Tuku 22:1-24
22 Vava mambu mama maviokele, Nzambi aludi otontele Abarayama,+ umvovese vo: “Abarayama!” Abarayama ovutwidi vo: “Mon’oyu!”
2 Nzambi ovovele vo: “Dodokolo, bonga mwan’aku Isaki,+ o mwan’aku mosi kaka, ona otoma zolanga,+ wenda kuna nsi ya Moria,+ wantambika se lukau lwa ngioka vana mongo umosi muna miongo ikusonga.”
3 Abarayama osikamene muna menemene, okubikidi e buluku, onete ntaudi zandi zole kumosi yo mwan’andi Isaki. Opaswidi e nkuni za lukau lwa ngioka, wele kuna fulu kina o Nzambi aludi kansonga.
4 Muna lumbu kiatatu, Abarayama osengwele o meso, omwene e fulu kuna kwandá.
5 Abarayama ovovese ntaudi zandi vo: “Nusala vava ye buluku, omono yo nleke okuná tukwenda mu sambila Nzambi, i bosi tuvutuka.”
6 Abarayama obongele e nkuni za lukau lwa ngioka, otudidi zo vana vembo dia Isaki wa mwan’andi. Obongele o tiya ye mbele, yau awole bele.
7 I bosi, Isaki ovovese Abarayama wa se diandi vo: “E tata!” Abarayama ovutwidi vo: “Mon’oyu e mwan’ame!” Isaki ovovele vo: “O tiya ye nkuni tuna zau, kansi akweyi dina e meme ditambikwa se lukau lwa ngioka?”
8 Abarayama ovovele vo: “E mwan’ame, o Nzambi yandi kibeni ovana e meme dia lukau lwa ngioka.”+ Yau awole bakwamanene kangala kumosi.
9 Balweke vana fulu kina Nzambi aludi kansonga. Abarayama otungidi e ziku, oyadidi e nkuni vana ntandu. Okangidi e moko yo malu ma Isaki wa mwan’andi, untensekele vana ziku, vana ntandu a nkuni.+
10 I bosi, Abarayama olambwidi o koko yo bonga e mbele kavonda o mwan’andi.+
11 Kansi e mbasi a Yave imbokele tuka kuna zulu, oku vo: “Abarayama, Abarayama!” Yandi ovutwidi vo: “Mon’oyu!”
12 Mbasi ovovele vo: “Kuvondi nleke ko, kumvangi konso diambu ko, kadi owau nzeye wo vo Nzambi ovuminanga kadi kungimini mwan’aku ko, o mwan’aku mosi kaka.”+
13 Muna diadi, Abarayama osengwele o meso, omwene vaka kia meme kivakamene mpoka muna vuangi. Abarayama wele, obongele meme otambikidi dio se lukau lwa ngioka vana fulu kia mwan’andi.
14 Abarayama oyikidi e fulu kiokio vo Yave-yire.* Dianu wantu bevovelanga yamu unu vo: “Vana mongo andi, Yave ovana eki kivuilu o mfunu.”+
15 Mbasi a Yave obokele diaka Abarayama mu nkumbu anzole tuka kuna zulu,
16 ovovele vo: “‘Ndidi e ndofi mu mono kibeni,’ u kavovele o Yave,+ ‘wau vo ovangidi e diadi yo lembi kungimina o mwan’aku, o mwan’aku mosi kaka,+
17 sambula kikilu ikusambula, wokesa kikilu iwokesa e mbongo aku nze ntetembwa za zulu, nze senge vana kumu dia mbu.+ E mbongo aku ivua e mbanza za* mbeni zau.+
18 Muna mbongo aku,+ e zula yawonso ova ntoto ivuila e nsambu, wau vo owididi e nding’ame.’”+
19 I bosi, Abarayama ovutukidi vana kasisa e ntaudi zandi, bele kumosi yakuna Bere-seba;+ Abarayama okwamanene zingila kuna Bere-seba.
20 I bosi, Abarayama otambwidi e nsangu vo: “O Mileka mpe owutìdi Nako wa mpangi aku o wana:+
21 O mwan’antete i Usi, o Buze i nleke andi, o Kemuele i se dia Arami,
22 Mileka owutidi mpe Kesede, Kazo, Piledasi, Yidelafe yo Betwele.”+
23 Betwele owutidi Rebeka.+ Mileka owutìdi Nako wa mpangi a Abarayama wana nana.
24 O makangu mandi ona wakala ye nkumbu vo Ruma, owutidi mpe wana: Teba, Ngakami, Takasi yo Maka.
Mvovo vana yand'a lukaya
^ Ina ye nsasa vo: “Yave Ovana; Yave Okubika.”
^ Mvovo wa sina: “vitu dia.”
