Nsiku 4:1-49
4 “E Isaele, owau nuwá e nsiku ye nzengo za mfundisa zina ikunulonga nualemvokela, kimana nuazinga,+ nuakota yo vua e nsi ina Yave wa Nzambi a akulu eno kekunuvana.
2 Ke nufwete kudikila diambu ko muna mvovo ikunukanikinanga, ke nufwete mo katula mpe diambu ko;+ nulunda e nkanikinu mia Yave wa Nzambi eno mina ikunukanikinanga.
3 “O meso meno mamona mana Yave kavanga mu diambu dia Bale-Peo; Yave wa Nzambi eno wafukisa akala awonso ova kati kweno ana balanda Bale-Peo.+
4 Kansi, oyeno nuatatidila Yave wa Nzambi eno, yeno awonso nuina moyo yamu unu.
5 Tala, omono yanulonga e nsiku ye nzengo za mfundisa,+ wauna o Yave wa Nzambi ame kankanikina, kimana nualemvokela mio muna nsi ina nuvua.
6 Nufwete mio lemvokela una ufwene,+ kadi ediadi disonga vo nu akwa ngangu+ ye umbakuzi+ vana meso ma wantu ana bewá e nsangu mu kuma kia nsiku miami miawonso yo vova vo: ‘Kalukatikisu ko vo e zula kiaki kianene i nkangu angangu ye umbakuzi.’+
7 Kadi, nkia zula kianene kina ye nzambi zikubafinamanga wauna o Yave wa Nzambi eto kekutufinamenanga konso ntangwa tukumbokelanga?+
8 Nkia zula kianene kina ye nsiku miansongi ye nzengo za mfundisa zafwanana yo Nsiku wau wawonso isianga ova ntadisi eno unu?+
9 “Toma keba yo sia sungididi,* kimana walembi vilakana mambu mana o meso maku mamwene, kimana malembi katuka muna ntim’aku muna lumbu yawonso ya zingu kiaku. Ofwete mo zayisa mpe kwa wan’aku ye kwa atekolo aku.+
10 Muna lumbu kina nuatelama vana ntadisi a Yave wa Nzambi kuna Korebe, Yave wampovesa vo: ‘Unkutakesela o nkangu kimana bawá e mvovo miame,+ kimana balongoka kumpumina+ e lumbu yawonso bezinga ova ntoto ye balonga o wan’au.’+
11 “Muna kuma kiaki, nuafinama yo telama vana sina dia mongo, o mongo wakwamanga tiya twalwakanga yakuna kati kwa zulu;* vakala tombe, tuti ye tombe kiangolo kikilu.+
12 Yave wayantika vovana yeno tuka vana tiya.+ Oyeno nuawá e zú dia mvovo, kansi ke nuamona muntu ko+—ndinga kaka nuawá.+
13 Oyandi wayika e kangu+ diandi kwa yeno dina kanukanikina vo nualemvokela, i sia vo, Nsiku Kumi.*+ I bosi, wasoneka mio mu babu yole ya matadi.+
14 Muna ntangwa yayina, Yave wankanikina vo yanulonga e nsiku ye nzengo za mfundisa, zina nufwete lemvokela muna nsi ina nukota nuavua yo.
15 “Wau vo ke nuamona muntu ko muna lumbu kina Yave kamokena yeno vana mongo a Korebe tuka vana kati kwa tiya, nutoma sia e sungididi*
16 nualembi vanga mambu mambi muna kuyivangila konso teke kiavalwa kiafwanana ye konso lekwa, kiakala fwaniswa kia yakala yovo kia nkento,+
17 kiakala fwaniswa kia konso bulu ova ntoto yovo fwaniswa kia konso nuni itilumukanga muna zulu,+
18 kiakala fwaniswa kia konso vangwa kiyatatanga ova ntoto yovo fwaniswa kia konso mbizi ina muna maza muna nsi a ntoto.+
19 Vava osengola meso maku kuna zulu yo mona e ntangwa, ngonde ye ntetembwa—e vu kiawonso kia zulu—kuvukumunua ko, kuvumbamena yo ko ngatu sadila yo.+ Yave wa Nzambi aku ubavene kwa nkangu miawonso oku nsi a zulu diawonso.
20 Kansi, yeno i kabonga o Yave yo kunuvaikisa muna fûlu dia tiya dia fudila e sengwa, i sia vo, muna Engipito, nuakituka se nkangu andi akivuila,*+ wauna nuina o unu.
21 “Yave wamfungila makasi mu kuma kieno,+ wadia e ndofi vo kisauka Yodani ko ngatu kota muna nsi yambote ina Yave wa Nzambi eno kekunuvana se vua.+
22 Kadi mu nsi yayi ifwila; kisauka Yodani ko,+ kansi oyeno nusauka yo vua e nsi yoyo yambote.
23 Nutoma keba kimana nualembi vilakana e kangu dia Yave wa Nzambi eno, dina kakanga yeno,+ ke nuyivangila teke kiavalwa ko, kiafwanana ye konso lekwa nuasimwa kwa Yave wa Nzambi eno.+
24 Kadi o Yave wa Nzambi eno tiya+ twambomoni, i Nzambi ona ovavanga vo wantu basambila kaka yandi.+
25 “Vava nuwuta wana ye atekolo yo zinga kolo kiayingi muna nsi, nuavanga mambu mekunutwasila lufwasu yo vanga teke yavalwa+ ya konso mpila yo vanga oma mambi vana meso ma Yave wa Nzambi eno muna kumfungisa makasi,+
26 yambula awonso bena kuna zulu y’ova ntoto bakala se mbangi zame o unu mu kuma kieno vo mu nzaki kieleka nuvidila muna nsi ina nuvua vava nusauka e Yodani. Ke nuzinga kolo kiayingi ko muna nsi, kansi fwaswa kieleka nufwaswa.+
27 Yave okunumwanganesa muna nkangu,+ akete kaka muna yeno besala o moyo+ muna zula ina Yave kekununata.
28 Okwakuna, nusadila nzambi za nti ye za matadi ezi zavangilwa muna moko ma wantu,+ e nzambi zina ke zilendi mona ko yovo wá yovo dia ngatu nunkuta.
