Tuku 19:1-38
19 E mbasi zole zilweke muna Sodoma muna nkokela, ekolo Loti kakele wavuanda vana vitu dia Sodoma. Vava Loti kabamwene, otelamene yo kwenda kubakika, ovumbamene.+
2 Ovovele vo: “Dodokolo, e mfumu zame, nuiza oku nzo a ntaudi eno nualeka kûna mu fuku wau yo sukulwa malu meno. I bosi, vava nusikama muna menemene, nuele kweno.” Muna diadi bavovele vo: “Ve, vana ntanda* tuleka.”
3 Kansi, Loti osiandamene vo benda yandi kuna nzo andi. Ubalambidi e lambu yo vanga mbolo zakondwa mfuna, badidi.
4 Vitila benda leka, o wan’amakala a mbanza—wan’amakala a Sodoma tuka muna nleke yamuna mbuta, yau awonso—bazungidi e nzo.
5 Bayantikidi bokela Loti yo vova vo: “Akweyi bena wantu bezidi mu nzo aku omu fuku wau? Ututwasila yau oku mbazi kimana twavukana yau.”+
6 Loti ovaikidi kuna bakala, vana mwelo, i bosi okangidi e kielo.
7 Ovovele vo: “Dodokolo e mpangi zame, ke nuvangi bi wa mpila yayi ko.
8 Tala, wana wole amakento ngina yau, ke bavukanene ye yakala ko. Dodokolo, yambula yanutwasila yau nuabavanga konso dina nuzolele. Kansi, ke nuvangi diambu ko kwa wantu awaya, kadi nzenza zame ye mu nzo ame bezidi.”*+
9 Muna diadi bavovele vo: “Katuka omu nzila!” Bakudikidi vo: “E nzenza ndioyo wizidi zingila kwaku, owau yandi ozolele kutufundisa! Owau, e mbi tukuvanga isundidi ina tukanini kwa yau.” Yau awonso bafietakese* Loti, bele bangula e kielo.
10 Muna kuma kiaki, o wantu* bakedi muna nzo balambwidi moko, batuntidi Loti muna nzo yo kanga e kielo.
11 Bavondele meso m’awana bakedi vana mwelo, tuka muna nleke yamuna mbuta, bayoyele mu vava solola o mwelo.
12 O wantu* bakedi muna nzo bayuvuidi Loti vo: “Nga muntu diaka una yandi mu mbanza yayi? Azitu, wan’aku amakala, wan’aku amakento ye yitu yaku yawonso; ubavaikisa mu mbanza yayi!
13 Fwasa tufwasa e fulu kiaki, kadi e kazu mu kuma kia nkangu wau se kingi vana ndose a Yave.+ Muna diadi, o Yave ututumini twafwasa e mbanza.”
14 Muna kuma kiaki, Loti ovaikidi, oyantikidi mokena ye azitu andi ana badi sompa o wan’andi amakento, ubavovese vo: “Nutelama! Nuakatuka va fulu kiaki, kadi Yave fwasa kefwasa e mbanza!” Kansi, azitu andi babenze vo sakana kesakananga.+
15 Ekolo kuma kwakianga, e mbasi bakwamanana vovesa Loti vo: “Telama! Bonga o nkaz’aku yo wan’aku wole amakento ana bena yaku, kimana walembi fwaswa vava e mbanza itumbwa mu kuma kia bi wandi.”+
16 Wau vo zingila kazingilanga, o wantu* basimbidi muna koko kwandi ye muna koko kwa nkaz’andi yo muna koko kwa wan’andi wole amakento; bamvaikisi yo kunsisa kuna mbazi a mbanza,+ kadi Yave umfwididi e nkenda.+
17 Vava babavaikisi kuna mbazi a mbanza, mosi muna yau ovovele vo: “Tina, wavuluza moyo aku! Kutadi kunima ko,+ kuningama va konso fulu kia mvivu wau ko!+ Tinina kuna zunga kia miongo kimana walembi fwaswa!”
