Tuku 16:1-16
-
Anga yo Yisemaele (1-16)
16 Sarai wa nkaz’a Abarama sita kakala,+ kansi wakala yo ntaudi ankento wa musi Engipito, e nkumbu andi Anga.+
2 Muna kuma kiaki, Sarai ovovese Abarama vo: “Dodokolo, ungwá! Yave wankanga e vumu yalembi wuta wana. Dodokolo, vukana yo ntaudi ame. Nanga ndenda vua wana muna yandi.”+ Abarama owididi e mvovo mia Sarai.
3 Vava Abarama kazinga mvu kumi muna nsi ya Kenani, o Sarai wa nkaz’andi obongele Anga wa ntaudi andi ankento wa musi Engipito, umvene kwa Abarama kakala se nkaz’andi.
4 Abarama ovukane yo Anga, oyimiti. Vava kamwene vo oyimiti, oyantikidi veza o mfumu andi ankento.
5 Muna kuma kiaki, Sarai ovovese Abarama vo: “Ngeye i nkwa kuma muna mpasi zazi imweswanga. Mono mpene ntaudi ame ova moko maku,* kansi vava kamwene vo oyimiti, oyantikidi kumveza. Yambula Yave kakala mfundisi ova kati kwa mono yo ngeye.”
6 Abarama ovovese Sarai vo: “Tala! E ntaudi kunsi a wisa kiaku kena. Umvanga konso una ozolele.” Sarai osakanene Anga, o Anga otayidi vana kena.
7 Kuna kwalanda, o mbasi a Yave unsolwele vana ndambu a nto a maza muna makanga, vana nto ina muna nzil’a Sure.+
8 O mbasi oyuvuidi vo: “E Anga wa ntaudi a Sarai, akweyi otuka ye akweyi okwendanga?” Anga ovutwidi vo: “Sarai wa mfumu ame ankento itinanga.”
9 Mbasi a Yave ovovese Anga vo: “Vutuka kwa mfumu aku ankento, uyikulula vana moko mandi.”
10 I bosi, mbasi a Yave ovovele vo: “Wokesa iwokesa e mbongo aku, ke ilenda tangakana ko.”+
11 Mbasi a Yave okudikidi mpe vo: “Tala, wayimita wina, mwan’a yakala owuta, ofwete kumvana e nkumbu Yisemaele,* kadi Yave owidi e mpasi zaku.
12 O mwana okala nze buluku* dia mfuta. Onuana ye awonso, awonso mpe bekunuanisa, mantalani kezingila ye mpangi zandi zawonso.”*
13 I bosi, Anga obokel’e nkumbu a Yave, ona kamokenenge yandi, oku vo: “U Nzambi ona omonanga,”+ kadi edi kavovele vo: “Nga ova fulu kiaki mbwene ndiona okumbonanga?”
14 Ekiaki i kuma e sima kiayikilwa vo Bela-kairoi.* (Kina vana kati kwa Kadese ye Berede.)
15 I bosi, Anga owutìdi Abarama o mwan’a yakala, Abarama ovene mwan’andi e nkumbu vo Yisemaele.+
16 Abarama mvu 86 kakala miau vava Anga kanwutila Yisemaele.
Mvovo vana yand'a lukaya
^ Mvovo wa sina: “vana tulu kiaku.”
^ Ina ye nsasa vo: “Nzambi Owanga.”
^ Akaka bevovanga vo zebra. Nanga fu kia kuyitumina uyikanga.
^ Nanga, “mu lubangamu lwa mpangi zandi zawonso kezingila.”
^ Ina ye nsasa vo: “Sima kia Ndiona Wamoyo Ona Okumbonanga.”
