Zasoneka Matai 8:1-34
8 Vava kakulumukini vana mongo, e ndong’ayingi inlende.
2 Nkwa wazi wizidi kwa yandi, umvumbamene* yo vova vo: “E Mfumu, avo ozolele wo, umpelelesa.”+
3 Olambwidi o koko kwandi, unsimbidi, ovovele vo: “Nzolele wo! Velela kwaku.”+ Vana vau ovelele muna wazi wandi.+
4 I bosi Yesu umvovese vo: “Kuzayisa dio kwa muntu ko,+ kansi wenda kuyisonga kwa nganga,+ watambika lukau luna Mose kakanikina,+ muna umbangi kwa yau.”
5 Vava kakotele muna Kafanau, mfidi mosi a makesa wizidi kwa yandi, undodokele+
6 oku vo: “E Mfumu, ntaudi ame olele muna nzo, e vola keyela, mu mpasi kikilu kena.”
7 Umvovese vo: “Vava iluaka ko, wuka ikunwuka.”
8 O mfidi a makesa umvutwidi vo: “E Mfumu, kiafwana ko wakota kuna nsi a nludi ame, kansi vova kaka e diambu, o ntaudi ame osasuka.
9 Kadi omono mpe kunsi a wisa ngina, ngina mpe ye makesa ituminanga, avo mpovele kwa mosi vo: ‘Wenda!’ wele, kwa wankaka vo: ‘Wiza!’ wizidi, ye kwa ntaudi ame vo: ‘Vanga edi!’ ovangidi dio.”
10 Yesu vava kawidi wo, osivikidi yo vova kw’awana banlende vo: “Kieleka inuvovese wo vo, kiasolwele muntu ko muna Isaele una ye lukwikilu lwanene nze lwalu.+
11 Kansi inuvovese wo vo, ndonga betuka kuna este ye kuna weste bekwiza yo vuanda vana meza kumosi yo Abarayama, yo Isaki yo Yakobo muna Kintinu kia zulu;+
12 kansi o wan’a Kintinu betubwa kuna mbazi, kuna tombe. I kûna bedidila yo kwetesa o meno.”+
13 O Yesu ovovese mfidi a makesa vo: “Wenda. Yambula diavangama kwa ngeye wau osongele lukwikilu.”+ O ntaudi osasukidi muna ola yayina.+
14 I bosi, Yesu okotele muna nzo a Petelo, omwene kô wandi wankento+ waleka, ngianduka kakala yau.+
15 Osimbidi koko kwandi,+ e ngianduka imene, otelamene, oyantikidi kubakubikila madia.
16 Kansi vava o kuma kufwidi, batwese wantu ayingi kwa Yesu ana bakala ye nkuya; ovaikisi e mianda muna mpova mosi, owukidi awonso ana bakala yo mayela,
17 kimana dialungana dina diavovua muna Yesaya wa ngunza, oku vo: “Yandi kibeni otambwidi mayela meto yo nata yimbevo yeto.”+
18 O Yesu vava kamwene ndonga inzungidi, ovovese alongoki benda yandi kuna simu diankaka.+
19 Vezidi nsoneki mosi umvovese vo: “E Nlongi, ikulanda konso kuna okwenda.”+
20 Kansi, Yesu umvutwidi vo: “E mbulu bena ye nduka, e nuni za zulu zina ye nzialwa, kansi o Mwan’a muntu kena ye fulu kasia ntu ko.”+
21 I bosi, nlongoki ankaka umvovese vo: “E Mfumu, ungiambula ngienda zika ntete o se diame.”+
22 O Yesu umvutwidi vo: “Kwamanana kundanda, yambula mafwa mazika mafwa mau.”+
23 Vava kakotele muna nzaza, alongoki andi banlende.+
24 I bosi, tembwa kiangolo kinikukini muna mbu, mavuku mayantikidi kota muna nzaza; kansi, Yesu waleka kwandi.+
25 Bezidi kunsikamesa, bavovele vo: “E Mfumu, utuvuluza, se tufwa!”
26 Kansi, ubavovese vo: “Ekuma nuinina yo wonga yeno akwa filukwikilu?”+ I bosi otelamene, otumbidi e tembwa ye mbu, vakedi kikilu e pi-i.+
27 Yau awonso basivikidi yo vova vo: “Nkia mpila muntu ndioyu? E tembwa ye mbu nkutu unlemvokele.”
28 Vava kalweke kuna simu diankaka, kuna zunga kia Angadara, wantu wole bakala ye nkuya, bavaikidi kuna ziami,* bawananene yandi.+ Akwa nganzi kikilu, muna kuma kiaki ke muntu ko wakala yo unkabu walutila muna nzila yayina.
29 Bakazidi, oku vo: “Nkia diambu tuna diau yo ngeye Mwan’a Nzambi?+ Nga wizidi kutubangika+ vitila e ntangwa yasikidiswa yafwana e?”+
30 Kuna vala, kwakala e kambi dia ngulu zayingi zadianga.+
31 Muna kuma kiaki, e nkuya mindodokele, oku vo: “Avo okutuvaikisa, utusindika twakota muna kambi dia ngulu.”+
32 Ubavovese vo: “Nuenda!” Bavaikidi yo kota muna ngulu, e kambi diawonso dinengomokene yamuna mbu yo fwa muna maza.
33 Kansi, awana badikidinge ngulu, batinini, bakotele muna mbanza, basamwini mawonso mavangamene, kumosi ye mana mavangamene kwa muntu wakala ye nkuya.
34 I bosi, awonso muna mbanza bavaikidi, bezidi wanana yo Yesu, vava bamwene, bandodokele vo kakatuka muna zunga kiau.+
