Zasoneka Matai 27:1-66
27 O kuma vava kwakia, nganga zambuta zawonso ye akuluntu a nkangu bavuandidi Yesu e mfulu kimana bamvonda.+
2 Vava bankangidi, bele kunyekola kwa Pilato wa nguvulu.+
3 I bosi, o Yuda ona wanyekola vava kamwene vo Yesu ozengelo tumbu kia lufwa, uyibenze, wele vutula e sekele 30 za palata kwa nganga zambuta ye akuluntu,+
4 ovovele vo: “Nsumukini wau ngiekwele menga makondwa-kuma.” Bavutwidi vo: “Ke diambu dieto ko. Matadidi kwaku!”
5 Otubidi e sekele za palata muna tempelo, ovaikidi. I bosi, wele kuyizembeleka.+
6 Kansi e nganga zambuta babongele sekele za palata, bavovele vo: “Ke diansongi ko mu sia zo muna lundilu diavauka dia tusalu, kadi nzimbu za menga.”
7 Vava bavuende mfulu, basumbidi zo mpatu a nwumbi, yazikila anzenza.
8 Ikuma e mpatu yayina iyikilwanga vo Mpatu a Menga+ yamu unu.
9 I bosi, dialungana dina diavovua muna Yeremiya wa ngunza vo: “Babongele sekele 30 za palata, i ntalu ina kazengelwa kuna kwa ankaka muna wan’a Isaele,
10 bavene zo muna mpatu a nwumbi yazikila anzenza nze una Yave kankanikina.”+
11 Yesu otelamene vana ndose a nguvulu; o nguvulu unyuvuidi vo: “Ongeye i Ntinu a Ayuda e?” Yesu umvutwidi vo: “Ngeye kibeni ovovele wo.”+
12 Kansi, ekolo nganga zambuta ye akuluntu bamfundanga, kasidi vutula diambu ko.+
13 I bosi Pilato umvovese vo: “Nga kuwidi ko ulolo wa mambu bekusilanga kimbangi e?”
14 Kamvutwidi kana nkutu diambu dimosi ko, o nguvulu osivikidi kikilu.
15 Muna konso nkinzi a nduta, o nguvulu wakala ye fu kia yambula mbakami mosi, konso ona nkangu bazolele.+
16 Muna ntangwa yayina, muna pelezo mwakala kimpumbulu kimosi kiatoma zayakana, nkumbu andi Baraba.
17 Dianu vo, una balungalakene, Pilato ubavovese vo: “Nani nuzolele yanuyambulwila, Baraba yovo Yesu ona oyikilwanga vo Kristu?”
18 Kadi Pilato wazaya wo vo mu kuma kia kimpala banyekolwele.
19 Ekolo kavuende vana kunda kia lufundisu, o nkaz’andi untwikidi e nsangu, oku vo: “Kuvangi diambu ko kwa muntu ndioyo wansongi, kadi mpasi zayingi mbwene o unu muna ndozi mu kuma kiandi.”
20 Kansi, e nganga zambuta ye akuluntu balebele nkangu balomba Baraba,+ vo i Yesu kavondwa.+
21 O nguvulu ubavutwidi vo: “Nani vana vena yau awole nuzolele vo yanuyambulwila?” Bamvutwidi vo: “Baraba.”
22 Pilato ubavovese vo: “Ozevo, adieyi mfwete vanga kwa Yesu oyikilwanga vo Kristu?” Yau awonso bavovele vo: “Kamanikwa vana nti!”*+
23 Ovovele vo: “Ekuma? Nkia diambu diambi kavangidi?” Bakazidi diaka, oku vo: “Kamanikwa vana nti!”+
24 Pilato wau kamwene vo kena y’edi kavanga ko, e mvuanga mu wokela kaka zina, obongele maza, osukwidi moko mandi vana ndose a nkangu, oku vo: “I munkondwa-kuma muna menga ma muntu ndioyo. Manutadidi kweno.”
25 Nkangu wawonso uvutwidi vo: “Yambula o menga mandi makala vana ntu mieto ye vana ntu mia wan’eto.”+
26 I bosi ubayambulwidi Baraba, kansi otumini vo Yesu kazwabulwa,+ unyekwele kavondelwa vana nti.+
27 Makesa ma nguvulu babakidi Yesu bele yandi muna lûmbu lwa nguvulu, makesa mawonso makutakene vana kena.+
28 Bavudidi e mvuatu miandi, bamvuikidi nzak’ambwaki,+
29 bavangidi e mpu* a nsende, bamvuikidi yo vana ntu, basidi e tutu vana koko kwandi kwalunene. Bamfukamene, bansakanene, oku vo: “Kiambote kiaku, e Ntinu a Ayuda!”
30 Bantaulwidi mete,+ babongele e tutu, banwende dio vana ntu.
31 Vava bamene kunsakanena, bamvudidi e nzak’ambwaki, bamvuikidi e mvuatu miandi, bele kunkoma vana nti.+
32 Ekolo bekwendanga, bawananene yo musi Kurene, nkumbu andi Simone. Bankomekene kanata o nti ampasi* a Yesu.+
33 Vava balweke vana fulu kiyikilwanga vo Ngolongota, i sia vo, Ku-valanganza kia ntu,+
34 bamvene vinyu yasangwa ye mbilubisu* kanua;+ kansi vava kayelekele yo, kazolele yo nua ko.
35 Vava bamene kunkoma vana nti, bakayanene mvuatu miandi, batelele mio nkas’a mienze,+
36 bafongele vavana, banlangididi.
