Tuku 48:1-22
48 Vava mambu mama maviokele, Yosefe banzayisi vo: “Tala, o se diaku oyelele.” Muna diadi, obongele wan’andi wole, Manase yo Eferaime wele yau kwa Yakobo.+
2 I bosi, bazayisi Yakobo vo: “O mwan’aku Yosefe wizidi kutala.” Yakobo* ovangidi e ngolo, ofongele vana mfulu andi.
3 Yakobo ovovese Yosefe vo:
“O Nzambi a Mpungu-ngolo wamoneka kwa mono kuna Luzi muna nsi ya Kenani yo kunsambula.+
4 Wampovesa vo: ‘Ikuvana wana yo kuwokesa, ikukitula se nkangu ayingi,+ ivana e nsi yayi se vua dia mvu ya mvu kwa mbongo ikulandila.’+
5 Owau, o wan’aku wole ana bawutukidi omu nsi ya Engipito vitila ngiza kwa ngeye omu nsi ya Engipito, wan’ame.+ Eferaime yo Manase wan’ame bekala, wauna o Rubeni yo Simeone benena se wan’ame.+
6 Vo i wana owuta kuna nim’au, i wan’aku. Muna nkumbu a mpangi zau i betambulwila e vua.+
7 Vo i mono, vava yayizanga tuka kuna Padani, o Rakele+ wafwila vana ndambu ame muna nsi ya Kenani, tini kiandá kiasala mu lwaka kuna Eferate.+ Muna kuma kiaki, yanzikila muna nzil’a Eferate, i sia vo, Beteleme.”+
8 I bosi, Isaele omwene wan’a Yosefe, oyuvuidi vo: “Akinani awaya?”
9 Yosefe ovutwidi kwa se diandi vo: “Awaya i wan’ame, ana kampene o Nzambi ova fulu kiaki.”+ Muna diadi o Isaele ovovele vo: “Dodokolo, untwasila yau kimana yabasambula.”+
10 O meso ma Isaele tombe makala mu kuma kia kinunu, katoma monanga diaka ko. Yosefe ubatwese vana ndambu andi, o Isaele ubafibidi yo kubabimbakana.
11 O Isaele ovovese Yosefe vo: “Kiayindulanga wo ko vo imona diaka e ndose aku,+ kansi Nzambi oyambwidi mpe vo yamona e mbongo aku.”
12 I bosi, Yosefe ubakatwidi vana makungunu ma Isaele, ovumbamene.
13 I bosi, Yosefe obakidi yau awole, Eferaime+ muna koko kwandi kwalunene kimana kakala kuna koko kwalumonso kwa Isaele, Manase+ muna koko kwandi kwalumonso kimana kakala kuna koko kwalunene kwa Isaele, ubanete vana ndambu andi.
14 Kansi, o Isaele olambwidi o koko kwandi kwalunene yo sia ko vana ntu a Eferaime, kana una vo yandi i nleke; osidi koko kwandi kwalumonso vana ntu a Manase. Ku lukanu kayambikidi o moko mu mpila yayi, kadi o Manase i mwan’antete.+
15 I bosi, osambwidi Yosefe yo vova vo:+
“O Nzambi aludi, ndiona mase mame Abarayama yo Isaki bakangalela vana ndose andi,+O Nzambi aludi ona okumvungulanga muna zingu kiame kiawonso yamu unu,+
16 Ndiona okumpuluzilanga muna mbasi muna mpasi zame zawonso,+ kasambula aleke.+Yambula e nkumbu ame ye nkumbu a mase mame Abarayama yo Isaki yayikilwa muna yau,Yambula bakituka se nkangu ayingi ova ntoto.”+
17 Vava Yosefe kamwene vo se diandi okwamanene sia koko kwandi kwalunene vana ntu a Eferaime, kayangalele dio ko; muna diadi, ovavidi katula koko kwa se diandi vana ntu a Eferaime kasia ko vana ntu a Manase.
18 Yosefe ovovele kwa se diandi vo: “Ke wau ko e tata, kadi o ndioyo i mwan’antete.+ Sia koko kwalunene vana ntu andi.”
19 Kansi, o se diandi katondele wo ko, okwamanene vova vo: “Nzeye wo e mwan’ame, nzeye wo. Oyandi mpe okituka se zula, nene mpe kekala. Kansi, o nleke andi okunsunda o nene,+ e mbongo andi iwokela yo kituka se zula yayingi.”+
20 O Isaele okwamanene kubasambula muna lumbu kiakina,+ ovovele vo:
“Yambula o nkangu a Isaele wayika e nkumbu zeno vava besambula yo vova vo:‘Yambula Nzambi kakìtula nze Eferaime ye nze Manase.’”
Muna mpila yayi, o Isaele wayikanga ntete Eferaime ke mu Manase ko.
21 I bosi, Isaele ovovese Yosefe vo: “Tala, lufwa lwame lufinamene,+ kansi o Nzambi okwamanana kala yeno, okunuvutula kuna nsi a mase meno.+
22 Vo i mono, ikudikidi tini kimosi kia nsi* lutila mpangi zaku, kina yakutumuna vana koko kwa Aneyamore muna nsosolo ame ye muna mfumba ame.”
