Zasoneka Matai 9:1-38
9 Dianu vo, okotele muna nzaza, osaukidi, wele kuna mbanza andi.+
2 Bantwasidi mbevo a vola, olavalele vana kipoyo. Vava kamwene lukwikilu lwau, Yesu ovovese mbevo a vola vo: “E mwana, kutokani ko! Masumu maku malolokelo.”+
3 Asoneki ankaka bavovanene vo: “O muntu ndioyu Nzambi katiangwini.”
4 Yesu wau kabakwidi e ngindu zau, ubavovese vo: “Ekuma nuyindulwilanga mambu mambi mu ntima mieno?+
5 Adieyi diasazu mu vova: ‘O masumu maku malolokelo,’ yovo, ‘Telama yo diata’?+
6 Kansi kimana nuazaya wo vo Mwan’a muntu ovuidi e wisa kialoloka masumu ova nza—” ovovese mbevo a vola vo: “Telama, bonga kipoyo kiaku, wenda kuna nzo aku.”+
7 Otelamene, wele kuna nzo andi.
8 E ndonga vava bamwene wo, babakamene kwa wonga, bakembelele Nzambi, ona wavana e wisa kiaki kwa wantu.
9 Yesu vava kakatukidi vo, omwene muntu nkumbu andi Matai, ovuende vana vevakulwilwanga e mpaku, umvovese vo: “Undanda.” Vana vau, otelamene, unlende.+
10 I bosi, ekolo kedianga muna nzo, avakulwisi a mpaku ayingi ye asumuki bezidi, bayantikidi dia kumosi yo Yesu ye alongoki andi.+
11 Kansi, Afarisi wau bamwene wo, bavovese alongoki andi vo: “Ekuma o nlongi eno kedilanga vamosi ye avakulwisi a mpaku ye asumuki?”+
12 Vava kabawidi, ovovele vo: “Awana bena yo vimpi ke bevuanga ngang’a mawuku mfunu ko, kansi ambevo bekumvuanga o mfunu.+
13 Nuenda, nuazaya e nsas’a diambu edi: ‘Nkenda nzolele, ke kimenga ko.’+ Kadi kizidi bokela ansongi ko, kansi asumuki.”
14 I bosi, alongoki a Yoane bezidi kwa yandi, banyuvuidi vo: “Ekuma oyeto ye Afarisi tufionkonuenanga,* kansi alongoki aku ke befionkononanga ko?”+
15 O Yesu ubavutwidi vo: “Nga akundi a toko diansompi balenda kala ye kuma kia kendalala ekolo bena kumosi ye toko diansompi?+ Kansi e lumbu ikwiza ina e toko diansompi kekatulwa vana bena,+ i bosi befionkonona.*
16 Ke vena muntu ko olondanga e tenda kia nlele ampa muna mvuatu wankulu, kadi o nlele ampa unana o mvuatu yo sakisa e vundu.+
17 Wantu ke besianga vinyu ampa mu madila mankulu ma nkand’a bulu ko, avo bavangidi wo, madila malenda buka, e vinyu itiamuka, e madila mpe mefwasuka. Kansi, wantu besianga e vinyu ampa muna madila mampa ma nkand’a bulu, yau yole yataninua.”
18 Vava kabavovese o mambu mama, nyadi mosi umfinamene, umvumbamene yo vova vo: “O mwan’ame ankento nanga ofwidi kala, kansi wiza wantenseka o koko, kavutuka diaka o moyo.”+
19 Yesu otelamene kumosi ye alongoki andi, banlende.
20 Tala, nkento mosi wakala ye kimbevo kia vaikwa o menga se mvu 12,+ ofinamene kuna nim’a Yesu yo simba o nswiku a mvuatu andi,+
21 kadi edi kavovanga muna nsi a ntim’andi vo: “Avo nsimba kaka o mvuatu andi, isasuka.”
22 Yesu ovilukidi, umwene yo kumvovesa vo: “E mwana, kutokani ko! O lukwikilu lwaku lusaswidi.”+ Tuka muna ntangwa yayina, o nkento osasukidi.+
23 Vava kalweke muna nzo a nyadi, omwene wantu besikanga matutu ye ndonga ibokomokanga ye dilu,+
24 Yesu ovovele vo: “Nuvaika, kadi e dumbelele kafwidi ko, leka kaka kalele.”+ Vava bawidi wo, bayantikidi kunseva kuna luvezo lwawonso.
25 Ekolo ndonga yavaikiswa kuna mbazi, wele vana kakala, osimbidi o koko kwandi,+ e dumbelele kitelamene.+
26 E nsangu za diambu diadi zimwanganene muna zunga kiakina kiawonso.
27 O Yesu vava kakatukidi vo, mpofo zole+ zamakala zinlende, bakazidi oku vo: “E Mwan’a Davidi, utufwil’e nkenda.”
28 Vava kakotele muna nzo, e mpofo zizidi kwa yandi, o Yesu ubayuvuidi vo: “Nga nukwikidi wo vo ndenda wo vanga e?”+ Bamvutwidi vo: “Ingeta, e Mfumu.”
29 I bosi, osimbidi meso mau+ yo vova vo: “Yambula diavangama mun’owu wa lukwikilu lweno.”
30 O meso mau matemokene. Kansi, Yesu otomene kubakanikina, oku vo: “Nukeba, ke nuzayisi dio kwa muntu ko.”+
31 Kansi, vava bavaikidi kuna mbazi, bamwanganisi e nsangu mu kuma kiandi muna zunga kiakina kiawonso.
32 Vava bavaikidi, o wantu bantwasidi yakala dimosi wa baba wakala ye nkuya;+
33 vava Yesu kavaikisi e nkuya, e baba divovele.+ E ndonga isivikidi yo vova vo: “Ke musidi moneka diambu dia mpila yayi ko omo Isaele.”+
34 Kansi, Afarisi bavovele vo: “Mu nkum’a mfumu a nkuya kevaikisilanga e nkuya.”+
35 Yesu wele kangala muna mbanza ye mavata mawonso, wele alonginge muna masambilu mau yo samuna e nsangu zambote za Kintinu yo wuka yimbevo ya mpila zawonso ye mayela ma mpila zawonso.+
36 Vava kamwene ndonga, ubafwididi e nkenda,+ kadi bebangikwanga yo tungianiswa nze mameme makondwa mvungudi.+
37 I bosi, ovovese alongoki andi vo: “Kieleka, e mbongo yayingi ina muna kutika, kansi asadi bakete.+
38 Muna kuma kiaki, nudodokela Mfumu a nkutika katuma asadi muna nkutika andi.”+
