Tuku 35:1-29
35 I bosi, Nzambi ovovese Yakobo vo: “Telama, tomboka kuna Betele,+ zingila kuna; tungila ko Nzambi aludi e ziku, ona wamoneka kwa ngeye vava watinanga Esau wa mpangi aku.”+
2 Yakobo ovovese esi nzo andi ye awonso bakedi yandi vo: “Nukatula e nzambi za teke* zina yeno,+ nuyivelelesa yo soba e mvuatu mieno,
3 tutomboka kuna Betele. I kûna itungila Nzambi aludi e ziku, ona wampana e mvutu muna lumbu kia mpasi zame, ona okalanga yame konso fulu* ikwenda.”+
4 Muna diadi, bavene Yakobo e nzambi zawonso za teke* bakala zau ye nlunga miakala muna matu mau, Yakobo ozikidi* zo kuna nsi a nti anene wakala lukufi ye Sekeme.
5 Vava bayalukidi, Nzambi otwese wonga muna mbanza zawonso zibazungidi, muna diadi ke balende wan’a Yakobo ko.
6 Kuna kwalanda, Yakobo olweke kuna Luzi,+ i sia vo, Betele, muna nsi ya Kenani, kumosi ye awonso bakele yandi.
7 Otungidi vo ziku, oyikidi e fulu kiokio vo Ele-Betele,* kadi i kûna o Nzambi aludi kayisengomwena kwa yandi, vava katinanga mpangi andi.+
8 Kuna kwalanda, o Debora+ wa ndezi a Rebeka, ofwidi yo zikwa vana ndambu a mongo a Betele, kuna nsi a nti a terebinte. Muna diadi, Yakobo oyikidi nti wowo vo Alone-bakute.*
9 Nzambi omonekene diaka kwa Yakobo ekolo katukidinge kuna Padan-arami, unsambwidi.
10 Nzambi umvovese vo: “E nkumbu aku Yakobo.+ Kansi kuyikilwa diaka Yakobo ko, oyikilwa vo Isaele.” Oyantikidi kunyikila vo Isaele.+
11 Nzambi umvovese diaka vo: “Mono i Nzambi a Mpungu-ngolo.+ Wutana yo wokela. Okituka se dia zula yayingi, omu ngeye*+ mutuka atinu.+
12 Vo i nsi ina yavana kwa Abarayama yo Isaki, kwa ngeye ivana yo, ivana yo mpe kwa mbongo ikulandila.”+
13 I bosi, Nzambi unsisidi vana fulu kina kamokenene yandi.
14 Muna kuma kiaki, Yakobo odongekele lunzi vana fulu kamokenene yandi, lunzi dia tadi, oyitidi dio lukau lwa ndua yo mazi.+
15 Yakobo okwamanene yikila e fulu kina o Nzambi kamokenene yandi vo Betele.+
16 Bayalukidi vana Betele. Ekolo bakedi kwandá ye Eferate, Rakele obakamene nsongo mia wuta, e ngutilu andi yampasi kikilu.
17 Kansi, vava Rakele kavangiding’e ngolo za wuta, o nwutisi umvovese vo: “Kumoni wonga ko, o mwana ndioyu mpe wuta okunwuta.”+
18 Una e fulumwinu kia Rakele se kifokoka (kadi mu fwa se kena), ovene o mwana e nkumbu vo Bene-oni,* kansi o se diandi umvene nkumbu vo Benyamini.*+
19 Rakele ofwidi yo zikwa muna nzil’a Eferate, i sia vo, Beteleme.+
20 Yakobo odongekele lunzi vana ziami kia Rakele; ediadi i lunzi dia ziami kia Rakele yamu unu.
21 I bosi Isaele oyalukidi, osumikini e saba kiandi vioka fitini ye nzo yandá ya Ede.
22 Lumbu kimosi, ekolo Isaele kazingilanga muna nsi yayina, o Rubeni ovukane yo Bila wa makangu ma se diandi, o Isaele owidi wo.+
O Yakobo wan’a 12 kakala yau.
23 O Lea wawuta Rubeni,+ wa mwan’antete a Yakobo, i bosi Simeone, Levi, Yuda, Yisakare yo Zebulune.
24 O Rakele wawuta Yosefe yo Benyamini.
25 O Bila wa ntaudi a Rakele wawuta Dani yo Nafetali.
26 O Zilepa wa ntaudi a Lea wawuta Ngadi yo Asere. Awaya i wan’amakala a Yakobo, ana bawutukila kuna Padani-arami.
27 Kuna kwalanda, Yakobo olweke kuna Mamere+ kuna kwakala o se diandi Isaki, kuna Kireyate-araba, i sia vo, Keberone, kuna Abarayama yo Isaki bazingila se anzenza.+
28 Isaki mvu 180 kazinga.+
29 I bosi, Isaki ofwidi yo zikwa wauna wazikilwa akulu andi,* vava kazinga mvu miayingi ye kiese;* o wan’andi Esau yo Yakobo banzikidi.+
Mvovo vana yand'a lukaya
^ Mvovo wa sina: “nzambi za nzenza.”
^ Yovo “muna konso nzila.”
^ Mvovo wa sina: “nzambi za nzenza.”
^ Yovo “oswekele.”
^ Ina ye nsasa vo: “Nzambi a Betele.”
^ Ina ye nsasa vo: “Terebinte ya Dilu.”
^ Mvovo wa sina: “mu luketo lwaku.”
^ Ina ye nsasa vo: “Mwan’ame a Kifwidi.”
^ Ina ye nsasa vo: “Mwan’a Koko Kwalunene.”
^ Mvovo wa sina: “oyikakeso yo nkangu andi.”
^ Mvovo a sina: “vava kanuna ye lumbu yayingi.”
