Kuna kwa Esi Roma 6:1-23
6 Ozevo, adieyi tuvova? Nga twakwamanana muna sumu kimana e nkenda za Nzambi zawokela e?
2 Ke wau ko! Wau vo twafwa muna diambu dia sumu,+ ekuma tukwamanena diaka muna sumu?+
3 Yovo, ke nuzeye wo ko vo yeto awonso twavubilwa muna Kristu Yesu,+ twavubilwa mpe muna lufwa lwandi e?+
4 Dianu vo, twazikwa kumosi yo yandi wau twavubilwa muna lufwa lwandi,+ wauna o Kristu kafudilwa muna mafwa muna nkembo a Se, kimana oyeto mpe twakala ye zingu kiampa.+
5 Avo tufwa nze yandi,+ tufuluka mpe nze yandi,+ i wauna tukadila yandi e ntwadi.
6 Kadi tuzeye wo vo kiwuntu kieto kiankulu kiakomwa yandi vana nti,+ kimana e nitu eto yasumuka yalembi kala ye wisa,+ twalembi kala diaka abundu a sumu.+
7 Kadi ndiona ofwidi, ovevokele* muna masumu mandi.
8 Dianu vo, avo tufwa kumosi yo Kristu, tukwikila mpe vo tukala yandi o moyo.
9 Kadi tuzeye wo vo Kristu, wau kafulwa muna mafwa,+ ke fwa diaka ko;+ o lufwa ke luna diaka ye wisa ko muna yandi.
10 Kadi o lufwa kafwa, nkumbu mosi kafwa lo muna katula emvimba e sumu,+ kansi wau kena o moyo, muna Nzambi kenena o moyo.
11 Diau dimosi oyeno, nuyibadikila vo nuafwa muna diambu dia sumu, kansi muna Nzambi nuina o moyo muna Kristu Yesu.+
12 Dianu vo, ke nuyambula ko vo e sumu diakwamanana yala se ntinu muna nitu zeno zifwanga+ yo kunufila nualemvokela e zolela yandi,
13 ngatu tambika nitu zeno* muna sumu nze nuaninua yavilwa, kansi nuyitambika kwa Nzambi nze awana bakedi bafwa, owau bena moyo, nutambika mpe nitu zeno kwa Nzambi nze nuaninua ya unsongi.+
14 Kadi e sumu ke dikunuyala ko, wau vo ke nuina kunsi a nsiku ko,+ kansi nu akwa nsambu za Nzambi kaka.+
15 Adieyi tuvova diaka? Nga twasumuka kweto wau vo ke tuna kuna nsi a nsiku ko, kansi tu akwa nsambu za Nzambi e?+ Ke wau ko!
16 Nuzaya wo vo avo nukivene kwa muntu yo kunlemvokela ntangwa zawonso, nukitukidi abundu andi.+ Dianu vo, avo nu abundu a sumu,+ fwa nufwa.+ Kansi, avo nu abundu a Nzambi yo kunlemvokela, lungiswa nulungiswa.
17 Matondo kwa Nzambi, kadi kanele vo ntaudi za sumu nuakala, owau nulemvokelanga Nzambi ye nsi a ntima muna mbandu a malongi nuavewa.
18 Wau vo nuavevolwa muna sumu,+ nuakituka se ntaudi za unsongi.+
19 Mpov’a kimuntu mpovele muna kuma kia lutovoko lwa nitu zeno; kadi wauna nuatambikila e yîkwa yeno se ntaudi za mavangu ma usafu ye umpumbulu muna vanga umpumbulu, owau nutambika e yîkwa yeno se ntaudi za unsongi yo vauka.+
20 Kadi vava nuakala ntaudi za sumu, ke nuakala muna wisa kia unsongi ko.
21 Ozevo, nkia mbongo nuayima muna kolo kiakina? Mambu mana numwenena e nsoni owau. Kadi e mbaninu a mambu mama i lufwa.+
22 Kansi, wau vo nuavevoka muna sumu yo kituka se ntaudi za Nzambi, nuyima e mbongo muna vauka kweno,+ e mbaninu i moyo a mvu ya mvu.+
23 Kadi o mfutu a sumu i lufwa,+ kansi lukau kevananga o Nzambi i moyo a mvu ya mvu+ muna Kristu Yesu wa Mfumu eto.+