37 Basidi mpe e baya vana ntandu a ntu andi diasonama o mfundu andi vo: “Ondioyu i Yesu wa Ntinu a Ayuda.”+
38 I bosi, bamanikini mivi miole vana nti, vana ndambu andi, mosi kuna lunene, wankaka kuna lumonso.+
39 Awana baviokelenge bantiangwini+ yo nikuna e ntu,+
40 oku vo: “Ongeye wadi bangula tempelo yo tungulula yo mu lumbu tatu,+ ukivuluza! Avo u mwan’a Nzambi, kulumuka ova nti ampasi!”*+
41 Diau dimosi mpe, nganga zambuta, asoneki ye akuluntu bayantikidi kunsakanena, oku vo:+
42 “Wavuluza akaka; yandi kibeni kelenda kuyivuluza ko! Yandi i Ntinu a Isaele;+ yambula kakulumuka vana nti ampasi,* tukwikila muna yandi.
43 Nzambi kasidi e vuvu; yambula kamvuluza owau, avo zola kekunzolanga,+ kadi ovovele vo: ‘Mono i Mwan’a Nzambi.’”+
44 Diau dimosi mpe, e mivi ana bakedi vana nti, vana ndambu andi, bayantikidi kuntumba.+
45 Tuka muna ola ina yasambanu,* e tombe kibukamene muna nsi yawonso yamuna ola yavua.*+
46 Muna tezo kia ola ina yavua,* Yesu obokele muna nding’angolo, oku vo: “Eli, Eli, lama sabaktani?” i sia vo, “E Nzambi ame, e Nzambi ame, ekuma ungiambulwidi?”+
47 Ankaka muna awana batelamene vavana, vava bawidi wo, bavovele vo: “Eliya kabokele.”+
48 Vana vau, mosi muna yau wele ntinu, obongele e vusu, ovungidi dio muna vinyu ya ngani, osomekene dio vana ntu a tutu, umvene dio kanua.+
49 Kansi, ankaka bavovele vo: “Yambula twatala kana vo Eliya okwiza kumvuluza.”
50 Yesu obokele diaka muna nding’angolo, ofwidi.*+
51 E rido a nzo avauka+ itiazukini vana kati,+ tuka kuna ntandu yakuna yanda,+ o ntoto uzakamene, e nsenzele mivasukini.
52 E ziami* iziukidi, mavimbu mayingi m’avauki ana baleka muna lufwa, mavaikidi,
53 (wantu bavaikidi muna ziami vava Yesu kafulukidi, bakotele muna mbanza avauka), mamonekene kwa wantu ayingi.
54 Kansi, o mfidi a makesa ye awana balangididinge Yesu vava bamwene nzakam’a ntoto ye mambu mavangamene, bamwene wonga wayingi, bavovele vo: “Kieleka, o ndioyu i Mwan’a Nzambi.”+
55 Vakedi mpe akento bakedi kwandá, batadidinge. Akento awaya balanda Yesu tuka kuna Ngalili muna kunsadila;+
56 ankaka vana bena i Maria Mandala yo Maria wa ngudi a Yakobo yo Yose, yo nkaz’a Zebedayo.*+
57 Kuna masika,* vezidi mvuama mosi wa musi Arimataya, nkumbu andi Yosefe, oyandi mpe nlongoki a Yesu kakala.+
58 Muntu ndioyo wele kwa Pilato, olombele vimbu dia Yesu.+ Pilato okanikini vo diavewa kwa yandi.+
59 Yosefe obongele e vimbu, ozingidi dio vana nlele a lino,+
60 osidi dio muna ziami kiandi* kiampa,+ kina kazokesa vana nsenzele. Onengomwene tadi diampwena vana mwelo a ziami,* wele kwandi.
61 Kansi, Maria Mandala ye Maria wankaka bakedi kaka vana, bavuende vana ntwal’a ziami.+
62 Muna lumbu kialanda, kina kia Nkubama,+ e nganga zambuta ye Afarisi bakutakene vana ndose a Pilato,
63 bavovele vo: “E Mfumu, tusungamene vo, o nkwa luvunu ndioyo vava kakala o moyo wavovanga vo: ‘E lumbu kina kiatatu se yafulwa.’+
64 Dianu vo, kanikina vo e ziami kialangidilwa yamuna lumbu kina kiatatu, kimana alongoki andi balembi kwiza kunyiya+ yo vova kwa nkangu vo: ‘Ofulukidi muna mafwa!’ Ozevo, o luvunu lwalu luvioka o bi ke mu luna lwantete ko.”
65 Pilato ubavovese vo: “Nuvuidi ayingidi. Nuenda, nuvanga mawonso nulenda mu yingila kio.”
66 Bele, batomene zika e ziami yo sia dimbu muna tadi ye ayingidi.
Mvovo vana yand'a lukaya
^ Yovo “Kavondelwa vana nti.”
^ Mvovo wa sina: “kolowa.”
^ Tala Nsas’a Mvovo.
^ Má kia ndudi.
^ Tala Nsas’a Mvovo.
^ Tala Nsas’a Mvovo.
^ I sia vo, muna tezo kia ola ya 15.
^ I sia vo, tezo kia ola ya 12 muna mwini.
^ Muna tezo kia ola ya 15.
^ Yovo “oyambwidi fulumuna.”
^ Yovo “ziami ya luyindulu.”
^ Mvovo wa sina: “yo ngudi a wan’a Zebedayo.”
^ Yovo “Muna nkokela.”
^ Yovo “ziami kiandi kia luyindulu.”
^ Yovo “ziami kia luyindulu.”
