Tuku 33:1-20
33 Yakobo osengwele o meso, omwene Esau okwizanga kumosi yo wantu 400.+ Muna kuma kiaki, ovambanese o wana, ubavene kwa Lea, kwa Rakele ye kwa ntaudi zau zole zamakento.+
2 Osidi e ntaudi zamakento yo wan’au kuna ntwala,+ o Lea yo wan’andi balende,+ o Rakele+ yo Yosefe kuna nima.
3 I bosi, oyandi ubavitidi kuna ntwala. Ekolo kafinamenenge vana vena mpangi andi, ovumbamene vana ntoto nkumbu nsambwadi.
4 Kansi, Esau wele ntinu mu kunkika, umbimbakene yo kumfiba, babokomokene ye dilu.
5 Vava Esau kasengwele o meso yo mona akento yo wana, oyuvuidi: “Aki nani awaya bena yaku?” Yakobo ovutwidi vo: “I wana ana o Nzambi kavene kwa ntaudi aku.”+
6 E ntaudi zamakento bafinamene kumosi yo wan’au, bavumbamene,
7 o Lea mpe ofinamene yo wan’andi, bavumbamene. I bosi, Yosefe ofinamene kumosi yo Rakele, bavumbamene.+
8 Esau oyuvuidi vo: “Ekuma otwikidi wantu yo makambi mana ngwanane mau?”+ Yakobo ovutwidi vo: “Muna vua e dienga ova ndose a mfumu ame.”+
9 Esau ovovele vo: “E nleke ame, mavua mayingi ngina mau.+ Lunda mavua maku.”
10 Kansi, Yakobo ovovele vo: “Ke wau ko. Avo mbweno e dienga ova meso maku, dodokolo tambula lukau ova koko kwame, kadi edi ntwasidi lo yamona e ndose aku. Ongeye untambwidi kuna kiese,+ o mona e ndose aku dina nze mono mbwene ndose a Nzambi.
11 Dodokolo, tambula lukau batwasidi,*+ kadi Nzambi unsongel’e dienga, ngina ye yawonso mvuidi o mfunu.”+ Yakobo okwamanene kunleba, muna diadi otambwidi lo.
12 Kuna kwalanda, Esau ovovele vo: “Twenda, yambula yavita kuna ntwal’aku.”
13 Kansi Yakobo umvovese vo: “E mfumu ame ozeye vo wana bakinu bakete,+ ngina mpe ye mameme ye ngombe ziyemekanga. Avo zidiatisilu mu nswalu, kana nkutu lumbu kimosi kaka, e kambi diawonso fwa difwa.
14 Dodokolo e mfumu ame, wend’a viti kuna ntwal’a ntaudi aku; vo i mono, ikwamanana o nkangalu ame malembe-malembe mun’owu wa ndiat’a kambi diame yo wana, yavana ilwaka kwa mfumu ame kuna Seyire.”+
15 Esau ovovele vo: “Dodokolo, mbula yasisila akaka muna wantu bena yame.” Yakobo vo: “Ke dina kwandi mfunu ko. O vua e dienga ova ndose a mfumu ame diafwana kwandi.”
16 Muna lumbu kiakina, Esau ovutukidi kuna Seyire.
17 Yakobo wele kuna Sukote,+ otungidi nzo andi yo vanga sudi yayingi mu kuma kia kambi diandi. Ikuma kayikidi e fulu kiokio vo Sukote.*
18 Vava Yakobo kadiete tuka Padani-arami,+ olweke kuna luvuvamu muna mbanz’a Sekeme,+ muna nsi ya Kenani;+ ozingidi lukufi ye mbanza.
19 Osumbidi ndambu a ntoto kwa wan’a Kamo wa se dia Sekeme mu 100 za sekele za palata,+ osimikini vo e saba kiandi.
20 Otungidi e ziku yo yikila dio vo Nzambi, o Nzambi a Isaele.+