18 Loti ubavovese vo: “Dodokolo, e Yave, kumfidi kwakuna ko!
19 Dodokolo, o ntaudi aku omweno e dienga ova meso maku, unsongele ngemba zaku zisundidi* muna vuluza o moyo ame,+ kansi kilendi tinina kuna zunga kia miongo ko, kadi wonga ngina wau vo e sumbula kilenda kundwakila yo fwa.+
20 Vena ye mbanza yakete ina lukufi kuna ndenda tinina. Dodokolo, nga ndenda kwame swekamena kûna e? Fulu kiakete kwandi. Yavuluzila moyo ame kûna.”
21 Muna diadi, Nzambi ovovese Loti vo: “Ke diambu ko, ivanga dina olombele.+ E mbanza ina oyikidi kifwasa yo ko.+
22 Sia nswalu! Tinina kûna, kadi kilendi vanga diambu ko yavana olwaka ko!”+ Ikuma kayikidi e mbanza vo Soare.*+
23 O mwini wakivaikila vava Loti kalwaka muna mbanz’a Soare.
24 I bosi, Yave onokese lengo yo tiya muna Sodoma ye Ngomora—kwa Yave twatuka, kuna zulu.+
25 Muna mpila yayi, Nzambi wafwasa e mbanza zazi, o mvivu wawonso, kumosi yo wantu awonso a mbanza ye nti.+
26 Kansi, o nkaz’a Loti ona wakala kuna nim’a Loti, otadidi kunima, okitukidi se lunzi dia mungwa.+
27 Abarayama otelamene muna mene-mene yo kwenda vana kateka mokenena yo Yave.+
28 Vava katadidi kuna fula dia Sodoma ye Ngomora ye mvivu wawonso, omwene diambu diasivi. Mwisi wangolo wafutumukanga muna nsi nze mwisi a soka dia tiya.+
29 Vava Nzambi kafwasidi e mbanza za mvivu, osungamene Abarayama muna vaikisa Loti muna mbanza zina kafwasidi, e mbanza zina Loti kazingidinge.+
30 Kuna kwalanda, Loti otombokele tuka kuna Soare yo kwenda zingila kuna zunga kia miongo+ kumosi yo wan’andi wole amakento, kadi omwene wonga wazingila kuna Soare.+ Wele zingila muna nduka kumosi yo wan’andi wole amakento.
31 Ona wambuta ovovese o nleke andi vo: “O se dieto se nunu kwandi, omu nsi ke muna yakala ko dilenda vukana yeto nze una uvangamanga mu nza yawonso.
32 Wiza twavana se dieto e vinyu kanua, twaleka yandi, kimana e mbongo a se dieto yalembi fûka.”
33 Muna fuku wauna, bakolese se diau e vinyu; ona wambuta okotele, olele yo se diandi, kansi Loti kazaya wo ko vava mwan’andi kaleka yo kakatuka.
34 Muna lumbu kialanda, ona wambuta ovovese nleke andi vo: “Tala, ozono muna fuku yalele yo se diame. Yambula twamvana diaka vinyu mu fuku wau. I bosi, wenda leka yandi, kimana e mbongo a se dieto yalembi fûka.”
35 Muna fuku wauna, bakolese diaka se diau e vinyu; ona wanleke okotele, olele yo se diandi, kansi Loti kazaya wo ko vava mwan’andi kaleka yo katuka.
36 Muna mpila yayi, o wana wole amakento a Loti bayimiti muna se diau.
37 Ona wambuta owutidi mwan’ayakala yo kumvana nkumbu Moabe.+ Yandi i se dia Anemoabe o unu.+
38 Ona wanleke mpe owutidi mwan’ayakala yo kumvana e nkumbu Bene-ami. Yandi i se dia Aneyamone+ o unu.
Mvovo vana yand'a lukaya
^ Yanzala kiakutakenanga nkangu mu teka, sumba lekwa yo tela mambu.
^ Mvovo wa sina: “kadi muna diadi i bezidi ku nsi a nludi a nzo ame.”
^ Yovo “banungwini.”
^ I sia vo, mbasi zakituka se wantu.
^ I sia vo, mbasi zakituka se wantu.
^ I sia vo, mbasi zakituka se wantu.
^ Yovo “walakazi waku usundidi.”
^ Ina ye nsasa vo: “Yakete-kete.”