29 “Tuka kwakuna, avo ovavidi Yave wa Nzambi aku, okunsolola kieleka,+ avo untombele yo ntim’aku wawonso yo moyo* aku wawonso.+
30 Muna ntangwa yayina, vava okala mu mpasi zayingi yo bwilwa mambu mama mawonso, ongeye ovutuka kwa Yave wa Nzambi aku, owá e ndinga andi.+
31 Kadi o Yave wa Nzambi aku, Nzambi a nkenda.+ Oyandi ke kubembola ko yovo kufwasa ngatu vilakana e kangu kadila e ndofi kwa akulu aku.+
32 “Owau, yuvula oma ma lumbu yankulu, vitila tandu kiaku, tuka muna lumbu kina Nzambi kasemena o muntu ova ntoto; vavulula tuka ku nsuka eyi ya zulu yakuna nsuka yankaka ya zulu. Nga vavangama kala diambu dianene dia mpila yayi? Nga mwawakana kala diambu dia mpila yayi?+
33 Nga vena yo nkangu wawá kala e nding’a Nzambi tuka vana tiya muna mpila ina owididi yo ye okwamanene zinga?+
34 Yovo, nga Nzambi wateza kala kuyibongela zula vana kati kwa zula kiankaka muna mfundisa,* sinsu, masivi,+ vita,+ koko kwankuma,+ koko kwalambuka yo mavangu mansisi,+ wauna Yave wa Nzambi eno kavanga mu kuma kieno muna Engipito vana meso meno?
35 O mambu mama kwa yeno masongwa kimana nuazaya wo vo Yave i Nzambi aludi;+ ke vena wankaka ko.+
36 Wanuwisa e ndinga andi tuka kuna zulu muna kunusingika. Ova ntoto, wanumwesa o tiya twandi twampwena, nuawá e mvovo miandi tuka vana tiya.+
37 “Wau vo wazola akulu eno yo sola e mbongo au ikubalandila+ yakala se nkangu andi, oyeno nuavaikiswa muna Engipito vana meso mandi muna nkuma andi anene.
38 Wayinga vana ntadisi eno e zula inusundidi o nene yo nkuma, kimana kanukotesa muna nsi au yo kunuvana yo se vua, wauna dina o unu.+
39 Tuka unu kiaki, zaya dio yo sia dio muna ntim’aku vo Yave i Nzambi aludi kuna zulu diantandu ye ova ntoto kuna nsi.+ Ke vena wankaka ko.+
40 Ofwete lunda e nsiku miandi ye nkanikinu miandi mina ikukanikinanga o unu, kimana ongeye yo wan’aku bekulandila nuasambulwa, wazinga kolo kiayingi muna nsi ina Yave wa Nzambi aku kekuvana.”+
41 Muna ntangwa yayina, Mose ovambwidi mbanza tatu kuna este ya Yodani.+
42 Avo muntu ovondele nkwandi lembi wo kana ye kateka kumenga ko,+ kafwete tinina mu imosi muna mbanza zazi kimana kazinga.+
43 Ezazi i mbanza: Bese,+ ina muna makanga vana mongo alelama mu kuma kia Anerubeni; Ramote+ ina muna Ngiladi, mu kuma kia Anengadi; Ngolane,+ ina muna Basani mu kuma kia Anemanase.+
44 Owau i Nsiku+ una Mose kasia vana ntadisi a nkangu a Isaele.
45 E miami i mîna, nsiku ye nzengo za mfundisa zina Mose kavana kwa Aneyisaele vava bavaika muna Engipito,+
46 muna zunga kia Yodani, muna ndimba una watalana ye Bete-peo,+ muna nsi ya Sikone wa Ntinu a Aneyamore, ana bazingilanga muna Kesebone,+ ana Mose yo Aneyisaele basunda vava bavaika muna Engipito.+
47 Babaka e nsi andi ye nsi ya Onge wa Ntinu+ a Basani, atinu wole a Aneyamore ana bakala muna zunga kia este kia Yodani,
48 tuka kuna Arowa,+ eyi ina vana ndambu a Ndimb’a Arenone yakuna Mongo a Sione, i sia vo, Keremone,+
49 ye Araba yawonso muna zunga kia este kia Yodani, yakuna Mbu wa Araba,* vana sina dia miongo mia Pisenga.+
Mvovo vana yand'a lukaya
^ Yovo “Toma keba o moyo aku.”
^ Mvovo wa sina: “yakuna ntim’a zulu.”
^ Mvovo wa sina: “Mvovo Kumi.” Uyikilwanga mpe vo Decálogo.
^ Yovo “toma keba o moyo aku.”
^ Yovo “se vua diandi.”
^ Tala Nsas’a Mvovo.
^ Yovo “ntonta.”
^ I sia vo, Mbu a Mungwa yovo Mbu Afwa.
