Tuku 23:1-20
-
Lufwa ye fulu kiazikwa Sara (1-20)
23 O Sara mvu 127 kazinga; e miami i mvu mia zingu kia Sara.+
2 Sara muna Kireyate-araba+ kafwila, i sia vo, Keberone,+ muna nsi ya Kenani.+ Abarayama okendalele* yo dila Sara.
3 Abarayama okatukidi vana vena e vimbu dia nkaz’andi, ovovese wan’a Kete+ vo:
4 “Omono i nzenza, izingilanga ova kati kweno.+ Dodokolo, nuntekela e ndambu a ntoto vovo nuina yakala se fulu kia ziami, kimana yakatula e mvumbi ame yanzika.”
5 Muna diadi, wan’a Kete bavutwidi kwa Abarayama vo:
6 “Utuwá e mfumu ame. Ongeye u nkuluntu wasolwa kwa Nzambi* ova twina.+ Olenda zika nkaz’aku mu ziami kimosi muna ziami yeto yambote. Ke mosi ko mu yeto okuyimina e ziami mu zika o nkaz’aku.”
7 Abarayama otelamene, ovumbamene vana vena nkangu a nsi, i sia vo, wan’a Kete,+
8 ubavovese vo: “Avo nutondele* vo yazika nkaz’ame, nungwá, nudodokela Eferone wa mwan’a Soka,
9 kantekela o nduk’a Makepela, owu wina vo wandi; wina kuna nsuk’a mpatu andi. Yambula kantekela wo vana meso meno, muna ntalu a palata+ ufwa, kimana omono yakala ye ziami kiakuvuila.”+
10 Eferone okedi wavuanda vana vena wan’a Kete. Eferone wa Nkete ovutwidi Abarayama vana meso ma wan’a Kete ye vana meso ma wantu awonso bakotelenge vana vitu dia mbanza,+ oku vo:
11 “Ke wau ko, e mfumu ame! Ungwila. Ivene mpatu yo nduka una mo. Ova meso ma wan’a nkangu ame, ivanini yo. Zika o nkaz’aku.”
12 Muna diadi, Abarayama ovumbamene vana ndose a nkangu a nsi,
13 ovovese Eferone vana meso ma nkangu vo: “Dodokolo, ungwila! Nzolele futa e ntalu a palata ifwene mu mpatu yoyo. Dodokolo, tambula yo, kimana yazikila o nkaz’ame mûna.”
14 I bosi, Eferone ovutwidi Abarayama vo:
15 “E mfumu ame, ungwila. E ntalu a mpatu yoyo 400 za sekele* za palata, kansi nki kiokio vana vena mono yo ngeye? Zika o nkaz’aku.”
16 Vava Abarayama kawidi una uvovele Eferone, ovene Eferone lutangu lwa palata kayikidi vana meso ma wan’a Kete, 400 za sekele* za palata, mun’owu wa tezelo kia akiti.+
17 Muna mpila yayi, e mpatu a Eferone kuna Makepela, eyi yakala mantalani ye Mamere—e mpatu yo nduka wakala mo ye nti miawonso miakala muna mwingilu wawonso wa mpatu—yakituka se
18 ya Abarayama. Wasumbila yo vana meso ma wan’a Kete ye vana meso ma wantu awonso bakotelenge vana vitu dia mbanza.
19 I bosi, Abarayama ozikidi nkaz’andi Sara muna nduk’a mpatu a Makepela, ina mantalani ye Mamere, i sia vo, Keberone, muna nsi a Kenani.
20 Muna mpila yayi, e mpatu yo nduka wakala mo, iveno kwa Abarayama vana meso ma wan’a Kete, yakala se ziami kiandi.+
Mvovo vana yand'a lukaya
^ Yovo “olundidi e kifwidi.”
^ Nanga, “nkuluntu anene.”
^ Yovo “mioyo mieno mitondele.”
