Yezekele 21:1-32
21 E diambu dia Yave dizidi diaka kwa mono, oku vo:
2 “E mwan’a muntu, tadisa e ndose aku kuna Yerusaleme, samuna mu kuma kia fulu yavauka, sakula mu kuma kia nsi a Isaele.
3 Zayisa kwa nsi a Isaele vo: ‘I wau wuwu kavovele o Yave: “Isidi e kitantu, ivola o nsosolo ame muna kutu,+ ifwasa o muntu ansongi yo muntu ambi ova kati kwaku.
4 Wau vo ifwasa o muntu ansongi yo muntu ambi ova kati kwaku, ivola o nsosolo ame muna kutu mu kuma kia wantu awonso,* tuka kuna sude yakuna node.
5 Wantu awonso bezaya wo vo mono kibeni Yave mvolele o nsosolo ame muna kutu. Ke uvutuka diaka ko.”’+
6 “Vo i ngeye, e mwan’a muntu, vumuka ekolo ozakamanga,* elo, vumuka e mvumuk’a lukendalalu vana ntadisi au.+
7 Avo bekuyuvula vo: ‘Ekuma ovumukinanga?’ Vutula vo: ‘Mu kuma kia nsangu.’ Kadi kwiza kikilu zikwiza, e ntima miawonso mizeloka yo wonga, o moko mawonso mezebalala, e ngindu zawonso zitokana, o makungunu mawonso mesonsa o maza.*+ ‘Tala! Kwiza kikilu zikwiza—vangama divangama,’ u kavovele o Mfumu Yave.”
8 E diambu dia Yave dizidi diaka kwa mono, oku vo:
9 “E mwan’a muntu, sakula yo vova vo: ‘I wau wuwu kavovele o Yave: “Vova vo: ‘O nsosolo! O nsosolo+ usekeso yo lengolwa.
10 Usekeso mu vonda ulolo wa wantu; ulengelo wakezima nga nsemo.’”’”
“Nga ke tuna ye kuma kia yangalala ko e?”
“‘Nga o nsosolo* ubembola e mvuala ya mwana ame,+ wauna ubembolelanga e nti miawonso e?
11 “‘Uveno kimana walengolwa yo sadilwa. O nsosolo wau usekeso yo lengolwa, kimana wasiwa vana koko kwa mvondi.+
12 “‘Kaza yo nionga,+ e mwan’a muntu, kadi o nsosolo ulwakidi o nkangu ame; ulwakidi e mfumu zawonso za Isaele.+ Oyau befwila muna nsosolo kumosi yo nkangu ame. Dianu vo, wanda e sina diaku dia kulu mu kuma kia nkenda.
13 Kadi lufimpu luvangamene,+ adieyi divangama avo nsosolo ubembwele mvuala? E mvuala ke ikala diaka ko,’+ u kavovele o Mfumu Yave.
14 “Vo i ngeye, e mwan’a muntu, sakula yo sika makonzo,* yika nkumbu tatu vo: ‘Nsosolo!’ I nsosolo uvondanga, nsosolo wa vondela ulolo wa wantu, una ubazungidi.+
15 E ntima miau mizeloka yo wonga,+ ayingi bebwa muna mavitu ma mbanza; ivondesa ulolo wa wantu muna nsosolo. Elo, ukezimanga nga nsemo, ulengelo mu vonda!
16 E nsosolo, zengela kuna lunene! Wandila kuna lumonso! Wenda konso kuna otadisu!
17 Isika mpe makonzo yo yukutisa e nsita zame.+ Mono Yave mpovele wo.”
18 E diambu dia Yave dizidi diaka kwa mono, oku vo:
19 “Vo i ngeye, e mwan’a muntu, vanga nzila zole ziviokela o nsosolo a ntinu a Babele. E nzila zau zole mu nsi mosi zituka, sia sinsu* vana mpambu a nzila zikwenda muna mbanza zau zole.
20 Ofwete songa e nzila ikwendela o nsosolo mu nuanisa e Raba+ ya Aneyamone, ye nzila ukwendela mu nuanisa e Yerusaleme+ yazungwa e yaka, muna Yuda.
21 Kadi o ntinu a Babele otelamene vana mpambu a nzila kata e ngombo, vana vavambanena e nzila zau zole. Onikwini e nzanza. Oyuvuidi e teke* yandi; ofimpidi e kimoyo.*
22 E ngombo vana koko kwandi kwalunene itadisi kuna Yerusaleme, kakubika masini ma wudila e yaka, kavana nswa mu kuma kia mponda, kaboka e kazu kia vita, kasia masini ma wudila e yaka vana mavitu, kabumbika e kundubulu yo tunga e yaka muna kinzieta.+
23 Kansi, dimoneka nze ngombo aluvunu vana meso ma awana* badia e ndofi kwa yau.+ Kansi, oyandi osungamen’e mbi au ye okubakanga.+
24 Ozevo, i wau wuwu kavovele o Mfumu Yave: ‘Muna senzeka mavangu meno mambi yo yambula vo masumu meno mamoneka muna mavangu meno mawonso, nuyambwidi vo e kuzuka dieno diasungamenua. Wau vo nusungameno, mu kingolo* nunatinua.’
25 “Kansi, e mfumu ambi a Isaele,+ olwele mput’a lufwa, e lumbu kiaku kifwene. Ifwen’e ntangwa tumbu kiaku kiansuka.
26 I wau wuwu kavovele o Mfumu Yave: ‘Katula e mpu a nlele, katula e kolowa.+ O mambu ke mekala diaka una makala ko.+ Tundidika ndiona osakalele,+ sakidika ndiona otundalele.+
27 Fwasa! Fwasa! Fwasa ifwasa kio! Ke kikala kia muntu ko yavana kelwaka ndiona una yo nswa,+ kwa yandi ivana kio.’+
28 “Vo i ngeye, e mwan’a muntu, sakula yo vova vo: ‘I wau wuwu kavovele o Mfumu Yave mu kuma kia Aneyamone ye mu kuma kia mafingu mau.’ Vova vo: ‘Nsosolo! Nsosolo uvolelo muna vonda; ulengelo mu vonda yo kezima nze nsemo.
29 Kana nkutu vo bamwene mona-meso yaluvunu yo tá e ngombo zaluvunu mu kuma kiaku, tensekwa otensekwa vana ntandu a mavimbu,* o mavimbu ma yimpumbulu ana bena vo e lumbu kiau kifwene, e ntangwa tumbu kiau kiansuka.
30 Vutula o nsosolo muna kutu kiandi. Ikufundisila vana fulu kina wasemenua, muna nsi ina watuka.
31 Ipongola makasi mame muna ngeye. Ikuvemonuena tiya twa makasi mame, ikuyekola vana moko ma akwa nsoki, akwa umbangu wa fwasa.+
32 Ongeye okituka se nkuni za lungila tiya;+ o menga maku mebungulwa muna nsi, kusungamenua diaka ko, kadi mono kibeni Yave mpovele wo.’”
Mvovo vana yand'a lukaya
^ Mvovo wa sina: “nitu zawonso.”
^ Mvovo wa sina: “luketo lwaku luzakamanga.”
^ I sia vo, mesonsa masuba mu kuma kia wonga.
^ I sia vo, nsosolo a Yave.
^ Muna songa makasi.
^ Mvovo wa sina: “koko.”
^ Mvovo wa sina: “zumbi.”
^ Yovo “e kati.”
^ I sia vo, awana bezingilanga muna Yerusaleme.
^ Mvovo wa sina: “mu koko.”
^ Mvovo wa sina: “vana nsingu za awana bavondelo.”
