Tuku 26:1-35
26 Mukedi mvengele muna nsi, katula o mvengele wantete wakala muna lumbu ya Abarayama.+ Muna diadi, Isaki wele kwa Abimeleke wa ntinu a Afelesetia, kuna Ngerare.
2 I bosi, Yave omonekene kwa yandi yo vova vo: “Kukulumuka kuna Engipito ko. Zingila vana fulu kina ikusonga.
3 Zingila va fulu kiokio se nzenza,+ ikala yaku yo kusambula, kadi kwa ngeye ye mbongo aku ivana e nsi yayi yawonso. + Lungisa ilungisa e ndofi yadia kwa se diaku Abarayama:+
4 ‘Wokesa kikilu iwokesa e mbongo aku nze ntetembwa za zulu;+ ivana e nsi yayi yawonso+ kwa mbongo aku; e zula yawonso ova nza muna mbongo aku isambulwilwa,’*+
5 kadi Abarayama wawila e nding’ame yo kwamanana lunda mana yanlombanga, nkanikinu, mîna ye nsiku miame.”+
6 Muna diadi, Isaki okwamanene zingila muna Ngerare.+
7 O wantu vava banyuvulanga mu kuma kia nkaz’andi, Isaki wavovanga vo: “Oyandi nsang’ame.”+ Wonga kakala wau wa vova vo: “Oyandi nkaz’ame,” kadi wavova vo: “O wantu a fulu kiaki balenda kumponda mu kuma kia Rebeka,” kadi mote kikilu kakala.+
8 Kuna kwalanda, Abimeleke wa ntinu a esi Felesetia otadidi vana zianela, omwene Isaki wabimbananga* yo nkaz’andi Rebeka.+
9 Vana vau, Abimeleke obokelese Isaki yo kumvovesa vo: “Oyandi nkaz’aku kikilu! Ekuma wavovele vo: ‘Oyandi nsang’ame’?” Muna diadi, Isaki umvutwidi vo: “Edi yavovele wo kimana yalembi vondwa mu kuma kiandi.”+
10 Kansi, Abimeleke unyuvuidi diaka vo: “Nkia diambu diadi utuvangidi?+ Kele vo mosi muna nkangu ame kaleka yo nkaz’aku, yeto wadi natisa o nkanu!”+
11 Abimeleke okanikini nkangu wawonso vo: “Konso ona osimba muntu ndioyu yo nkaz’andi, vondwa kevondwa!”
12 Isaki oyantikidi kuna e mbongo muna nsi yayina. Muna mvu wowo wakutika nkama-nkama muna ina kakuna, kadi Yave wansambulanga.+
13 O muntu ovueme, e kimvuama kiandi kiwokele yavana kakitukidi mvuama kikilu.
14 Okedi ye kambi dia mameme ye ngombe ye ntaudi zayingi,+ Afelesetia bayantikidi kumwen’e kimpala.
15 Muna kuma kiaki, Afelesetia babongele o ntoto yo zika e sima yawonso yatima ntaudi za se diandi muna lumbu ya Abarayama.+
16 I bosi, Abimeleke ovovese Isaki vo: “Katuka ova ndambu eto, kadi okitukidi nkwa nkuma lutila yeto.”
17 Muna kuma kiaki, Isaki okatukidi vo, wele kuna ndimb’a Ngerare,+ oyantikidi zingila kûna.
18 Isaki otimunuini e sima yatimwa muna lumbu ya Abarayama wa se diandi, ina Afelesetia balanga vava kiafwa Abarayama,+ Isaki oyikidi e sima yoyo muna nkumbu zina se diandi kavana yo.+
19 Ekolo ntaudi za Isaki batimanga muna ndimba, basolwele mo sima kia maza.
20 Avungudi a Ngerare bazonzele ye avungudi a Isaki, bavovele vo: “E maza mama meto!” Muna kuma kiaki, Isaki oyikidi e sima kiokio vo Eseke,* kadi bazonzele yandi.
21 Batimini sima kiankaka, bazonzèle kio diaka. Muna kuma kiaki, Isaki oyikidi kio vo Sitena.*
22 I bosi, oyalukidi vo yo tima sima kiankaka, kansi ekiaki ke bazonzèle kio ko. Muna kuma kiaki, Isaki oyikidi kio vo Rekobote.* Ovovele vo: “Kadi Yave utuvene fulu kiafwana yo kutuwokesa omu nsi yayi.”+
23 I bosi, okatukidi vo, otombokele kuna Bere-seba.+
24 Muna fuku wauna, Yave omonekene kwa yandi yo vova vo: “Mono i Nzambi a se diaku Abarayama.+ Kumoni wonga ko,+ kadi ngina yaku, ikusambula yo wokesa e mbongo aku mu kuma kia Abarayama wa selo kiame.”+
25 Muna kuma kiaki, Isaki otungidi vo e ziku yo kembela e nkumbu a Yave.+ Osumikini vo e saba kiandi,+ e ntaudi zandi batimini vo e sima.
26 Kuna kwalanda, Abimeleke otukidi kuna Ngerare kumosi yo Akuzati wa nludiki andi yo Fikole wa mfumu a makesa mandi,+ wizidi kwa Isaki.
27 Isaki ubayuvuidi vo: “Ekuma nuizidi kwa mono? Ke yeno ko nuambenga yo kunginga vana ndambu eno?”
28 Oyau bamvutwidi vo: “Tumwene kikilu e ziku vo Yave una yaku.+ Ikuma tuvovele vo: ‘Yambula twadia e ndofi oyeto yo ngeye, yambula twakanga e kangu yo ngeye+
29 vo kukutuvanga mbi ko, wau vo oyeto ke tuvangidi mbi ko, kadi mambote kaka tuvangidi kwa ngeye yo kusindika muna luvuvamu. Owau ongeye osambwilu kwa Yave.’”
30 Ubalambisidi e lambu, badidi yo nua.
31 Vava basikamene muna mene-mene, badidi e ndofi kwa muntu yo nkwandi.+ I bosi, Isaki ubasindikidi, bele muna luvuvamu.
32 Muna lumbu kiokio, e ntaudi za Isaki bezidi kunsamunuina e nsangu mu kuma kia sima batimini.+ Bamvovese vo: “Tusolwele maza!”
33 Isaki oyikidi sima kiokio vo Seba. Ekiaki i kuma e mbanza iyikilwanga vo Bere-seba+ yamu unu.
34 Vava Esau kalungisa mvu 40, osompele Yudite wa mwan’a Beri, wa Nkete yo Basemati wa mwan’a Elone, wa Nkete.+
35 Bakedi se tuku dia lukendalalu kwa Isaki yo Rebeka.+
Mvovo vana yand'a lukaya
^ Yovo “ikuyibakila e nsambu.” I sia vo, e zula ifwete vanga diambu muna vua e nsambu.
^ Yovo “wasakananga.”
^ Ina ye nsasa vo: “Nzonzi.”
^ Ina ye nsasa vo: “Mfundu.”
^ Ina ye nsasa vo: “Fulu Yanene.”
