Tuku 38:1-30
-
Yuda yo Tama (1-30)
38 Muna kolo kiokio, Yuda osisidi e mpangi zandi, wele simika e saba kiandi lukufi yo Kira, wa musi Adulami.
2 I kûna o Yuda kamwenene mwan’ankento a Sua wa musi Kenani.+ Umbongele se nkaz’andi, ovukanene yandi,
3 o nkento oyimiti. I bosi, owutidi mwan’ayakala, umven’e nkumbu vo Ere.+
4 Oyimiti diaka yo wuta mwan’ayakala, umven’e nkumbu vo Onane.
5 Oyimiti diaka, owutidi mwan’ayakala, umven’e nkumbu vo Sela. Oyandi* kuna Akezibe+ kakala vava Sela kawutuka.
6 Kuna kwalanda, Yuda obongèle Ere wa mwan’andi antete o nkento, e nkumbu andi Tama.+
7 Kansi, o Ere wa mwan’antete a Yuda kayangidika Yave ko; muna diadi, Yave wamvonda.
8 Yuda ovovese Onane vo: “Vukana yo nkaz’a mpangi aku, vanga yandi longo lwa kinkwezi, wawutila mpangi aku o wana.”+
9 Kansi, Onane wazaya wo vo wana kadi wuta yo Tama ke badi yikilwa wan’andi ko.+ Muna kuma kiaki, vava kavukananga yo nkaz’a mpangi andi, Onane wayitilanga malume mandi vana ntoto kimana kalembi wutila mpangi andi o wana.+
10 Dina kavanga diambi vana meso ma Yave; muna diadi, wamvonda mpe.+
11 Yuda ovovese Tama wa mwan’andi a nzitu vo: “Zingila muna nzo a se diaku se nkento ansona yavana o Sela wa mwan’ame kekola,” kadi ovovele muna ntim’andi vo: ‘Oyandi mpe olenda fwa nze ampangi zandi.’+ Muna diadi, Tama wele zingila muna nzo a se diandi.
12 Kuna kwalanda, o nkaz’a Yuda, o mwan’ankento a Sua,+ ofwidi. Vava e lumbu ya kifwidi yafokoka, Yuda wele kuna Timena+ yo nkundi andi Kira wa musi Adulami,+ benda tala asaki a mika mia mameme mandi.
13 O Tama banzayisi vo: “O kô waku otombokele kuna Timena mu saka e mika mia mameme mandi.”
14 Muna diadi, ovudidi e mvuatu miandi mia kifwidi, uyifukidi e fukwa vana lose yo kuyizinga o nlele, ofongele kuna fula dia Enaime, muna nzil’a Timena, kadi omwene vo Sela okolele kansi ke bamvene yandi ko kakala se nkaz’andi.+
15 Vava Yuda kamwene Tama, vana vau obenze vo nkembi,* wau kafukila e ndose andi.
16 Wele kwa yandi vana ndambu a nzila, umvovese vo: “Dodokolo, yambula yavukana yaku,” kadi ka zeye wo ko vo i mwan’andi a nzitu.+ Oyandi ovovele vo: “Nki okumpana muna vukana yame?”
17 Yuda ovutwidi vo: “Ikutwikila mwan’a nkombo a kambi diame.” Kansi, oyandi ovovele vo: “Nga okumpana nsimbi* yavana okuntumina yo?”
18 Yuda oyuvuidi vo: “Nkia nsimbi mfwete kuvana?” Ovutwidi vo: “Mpeto*+ aku, nsinga aku yo nkau wina ova koko kwaku.” Yuda umvene yo, i bosi ovukane yandi, oyimiti.
19 I bosi, o nkento otelamene wele kwandi, okatwidi o nlele andi, ovuete mvuatu miandi mia kifwidi.
20 Yuda otwikidi mwan’a nkombo vana koko kwa nkundi andi wa musi Adulami,+ kimana katambula e lekwa kavana kwa nkento se nsimbi, kansi kamwene ko.
21 Oyuvuidi wantu bezingilanga va fulu kiakina: “Akweyi kena o nkembi* a tempelo wavuendenge vana ndambu a nzila kuna fula dia Enaime?” Bamvutwidi vo: “Omwamu ke mukalanga nkembi a tempelo ko.”
22 I bosi, ovutukidi kwa Yuda yo vova vo: “Kimwene ko. Vana ntandu, o wantu bezingilanga va fulu kiakina bampovese vo: ‘Omwamu ke mukalanga nkembi* a tempelo ko.’”
23 Muna diadi, Yuda ovovele vo: “Yambula kasala yau, twalembi fusuka e nsoni avo tukwamanene kumvava. Omono ntwikidi mwan’a nkombo, kansi o nkento kumwene ko.”
24 Vava kiavioka ngonde tatu, Yuda bamvovese vo: “O Tama wa mwan’aku a nzitu wayikitwidi se nkembi,* owau nkutu wayimiti.” Yuda ovovele vo: “Numvaikisa ku mbazi kimana kayokwa.”+
25 Ekolo kevaikiswanga, otumini bazayisa o kô wandi vo: “O muntu ovuidi e lekwa yayi yandi wangimitisi.” Okudikidi mpe vo: “Dodokolo, toma tala kana nani ovuidi e mpeto yo nsinga yo nkau wau.”+
26 Vava Yuda katadidi yo, ovovele vo: “Olungidi kwandi, omono ngielele ngina yau, kadi kiamvene Sela wa mwan’ame ko.”+ Tuka kiakina, o Yuda kasidi vukana yandi diaka ko.
27 Vava e ntangw’a wuta yafwana, mapasa makala muna vumu kiandi.
28 Ekolo kawutanga, o mosi ovaikisi koko kwandi, vana vau o nwutisi obongele nsing’a mbwaki okangidi wo muna koko kwandi, ovovele vo: “I yandi wantete ovaikidi.”
29 Kansi, vava kavutwidi o koko kwandi muna vumu, vana vau o mpangi andi ovaikidi, o nwutisi ovovele vo: “Ekwe mpila uyitetele nzila!” Muna diadi, banyikidi vo Perese.*+
30 I bosi, mpangi andi ona wakangwa o nsing’a mbwaki muna koko ovaikidi, bamven’e nkumbu Zera.+
Mvovo vana yand'a lukaya
^ I sia vo, Yuda.
^ Yovo “nkento a ndumba.”
^ I sia vo, lekwa kisimbiswanga yavana muntu kefuta e mfuka.
^ Mpeto ina wantu basadilanga mu sia e dimbu muna nkanda.
^ Yovo “nkento a ndumba.”
^ Yovo “nkento a ndumba.”
^ Yovo “nkento a ndumba.”
^ Ina ye nsasa vo: “Mpasuka,” nanga mpasuk’a nitu a kinkento uyikanga.
