Nsiku 16:1-22
16 “Sungamena e ngonde ya Abibi,* kembelela e Ndut’a Yave wa Nzambi aku,+ kadi muna ngonde ya Abibi, o Yave wa Nzambi aku wavaikisa muna Engipito muna fuku.+
2 Muna mameme maku, nkombo zaku ye ngombe zaku+ obongela e bulu otambika se kimenga kia Nduta kuna kwa Yave wa Nzambi aku,+ vana fulu kina Yave kesola mu sia e nkumbu andi.+
3 Kufwete dia kimenga ko kumosi ye konso lekwa kiasiwa e mfuna;+ mu lumbu nsambwadi odia e mbolo yakondwa mfuna, e mbolo ampasi, kadi mu nzaki wavaikila muna nsi ya Engipito.+ Vanganga wo muna zingu kiaku kiawonso mu sungamena e lumbu wavaika muna nsi ya Engipito.+
4 Mu lumbu nsambwadi, kufwete soloka ye mfuna ko muna zunga kiaku kiawonso.+ E mbizi otambika muna nkonkel’a lumbu kiantete ke ifwete lundwa ko tuka muna fuku wawonso yakuna mene.+
5 Kuyambulwa ko vo watambikila bulu kia kimenga kia Nduta muna konso mbanza zina Yave wa Nzambi aku kekuvana.
6 Kansi, kifwete tambikilwa vana fulu kina Yave wa Nzambi aku kesola mu sia e nkumbu andi. Ofwete tambika e bulu kia kimenga kia Nduta muna nkokela, vava e ntangwa idimuka,+ muna lumbu* kina wavaika muna Engipito.
7 Ofwete yanga e bulu kia kimenga yo dila kio+ vana fulu kina Yave wa Nzambi aku kesola,+ muna mene ovutuka muna nzo aku a ngoto.
8 Mu lumbu sambanu odia e mbolo zakondwa mfuna, muna lumbu kiansambwadi vekala ye lukutakanu lwampwena kwa Yave wa Nzambi aku. Kufwete sala konso salu ko.+
9 “Ofwete tanga tumingu nsambwadi. Oyantikila tanga tumingu nsambwadi tuka muna ntangwa oyantika viokesa e sakilwa muna witi ke wakutikilu ko.+
10 I bosi, okembela Nkinzi a Tumingu kuna kwa Yave wa Nzambi aku+ ye lukau lwamvevo lwa moko maku, luvaninua mun’owu wa tezo kina Yave wa Nzambi aku kasambulwidi.+
11 Ofwete yangalela vana ndose a Yave wa Nzambi aku, vana fulu kina Yave wa Nzambi aku kesola mu sia e nkumbu andi, ongeye yo mwan’aku ayakala, yo mwan’aku ankento, yo ntaudi aku ayakala yo ntaudi aku ankento, yo Nlevi wina omu mbanza zaku,* kumosi yo nzenza, mwana wakondwa se yo nkento wafwilwa yakala, ana bezingilanga ova kati kwaku.+
12 Sungamena vo ngeye mbundu wakituka muna Engipito,+ lemvokela yo lunda e nsiku miami.
13 “Ofwete kembelela Nkinzi a Sudi*+ mu lumbu nsambwadi vava okutika e mbongo a bundilu diaku ye kaminu diaku dia mazi ye vinyu.
14 Yangalala muna kolo kia nkinzi aku,+ ongeye yo mwan’aku ayakala, yo mwan’aku ankento, yo ntaudi aku ayakala yo ntaudi aku ankento, yo Nlevi, yo nzenza, yo mwana wakondwa se yo nkento wafwilwa yakala, ana bena omu mbanza zaku.
15 Mu lumbu nsambwadi okembelela nkinzi+ kuna kwa Yave wa Nzambi aku vana fulu kesola o Yave, kadi Yave wa Nzambi aku osambula yawonso okutika ye mawonso ovanga,+ ongeye oyangalala kwayingi.+
16 “Wan’aku awonso amakala bafwete kwiza vana ndose a Yave wa Nzambi aku vana fulu kina kesola. Bekwiza nkumbu ntatu muna mvu, i sia vo, muna Nkinzi a Mbolo Zakondwa Mfuna,+ Nkinzi a Tumingu+ yo Nkinzi a Sudi,*+ ke mosi ko muna yau okwiza vana ndose a Yave yo moko mankatu.
17 Konso muntu otwasa lukau mun’owu wa tezo kina Yave wa Nzambi aku kansambulwidi.+
18 “Ofwete sola afundisi+ ye akengi mu kuma kia konso kanda muna mbanza zawonso zina* Yave wa Nzambi aku kekuvana, bafwete fundisila o nkangu muna unsongi.
19 Kufwete bendomona unsongi ko,+ kusie mpambula ko+ ngatu tambula mbabu, kadi e mbabu meso ma nkwa ngangu ifukanga+ yo tekomona e mvovo mia nkwa unsongi.
20 Unsongi, elo, unsongi kaka ofwete landa+ kimana wakwamanana zinga yo vua e nsi ina Yave wa Nzambi aku kekuvana.
21 “Kufwete kuna konso nti ko vana ndambu a ziku dina otungila Yave wa Nzambi aku wakala se vindi diavauka.*+
22 “Ngatu kuyitelamesena lunzi diavauka,+ lekwa kina o Yave wa Nzambi aku kemenganga.
Mvovo vana yand'a lukaya
^ Yovo “ntangwa yasikidiswa.”
^ Mvovo wa sina: “mavitu maku.”
^ Yovo “Saba ya Zingila mu Kolo Kiakete.”
^ Yovo “Saba ya Zingila mu Kolo Kiakete.”
^ Mvovo wa sina: “muna kati kwa mavitu maku mawonso mana.”
^ Tala Nsas’a Mvovo.
