Yeremiya 7:1-34
7 Ediadi i diambu dia Yave diayiza kwa Yeremiya, oku vo:
2 “Telama vana vitu dia nzo a Yave, samuna e nsangu ezi: ‘Nuwá diambu dia Yave, e yeno nkangu awonso a Yuda nukotelanga muna mavitu mama muna vumbamena Yave.
3 I wau wuwu kavovele o Yave a vu, wa Nzambi a Isaele: “Nusingika e nzila zeno ye mavangu meno, omono iyambula vo nuakwamanana va fulu kiaki.+
4 Ke nusie vuvu ko muna mambu ma luvunu yo vova vo: ‘Eyayi* i tempelo a Yave, i tempelo a Yave, i tempelo a Yave!’+
5 Kadi avo nusingikidi mvimba nzila zeno ye mavangu meno; avo nutatididi unsongi muna muntu yo nkwandi;+
6 avo ke nubangikidi anzenza ko yo wan’a nsona* ye akento bafwilwa akala;+ avo ke nubungwidi menga ma munkondwa-kuma ko ova fulu kiaki; ngatu landa nzambi zankaka muna kuyitwasila mpasi;+
7 ozevo, iyambula vo nuakwamanana zingila ova fulu kiaki, mwamu nsi yavana kwa mase meno yakwele mvu.”’”
8 “Kansi owau nusidi e vuvu muna mvovo mia luvunu,+ ke mikunutwasila nluta ko.
9 Nga nuyiya kweno,+ vonda, tá zumba, dia ndofi za luvunu,+ yoka yimenga* kwa Bale+ yo landa nzambi zina ke nuzeye ko,
10 i bosi nukwiza telama ova ndose ame mwamu nzo yayi iyikilwanga nkumbu ame yo vova vo: ‘Vuluzwa tuvuluzwa,’ kana una vo nuvanganga mambu mama mawonso mangemi?
11 Nga e nzo yayi iyikilwanga muna nkumbu ame ikitukidi se nzo a mivi vana meso meno?+ Nuzaya wo vo mono kibeni mbwene dio,” u kavovele o Yave.
12 “‘Ozevo, owau nuenda kuna fulu kiame kuna Silo,+ kuna yasia ntete nkumbu ame,+ nutala dina yavanga kwakuna mu kuma kia bi wa nkangu ame Isaele.+
13 Kansi oyeno nuakwamanana vanga mambu mama mawonso,’ u kavovele o Yave, ‘kanele vo nkumbu miayingi yanuvovesa,* kansi ke nuangwila ko.+ Yakwamanana kunubokela kansi ke nuavutula ko.+
14 I dianu vo, dina yavanga muna Silo,+ i diau ivanga e nzo yayi iyikilwanga e nkumbu ame,+ ina nubundanga e vuvu+ ye fulu kiaki yavana kwa yeno yo kwa mase meno.
15 Yinga ikunuyinga ova ndose ame, nze una yayingila mpangi zeno, wana awonso a Eferaime.’+
16 “Vo i ngeye, kusambi muna wete dia nkangu wau ko. Kutumbula kazu ko, yovo samba ngatu kundodokela muna wete diau,+ kadi kikuwa ko.+
