘Ofwete zola o nkwaku wauna okuyizolelanga.’+
40 E nkanikinu miami miau miole i tuku dia Nsiku wawonso ye Angunza.”+
41 Vava Afarisi bakutakene, Yesu ubayuvuidi vo:+
42 “Adieyi nubenze mu kuma kia Kristu? Mwan’a nani?” Bamvutwidi vo: “Mwan’a Davidi.”+
43 Ubayuvuidi vo: “Ozevo, o Davidi muna mwand’avelela,+ ekuma kanyikila vo Mfumu, vava kavova vo:
44 ‘Yave* ovovese Mfumu ame vo: “Vuanda oku koko kwame kwalunene yavana isia e mbeni zaku kuna nsi a tambi yaku”’?+
45 Ozevo, avo Davidi wanyikila vo Mfumu, aweyi kenena se mwan’andi?”+
46 Ke vakala muntu ko walenda kumvutula diambu, tuka muna lumbu kiakina ke muntu ko wakala yo unkabu wakunyuvula diaka.
