Yesaya 29:1-24
29 “Nkenda kwa Ariele,* Ariele, e mbanza ina Davidi kasia e ndo!+
Nukwamanana mvu ke mvu;Yambula e nkinzi miaku+ miakwamanana.
2 Kansi, omono itwasa mpasi kwa Ariele,+Vekala ye dilu ye maniongo,+Oyandi okituka kwa mono nga fulu kia lemesena tiya vana ziku dia Nzambi.+
3 Isikidisa e ndo muna kinzieta kiaku kiawonso muna kunuanisa,Ikuzungila lûmbu lwa nti miasongokaItelamesa nkaku miangolo e kinzieta muna kunuanisa.+
4 Ongeye okululwa;Ovova tuka vana ntoto,E mvovo miaku ke mitoma wakana ko mu kuma kia mbundukutu.
E ndinga aku ituka muna ntoto+Nga nding’a nganga matombola,Muna mbundukutu mutuka e mvovo miaku miawuninina.
5 O ulolo wa mbeni* zaku ukala nga mbundukutu,+O ulolo wa abangiki ukala nga vevele ineto kwa tembwa.+
Ediadi vana vau divangama, kuna kinsalukisa.+
6 Yave a vu osia e sungididi kiandi omu ngeye yo kutaninaMuna mwandazi, nzakamu a ntoto, mazu mangolo,Muna kimbongela, tembwa kiangolo yo nlaku a tiya twambomoni.”+
7 Ozevo, o ulolo wa nkangu wa zula yawonso inuananga e vita ye Ariele+—Awonso ana bekunuanisanga e vita,Yo tunga nzo zandá za vita muna kunuanisa,Ye awana bekuntwasilanga e mpasi—Bekituka nga ndozi, nga mona-meso kia fuku.
8 Elo, dikala nze muntu una mu nzala olotele ndozi vo mu dia kena,Kansi osikamene ye nzala,*Dikala nze muntu una ye vuina olotele ndozi vo mu nua kena,Kansi osikamene wayoya ye vuina.*
I diau divangama kwa ulolo wa nkangu a zula yawonsoAna benuananga e vita yo Mongo a Zione.+
9 Nusivika yo yituka;+Nuyivonda o meso yo kala se mpofo.+
Mu nkolwa bena, kansi ke ya vinyu ko;Mu sansala bena, kansi ke mu kuma kia malavu mankolwa ko.
10 Kadi Yave opongwele mwand’a wosola kia tulu muna yeno;+Ozimini meso meno, angunza,+Ofukidi e ntu mieno, amoni a mona-meso.+
11 Kuna kwa yeno, e mona-meso yawonso ikitukidi nga mvovo mia nkanda wasiwa e dimbu.+ Avo bavene wo kwa muntu ona ozeye tanga yo kumvovesa vo: “Dodokolo, tanga o nkanda wau mu nding’angolo,” oyandi ovutula vo: “Kilendi ko, kadi wasiwa e dimbu.”
12 Avo bavene o nkanda kwa muntu kazeye tanga ko yo kumvovesa vo: “Dodokolo, tanga wo,” oyandi ovutula vo: “Kizeye tanga ko.”
13 Yave ovovele vo: “O nkangu wau mu nua kaka bekumfinamenangaYe mu befo kaka bekunzitisilanga,+Kansi e ntima miau miavavuka yo mono;O vumi bekunsonganga mu nkanikinu mia wantu utukanga, mina balongwa.+
14 Muna kuma kiaki, omono ivanga diaka mambu masivi kwa nkangu wau,+Diambu diasivi vana ntandu a diambu diasivi;E ngangu za akwa ngangu zivila,O umbakuzi wa akwa umbakuzi uswekama.”+
15 Nkenda kwa awana bevanganga mawonso muna sweka makani* mau kwa Yave.+
Mavangu mau va fulu kia tombe mevangilwanga,Ekolo bevovanga vo: “Nani utumwene?
Nani ozeye dina tuvangidi e?”+
16 Ekwe mpila nubendomwenanga o mambu!*
Nga o nwumbi ofwete badikilwa vo wafwanana ye tûma?+
Nga kina kiavangwa kilenda vova mu kuma kia mvangi andi vo:
“Oyandi kampanga ko”?+
Nga kina kiwumbilu kivova mu kuma kia nwumbi andi vo:
“Oyandi kazeye kwandi diambu ko”?+
17 Kolo kiakete kaka kisidi, e Lebanone ikituka se mpatu a nti miyimanga e bundu,+E mpatu a nti miyimanga e bundu ibadikilwa se mfinda.+
18 Muna lumbu kiakina, afwa matu bewá e mvovo mia nkanda,O meso ma mpofo memona wau vo ke vekala diaka tombe ko ye tombe kina e bu.+
19 Alembami beyangalala kwayingi muna Yave,Asukami bemona e kiese muna Mvauki a Isaele.+
20 Kadi o mbangiki ke kala diaka ko,O nkwa luvezo ofukiswa,Awonso ana bekubamanga mu vanga e mbi befwaswa,+
21 Awana besadilanga mvovo mialuvunu mu vana e ngielele kwa akaka,Awana belekanga ntambu kwa awana betaninanga* akaka vana vitu dia mbanza,+Ye awana besadilanga mvovo miakondwa o mfunu mu lembi vana e ndungidi kwa nsongi.+
22 Ozevo, Yave ona wakûla Abarayama,+ i wau wuwu kavovele kwa nzo a Yakobo:
“Yakobo ke fusulwiswa diaka nsoni ko,E ndose andi ke ikala diaka yasêboka ko.*+
23 Kadi vava kemonanga wan’andi,Ana bena vo i salu kia moko mame, vana kati kwandi,+Oyau bezitisa e nkumbu ame;Elo, oyau bezitisa o Mvauki a Yakobo,Ye bevumina Nzambi a Isaele.+
24 Awana bena vo akolami muna mwanda bevua umbakuzi,Awana beyidimanga, betambulwila e longi.”
Mvovo vana yand'a lukaya
^ Dilenda kala vo, “fulu kia lemesena tiya vana ziku dia Nzambi,” Yerusaleme uyikanga.
^ Mvovo wa sina: “nzenza.”
^ Yovo “osikamene ye moyo ankatu.”
^ Yovo “ye moyo andi una ye vuina.”
^ Yovo “malongi.”
^ Yovo “Oyeno nu wantu ambi kikilu!”
^ Mvovo wa sina: “betumbanga.”
^ I sia vo, mu kuma kia nsoni yo lukendalalu.