17 Nga kumwene ko mana bevanganga muna mbanza za Yuda ye muna nzila za Yerusaleme?
18 O wana betiamanga e nkuni, o mase belunganga o tiya, akento beniemanga e mbumba muna vanga mbolo za tukau kwa Ntinu Ankento a Zulu,*+ yo yitila tukau twa ndua kwa nzambi zankaka muna kunkendeleka.+
19 ‘Nga mono betwasila mpasi e?’* U kavovele o Yave. ‘Nga ke kwa yau kibeni ko, muna nsoni zau e?’+
20 Muna kuma kiaki, i wau wuwu kavovele o Mfumu Yave: ‘O makasi ye nsita zame ziyitilwa ova fulu kiaki,+ muna wantu, muna bulu, muna nti mia mpatu ye muna mbongo a ntoto; lema melema, ke mezima ko.’+
21 “I wau wuwu kavovele o Yave a vu, wa Nzambi a Isaele: ‘Nuenda kuna ntwala, nukutika yimenga yeno yangioka ye yimenga yankaka, yeno kibeni nudia e mbizi.+
22 Kadi muna lumbu yavaikisa mase meno kuna nsi ya Engipito, kiabavovesa ko, ngatu kubavana nkanikinu mu kuma kia tukau twawonso twangioka ye yimenga.+
23 Kansi nkanikinu owu yabavana: “Nuwila e nding’ame, omono ikala Nzambi eno, oyeno nukala se nkangu ame.+ Nudiatila kaka muna nzila zina yanukanikina, kimana nuakala kiambote.”’+
24 Oyau ke bawa ko ngatu tamba o matu;+ badiatidi kaka muna makani mau, balende ntima miau miambi,+ bavutukidi manima, ke bele kuntwala ko,
25 tuka muna lumbu kina mase meno bavaika muna Engipito yamu unu kiaki.+ Muna kuma kiaki, inutumini ntaudi zame zawonso angunza; yabatumanga lumbu ke lumbu, ntangwa ke ntangwa.*+
26 Kansi ke bangwididi ko, ke batambidi matu mau ko.+ Babadisi e ntima miau,* basundidi mase mau muna vanga e mbi!
27 “Okubavovesa mvovo miami miawonso,+ oyau ke bekuwila ko; okubabokela, kansi oyau ke bekuvutula ko.
28 Okubavovesa vo: ‘E kiaki i zula ke kilemvokele nding’a Yave wa Nzambi au ko ngatu wá longi diandi. E kwikizi kiavila, ke kiyikwanga diaka ko vana bena.’*+
29 “Kwempa* nsuki zaku,* waveta zo, bonga mbembo* muna kundubulu, kadi Yave obembwele yo yambula mbandu yayi imfungisi makasi.
30 ‘Kadi nkangu a Yuda uvangidi diambu diambi ova meso mame,’ u kavovele o Yave. ‘Batongekele teke yau yangemi muna nzo iyikilwanga nkumbu ame, kimana basafula yo.+
31 Batungidi mabata ma Tofete, eyi ina vana Ndimb’a Mwan’a Inomi*+ kimana bayoka vana tiya wan’au amakala ye amakento,+ e diambu diadi kiabakanikina dio ko, ngatu kala nkutu muna ntim’ame.*+
32 “‘Muna kuma kiaki, e lumbu ikwiza,’ u kavovele o Yave, ‘e fulu kiaki ke kiyikilwa diaka ko vo Tofete yovo Ndimb’a Mwan’a Inomi,* kansi kiyikilwa vo Ndimb’a Mponda. Bezika mavimbu muna Tofete yavana ke vekala diaka fulu ko.+
33 O mavimbu ma nkangu wau mekala se madia ma nuni za zulu ye bulu ya ntoto, ke vekala muntu ko okubayinga.+
34 Sukisa isukisa e zú dia nkembo ye zú dia kiese, e zú dia toko diansompi ye zú dia ndumb’ansompi+ muna mbanza za Yuda ye bala-bala za Yerusaleme, kadi e nsi ikituka se mazumbu.’”+
Mvovo vana yand'a lukaya
^ Mvovo wa sina: “Emama,” i sia vo, mavula mawonso kuna lûmbu lwa tempelo.
^ Yovo “minkondwa mase.”
^ Yovo “ndumbu.”
^ Mvovo wa sina: “yabundumukanga muna mene-mene yo vova.”
^ Nkumbu a nzambi ankento wasambilwanga kwa Aneyisaele ana bavengomoka, nanga nzambi a mawuta.
^ Yovo “bekendeleka; befungisa makasi.”
^ Mvovo wa sina: “E lumbu yawonso yabundumukanga muna mene-mene yo kubatuma.”
^ Mvovo wa sina: “babadisi nsingu.”
^ Mvovo wa sina: “kiakendoka muna nua miau.”
^ Yovo “Kwenza.”
^ Yovo “Nsuki zaku zavaulwa.”
^ Yovo “nkung’a mafwa.”
^ Tala Nsas’a Mvovo, “Ngeena.”
^ Yovo “ke disidi kala mu ngindu zame ko.”
^ Tala Nsas’a Mvovo, “Ngeena.”
