Mavangu ma Zintumwa 23:1-35
23 Paulu otadidi awana bena muna Mbazi a Nkanu,* ovovele vo: “Ampangi, ngina ye ntona zambote vana ndose a Nzambi+ yamu unu.”
2 Muna diadi, Ananiya wa ngang’ambuta okanikini awana batelamene vana kena banwanda muna nua.
3 I bosi, Paulu umvovese vo: “O Nzambi wanda kekuwanda, ongeye yaka kiapembeswa.* Ovuende wamfundisila mun’owu wa Nsiku, ekolo okululanga o Nsiku wau okanikini vo yawandwa?”
4 Awana batelama vo, bavovele vo: “Ongeye ngang’ambuta a Nzambi olevolang’e?”
5 Paulu ovutwidi vo: “Ampangi, kizeye wo ko vo yandi i ngang’ambuta. Kadi diasonama vo: ‘Kufwete tianguna nkuluntu a nkangu aku ko.’”+
6 Paulu vava kamwene vo oku sambu edi Asaduki ye kuna sambu diankaka Afarisi, okazidi kwa awana bakala muna Mbazi a Nkanu:* “Ampangi, omono i Mfarisi, i mwan’a Mfarisi.+ Mu kuma kia vuvu kia lufuluku lwa mafwa ifundisilwanga.”
7 Wau kavovele diambu diadi, e ntantani zibwidi vana vena Afarisi ye Asaduki, e ndonga ivambane.
8 Kadi Asaduki bevovanga vo ke vena lufuluku ko yovo mbasi ngatu mwanda, kansi Afarisi bekwikilanga muna mawonso mama.+
9 Mavuanga mangolo makotele, asoneki ankaka kuna sambu dia Afarisi batelamene, bayantikidi tantana, oku vo: “Ke tumwene diambu diambi ko muna muntu ndioyo, avo mwanda yovo mbasi omokene yandi+—.”
10 Vava ntantani ziwokele, o mfumu a makesa omwene wonga vo balenda vonda Paulu, otumini makesa makulumuka kimana bankatula vana bena yo kunata muna lûmbu lwa makesa.
11 Kansi, muna fuku walanda o Mfumu watelama vana ndambu andi yo vova vo: “Kala yo unkabu!+ Kadi wauna otomene kunsila umbangi mu Yerusaleme, i una mpe ofwete kunsila umbangi kuna Roma.”+
12 Vava kuma kwakiá, Ayuda bamokena yo dia ndofi vo ke bedia ko ngatu nua yavana bevonda Paulu.
13 Vioka wantu 40 badia ndofi yayi.
14 Wantu awaya bele kwa nganga zambuta ye akuluntu, bavovele vo: “Yeto kibeni tudidi e ndofi vo ke tudia lekwa ko yavana tuvonda Paulu.
15 Owau oyeno kumosi ye Mbazi a Nkanu* nufwete zayisa kwa mfumu a makesa bantwasa kwa yeno, nze vika sia vo nuzolele toma fimpa e diambu diandi. Kansi vitila kalwaka, oyeto tukubama kimana twamvonda.”
16 Kansi, o mwan’a nkazi a Paulu vava kawa ekani diau dia kunswekamena kimana bamvonda, okotele muna lûmbu lwa makesa, ozayisi dio kwa Paulu.
17 I bosi, Paulu obokele mfidi mosi a makesa, umvovese vo: “Nata toko diadi kwa mfumu a makesa, kadi diambu kena diau muna kunzayisa.”
18 Umbongele yo kunata kwa mfumu a makesa, ovovele vo: “Paulu wa mbakami umbokele yo kundomba vo yatwasa toko diadi kwa ngeye, kadi diambu kena diau mu kuzayisa.”
19 O mfumu a makesa unsimbidi muna koko, unete va fulu kia yau kaka, unyuvuidi vo: “Nkia diambu ozolele kunzayisa?”
20 Ovovele vo: “Ayuda bawizane vo balomba kwa ngeye kimana o mbazi wakulumuna Paulu kuna Mbazi a Nkanu,* nze yau bazolele zaya diaka mayingi mu kuma kia diambu diandi.+
21 Kansi, kubakwikila ko, kadi vioka wantu 40 muna yau bekwenda kunswamina muna nzila, badidi e ndofi vo ke bedia ko ngatu nua yavana bekumvonda;+ bakubamene, nsilu aku bevingilanga.”
22 O mfumu a makesa osindidiki e toko, unkanikini vo: “Kuvovi kwa muntu ko dina unzayisi.”
23 Obokele afidi wole a makesa, ubavovese vo: “Nukubika 200 za makesa, 70 lwa akwa mvalu ye 200 za akwa madionga, benda kuna Kaisaria muna ola ina ya tatu ya fuku.*
24 Nukubikila mpe Paulu mabuluku kamanta katoma lwaka kwa Feleka wa nguvulu.”
25 Osonekene nkanda, oku vo:
26 “Mono Kelodio Lusia, kuna kwa Nguvulu Feleka: Mavimpi maku!
27 O muntu ndioyo wakangwa kwa Ayuda ye wadi vondwa, kansi wau yazaya wo vo musi Roma,+ kuna nzaki zawonso yalwaka yo makesa, yankutumuna.+
28 Muna vava zaya e kuma bamfundilanga, yantwasa kuna Mbazi a Nkanu* au.+
29 Yabakula vo mu kuma kia Nsiku au bamfundila,+ kansi kafundilwa kana diambu dimosi ko kafwete vondelwa ngatu siwa mu pelezo.
30 Kansi wau banzayisi e kani diambi bena diau mu kuma kia muntu ndioyo,+ dianu intumini kwa ngeye kimana afundi andi basonga dina kavangidi vana ndose aku.”
31 I bosi, makesa babongele Paulu+ wauna bakanikinu, banète muna fuku yakuna Antipateri.
32 Muna lumbu kialanda, bayambwidi vo akwa mvalu benda yandi, i bosi bavutukidi muna lûmbu lwa makesa.
33 Akwa mvalu bakotele muna Kaisaria, batambikidi o nkanda kwa nguvulu, basunzwidi mpe Paulu kwa yandi.
34 Otangidi wo, oyuvuidi mvivu una katuka; ozayisu vo musi Kilikia.+
35 Ovovele vo: “Itoma wá e diambu diaku vava afundi aku beluaka.”+ I bosi, okanikini vo katoma lundwa muna lûmbu lwa Erodi.
Mvovo vana yand'a lukaya
^ Mvovo wa sina: “Sanedina.” Tala Nsas’a Mvovo.
^ I sia vo, nkwa disu kunsi a lukaya.
^ Mvovo wa sina: “Sanedina.” Tala Nsas’a Mvovo.
^ Mvovo wa sina: “Sanedina.” Tala Nsas’a Mvovo.
^ Mvovo wa sina: “Sanedina.” Tala Nsas’a Mvovo.
^ I sia vo, muna tezo kia ola ya 21.
^ Mvovo wa sina: “Sanedina.” Tala Nsas’a Mvovo.
