Tuku 11:1-32
11 Wantu awonso ova ntoto ndinga mosi kaka bavovanga* yo sadila mvovo mimosi.
2 Ekolo bayendanga kuna este, basolwele nzanza muna zunga kia Sina,+ bayantikidi zingila vana.
3 I bosi, bavovaziane vo: “Nuiza twavanga e dobo yo yoka zo.” Ozevo, basadidi e dobo ke mu matadi ko, dimbu ke mu nteke ko.
4 Bavovele vo: “Nuiza twatunga mbanz’eto ye nzo yandá ilwaka kuna zulu, twayivangila nkumbu a tunda, kimana twalembi mwangana mu nza yawonso.”+
5 I bosi, Yave okulumukini katala e mbanza ye nzo yandá itungilu kwa wan’a wantu.
6 Yave ovovele vo: “Yau awonso nkangu mosi ye ndinga mosi,+ tala dina bevanganga. Owau, konso dina bekana, vanga bevanga dio.
7 Nuiza! Tukulumuka,+ twabindakesa e nding’au kimana balembi bakula e ndinga ya muntu yo nkwandi.”
8 Muna mpila yayi, Yave ubamwanganese vavana, bele mu nza yawonso,+ malembe-malembe bayambwidi tunga e mbanza.
9 Ekiaki i kuma yayikilwa vo Babele,*+ kadi i mûna o Yave kabindakesela e ndinga ya nza yawonso, Yave ubamwanganese vavana, bele mu nza yawonso.
10 Olwalu i lusansu lwa Seme.+
Seme mvu 100 kakala miau vava kawuta Ampakesade,+ vioka mvu miole kuna nim’a Kizalu.
11 Vava kawuta Ampakesade, Seme wazinga diaka mvu 500. Wawuta wan’amakala yo wan’amakento.+
12 Ampakesade wazinga mvu 35, i bosi wawuta Sela.+
13 Vava kawuta Sela, Ampakesade wazinga diaka mvu 403. Wawuta wan’amakala yo wan’amakento.
14 Sela wazinga mvu 30, i bosi wawuta Ebe.+
15 Vava kawuta Ebe, Sela wazinga diaka mvu 403. Wawuta wan’amakala yo wan’amakento.
16 Ebe wazinga mvu 34, i bosi wawuta Pelenge.+
17 Vava kawuta Pelenge, Ebe wazinga diaka mvu 430. Wawuta wan’amakala yo wan’amakento.
18 Pelenge wazinga mvu 30, i bosi wawuta Reu.+
19 Vava kawuta Reu, Pelenge wazinga diaka mvu 209. Wawuta wan’amakala yo wan’amakento.
20 Reu wazinga mvu 32, i bosi wawuta Serunge.
21 Vava kawuta Serunge, Reu wazinga diaka mvu 207. Wawuta wan’amakala yo wan’amakento.
22 Serunge wazinga mvu 30, i bosi wawuta Nako.
23 Vava kawuta Nako, Serunge wazinga diaka mvu 200. Wawuta wan’amakala yo wan’amakento.
24 Nako wazinga mvu 29, i bosi wawuta Tera.+
25 Vava kawuta Tera, Nako wazinga diaka mvu 119. Wawuta wan’amakala yo wan’amakento.
26 Tera wazinga mvu 70, i bosi wawuta Abarama,+ Nako+ yo Karani.
27 Olwalu i lusansu lwa Tera.
Tera owutidi Abarama, Nako yo Karani; Karani wawuta Loti.+
28 Karani muna nsi andi ya kingutukila kafwila, muna Ure+ ya Akaladi,+ ekolo se diandi Tera kakala o moyo.
29 Abarama yo Nako bayibongele akento. O nkento wa Abarama e nkumbu andi Sarai,+ o nkento a Nako e nkumbu andi Mileka,+ wa mwan’ankento a Karani, wa se dia Mileka yo Yiseka.
30 Sarai sita kakala;+ kakala yo mwana ko.
31 I bosi, Tera obongele mwan’andi Abarama yo ntekolo andi Loti,+ wa mwan’a Karani, yo Sarai wa mwan’andi a nzitu, o nkento a Abarama wa mwan’andi, bavaikidi muna Ure ya Akaladi, bele kuna nsi ya Kenani.+ I bosi, bezidi muna Karani,+ bayantikidi zingila mûna.
32 Tera wazinga mvu 205. I bosi, Tera ofwidi muna mbanz’a Karani.
Mvovo vana yand'a lukaya
^ Mvovo wa sina: “O ntoto awonso ndinga mosi wavovanga.”
^ Ina ye nsasa vo: “Mavuanga.”
