Tuku 6:1-22
6 Vava wantu bayantika wokela ova ntoto yo wuta wan’amakento,
2 o wan’a Nzambi aludi*+ bamwene vo wan’amakento a wantu miote.* Bayantikidi kubabonga se akento au, awonso ana basolele.
3 Muna kuma kiaki, Yave ovovele vo: “O mwand’ame ke uyambulwila mavangu ma wantu yakwele mvu ko,+ kadi asumuki kwau.* Muna kuma kiaki, e mvu miau mikala se 120.”+
4 Muna lumbu yayina ye kuna kwalanda, vakedi Anefili* ova ntoto. Muna kolo kiakina, wan’a Nzambi aludi bakwamanene vukana yo wan’amakento a wantu, babawutidi wana. Yau bakala se mabamba-ngolo kuna nz’ankulu, akwa tunda.
5 Muna diadi, Yave omwene vo bi wa wantu se wingi ova ntoto, kadi e ntima miau miazala yo bi e ntangwa zawonso.+
6 Yave omwene ntantu* mu kuma kia muntu kavanga ova ntoto, o ntim’andi ukendalele.*+
7 Muna kuma kiaki, Yave ovovele vo: “Fwasa ifwasa wantu ana yavanga ova ntoto, ifwasa wantu kumosi ye bulu ya vata, ma iyatatanga ye ma itilumukanga muna zulu, kadi mbwen’e ntantu* wau yabavanga.”
8 Kansi, Noa otondakene vana meso ma Yave.
9 Olwalu i lusansu lwa Noa.
Noa muntu ansongi kakala.+ Munkondwa-kuma vana vena wantu a tandu kiandi.* Noa wakangala yo Nzambi aludi.+
10 Kuna kwalanda, Noa owutidi wana tatu amakala, Seme, Kami yo Yafete.+
11 Kansi, o ntoto wafwasuka vana meso ma Nzambi aludi, wazala yo nsoki.
12 Nzambi otadidi ova ntoto, omwene vo ufwasukidi kikilu;+ mavangu ma wantu awonso* ova ntoto mambi kaka.+
13 I bosi, Nzambi ovovese Noa vo: “Mbakidi e nzengo za fukisa wantu awonso,* kadi o ntoto uzele yo nsoki mu kuma kiau. Muna kuma kiaki, ikubafwasa kumosi yo ntoto.+
14 Uyivangila nzaza* ya mabaya ma nti a ngofa.+ Tula yo masuku yo kusa yo dimbu+ muna kati y’oku mbazi.
15 I wau wuwu ovangila yo: E nzaza ifwete kala ye yinkoso* 300 muna lá, yinkoso 50 muna lambuka, yinkoso 30 muna zanguka.
16 Ovanga zianela mu kotesa ntemo* muna nzaza, kinkoso kimosi tuka muna nludi. Sia o mwelo a nzaza muna luvati,+ sia yo banga kiansi, banga kiazole ye banga kiatatu.
17 “Kadi omono, itwasa kizalu+ ova ntoto mu fwasa nitu zawonso zina ye fulumwinu kia moyo* oku nsi a zulu. Yawonso ina ova ntoto ifwasuka.+
18 Nsikidisi e kangu diame yo ngeye, kota muna nzaza, ongeye yo wan’aku yo nkaz’aku ye akazi a wan’aku.+
19 Kotesa muna nzaza e vangwa yamoyo ya mpila zawonso,+ yole-yole, koko yo nkento kimana bavuluka yaku;+
20 e vangwa itilumukanga mun’owu wa makanda mau, e bulu ya vata mun’owu wa makanda mau ye vangwa iyatatanga ova ntoto mun’owu wa makanda mau, yole muna konso kanda ikwiza kwa ngeye muna nzaza kimana bavuluzwa.+
21 Vo i ngeye, kutika yo lunda madia ma mpila zawonso,+ kimana ongeye ye bulu nuakala ye madia.”
22 Noa ovangidi mawonso kakanikinua kwa Nzambi. I una kikilu kavangidi.+
Mvovo vana yand'a lukaya
^ Yovo “ambote-mbote.”
^ Yovo “ambasi.”
^ Nanga, “kadi bevangilanga mambu muna kinitu.”
^ Dilenda kala vo, “Andangula,” i sia vo, ana bebwisanga akaka. Tala Nsas’a Mvovo, “Anefili.”
^ Mvovo wa sina: “uyibenze.”
^ Yovo “omwene mpasi mu ntima.”
^ Mvovo wa sina: “kadi ikibenze.”
^ Mvovo wa sina: “vana vena e mbandu andi.”
^ Mvovo wa sina: “nitu zawonso.”
^ Mvovo wa sina: “nitu zawonso.”
^ Mvovo wa sina: “nkela”; masuwa mampwena.
^ E kinkoso kimosi, centimetro 44,5. Tala Nku. B14. Owu wakala e nzaza: meta 134 muna lá, meta 22 muna lambuka, meta 13 muna zanguka.
^ Muna Kiyibere, tsóhar. Akaka bevovanga vo o mvovo wau zianela uyikanga. Kansi, akaka bevovanga vo nludi wayenzama un’o lá wa kinkoso kimosi uyikanga.
^ Yovo “mwand’a moyo.”
