Tuku 34:1-31
34 O Dina wa mwan’ankento a Lea,+ ona kawutila Yakobo, wakala ye fu kia vaika mu kwenda kingula* e ndumba za nsi yayina.+
2 Vava Sekeme wa mwan’a Kamo, wa Nkivi,+ wa mfumu a nsi yayina kamwene, umbakidi yo kunleka mu kingolo.
3 O Sekeme otomene tatidila Dina wa mwan’ankento a Yakobo, olengokele ndumba o moyo, unlebele.*
4 I bosi, Sekeme ovovese Kamo+ wa se diandi vo: “Umbongela e ndumba yoyo kakala nkaz’ame.”
5 Vava Yakobo kawá vo Sekeme osafwidi Dina wa mwan’andi akento, o wan’andi mu nzanza bakala ye kambi diandi. Yakobo obutamene yavana wan’andi bavutuka.
6 Kuna kwalanda, Kamo wa se dia Sekeme wele mokena yo Yakobo.
7 Kansi o wan’a Yakobo bawidi wo, vana vau bakatukidi kuna nzanza, bezidi. Bakendalele kikilu yo funga makasi kadi o Sekeme ofusulwisi Isaele e nsoni wau kalele mwan’ankento a Yakobo+ mu kingolo, diambu dina ke difwene vangama ko.+
8 O Kamo ubavovese vo: “O Sekeme wa mwan’ame ozolele* kibeni mwan’aku ankento. Dodokolo, vana mwan’aku kwa mwan’ame kakala se nkaz’andi,
9 nukanga yeto e kangu dia longo.* Nutuvana wan’eno amakento, oyeno mpe nuabonga o wan’eto amakento.+
10 E nsi eto yawonso ina ova ntadisi eno. Nukala yeto, nuzingila mo, nuvangila mo yinkita, nukala mo.”
11 I bosi, Sekeme ovovele kwa se ye mpangi za Dina vo: “Yambula yamonua e dienga ova meso meno, ikunuvana konso kina nukundomba.
12 Nulenda kweno kundomba konso ntalu a nzimbu za longo yo lukau.+ Yakubama ngina mu vana konso kina nukundomba. Kansi, numpana kaka o ndumba kakala nkaz’ame.”
13 O wan’a Yakobo bavutulwidi Sekeme yo Kamo wa se diandi kuna ndekwa, wau vo Sekeme osafwidi Dina wa nsang’au.
14 Babavovese vo: “Ke tulendi vanga diambu diadi ko, twavana nsang’eto kwa muntu walembi zengwa,*+ kadi e diadi dia luvezo kwa yeto.
15 Tutambulwila kaka dina nuvovele avo nuvanga edi: Nukala nze yeto, nuzenga wan’eno amakala awonso.+
16 I bosi, tuvana wan’eto amakento kwa yeno, oyeto tubonga wan’eno amakento, tuzinga yeno yo kituka nkangu umosi.
17 Kansi, avo ke nutuwididi ko yo zengwa, tubonga nsang’eto yo kwenda kweto.”
18 E mvovo miau miyangidikidi Kamo+ yo Sekeme wa mwan’a Kamo.+
19 O toko, kazingidi ko mu vanga dina kalombelo,+ kadi ozolele kibeni o mwan’ankento a Yakobo; Sekeme watoma zitiswanga muna nzo yawonso ya se diandi.
20 Muna kuma kiaki, o Kamo yo Sekeme wa mwan’andi bele vana vitu dia mbanza+ yo vovesa wan’amakala a mbanz’au vo:
21 “Wantu awaya bazolele kadila yeto kuna luvuvamu. Yambula bazingila mu nsi eto yo vangila mo yinkita, kadi e nsi yanene, bafwana mo zingila. Tulenda bonga wan’au amakento se akazi eto, oyeto mpe tulenda kubavana o wan’eto amakento.+
22 Kansi, muna zinga yeto yo kituka se nkangu mosi, wantu awaya diambu dimosi kaka balombele: o wan’amakala awonso ova twina bazengwa nze yau.+
23 Avo tuvangidi wo, nga e lekwa yau ye mavua mau ye makambi mau ke mekala meto ko e? Ozevo, yambula twakanga yau e kangu kimana twazinga yau kumosi.”
24 Awonso bakutakene vana vitu dia mbanza andi bawididi Kamo yo Sekeme wa mwan’andi, o wan’amakala awonso bazengelo, awonso bakutakene vana vitu dia mbanza.
25 Kansi, muna lumbu kiatatu, ekolo bamwenenge mpasi za mputa, wana wole a Yakobo, Simeone yo Levi, ampangi za Dina,+ babongele konso muntu yo nsosolo andi, bele muna mbanza kuna kinsalukisa yo vonda wan’amakala awonso.+
26 Bavondele Kamo yo mwan’andi Sekeme muna nsosolo, babongele Dina muna nzo a Sekeme, bele kwau.
27 O wan’ankaka a Yakobo bele muna mbanza, bamwene wantu bafwa, basanzidi e mbanza mu kuma kia nsang’au wasafulwa.+
28 Babongele mameme mau, ngombe zau, mabuluku mau ye yawonso yakala muna mbanza ye muna mpatu.
29 Babongele mpe lekwa yau yawonso, yingiana-ngiana yau, akento au yo sanza yawonso yakala muna nzo zau.
30 Muna diadi, Yakobo ovovese Simeone yo Levi vo:+ “Mpasi zayingi* nuntwasidi, kadi mbengeno kwa esi nsi yayi, kwa Anekenani ye Aneperese mu kuma kieno. Oyeto ke tuna ndonga ko. Kieleka, oyau bekutakana mu kwiza kundwanisa, bekumfwasa kumosi ye nzo ame.”
31 Kansi bavutwidi vo: “Nga vena yo muntu wafwana kitula nsang’eto se nkembi?”*
Mvovo vana yand'a lukaya
^ Yovo “tala.”
^ Mvovo wa sina: “ovovese o ntim’a ndumba.”
^ Yovo “O moyo a mwan’ame Sekeme utatididi.”
^ Yovo “tusompaziana.”
^ Mvovo wa sina: “muntu una ye kutu.”
^ Yovo “Lufwasu.”
^ Yovo “nkento a ndumba.”
