Yezekele 26:1-21
26 Muna mvu una wa 11,* muna lumbu kiantete kia ngonde, e diambu dia Yave dizidi kwa mono, oku vo:
2 “E mwan’a muntu, wau vo e Turo isevele Yerusaleme muna vova vo:+ ‘Difwanukini! E vitu dia nkangu diwudilu!+ E lekwa yawonso kwa mono ikwiza, owau ikituka se mvuama wau vo ifwasilu’;
3 ozevo, i wau wuwu kavovele o Mfumu Yave: ‘E Turo, ngina yaku e kitantu, ikutwasila e zula yayingi yanuanisa, wauna o kalunga ketwasilanga mavuku.
4 E Turo, oyau bewula e yaka yaku yo bwisa e nzo zaku zandá.+ Vala ivala o ntoto yo kukitula se wankezimi, se tadi dialelama.
5 Okituka se fulu kia yanikina makonde vana kati kwa kalunga.’+
“‘Kadi mono mpovele wo,’ u kavovele o Mfumu Yave, ‘ongeye okituka se sanzu dia zula.
6 O mavata maku mena* muna nsi mefwasilwa* muna nsosolo, o wantu bezaya wo vo mono i Yave.’
7 “Kadi i wau wuwu kavovele o Mfumu Yave: ‘Owau itwasa Nebukandesa* wa Ntinu a Babele tuka kuna node, kanuanisa e Turo;+ oyandi i ntinu a mintinu,+ okwiza ye mvalu,+ makalu ma vita,+ akwa mvalu ye vu kia makesa mayingi.*
8 Ofwasa mavata maku mena muna nsi muna nsosolo, otunga e yaka muna kinzieta yo bumbika e kundubulu muna kunuanisa yo kuzangulwila e ngubu anene.
9 Obwisa e yaka yaku muna masini mandi ma wudila e yaka, obangula mayingidilu maku muna masoka mandi.*
10 E mbundukutu a ulolo wa mvalu miandi ikufuka, e yaka yaku izakama mu kuma kia mazu ma akwa mvalu, ma tungungu ye ma makalu ma vita, vava mekota muna mavitu maku, nze wantu bekotanga muna mbanza ina ye yaka ya mbamvu.
11 E kole ya mvalu miandi idiatila muna nzila zaku zawonso;+ vonda kevonda o nkangu aku muna nsosolo, malunzi maku mankuma mebwa vana ntoto.
12 Bekutumuna umvuama waku, besanza kinkita kiaku,+ bebwisa e yaka yaku yo bangula e nzo zaku zambote; i bosi o matadi yo mabaya yo ntoto a nzo zaku betuba wo muna maza.’
13 “‘Sukisa isukisa e zú dia nkunga miaku, e zú dia kokolo yaku ke diwakana diaka ko.+
14 Ikukitula se wankezimi, se tadi dialelama, okituka se fulu kia yanikina makonde.+ Kutungululwa diaka ko, kadi mono kibeni Yave mpovele wo,’ u kavovele o Mfumu Yave.
15 “‘I wau wuwu kavovele o Mfumu Yave kwa Turo: ‘Nga e sanga ke izakama ko mu kuma kia mazu ma mbwilu aku, vava awana belwala e mputa za mpondi bebuma, vava ulolo wa wantu befwa vovo wina?+
16 E mfumu zawonso za kalunga zikulumuka vana kunda yau ya kimfumu yo katula e yunga* yau yo vula e mvuatu miau miatoma vienga, bebakama kwa* zaka-zaka. Bevuanda vana ntoto, bekwamanana zakama yo kusivika.+
17 Bekubongela e mbembo*+ yo vova vo:
“Ekwe mpila ofwasukidi,+ ongeye wazingilwa kwa nkangu watuka muna kalunga, e mbanza ikembelelwanga;Ongeye yo nkangu aku akwa nkuma nuakala muna kalunga,+Nuazakamesanga o nkangu awonso ova ntoto!
18 E sanga izakama muna lumbu kina obwa,E sanga ina muna kalunga imona o wonga vava e mbaninu aku ilwaka.”’+
19 Kadi i wau wuwu kavovele o Mfumu Yave: ‘Vava ikusisa e nkatu nga mbanza zikondelo o wantu, vava ikutwasila o maza ma kizalu yo langwa kwa maza mayingi, +
20 ongeye ye awana bekulumukanga muna wulu* ikununata kuna kwina o wantu a nz’ankulu; iyambula vo wazingila vana fulu kisundidi o kuluka, nze i fulu yankulu ina yafwaswa, kumosi ye awana bekulumukanga muna wulu,+ kimana walembi zingilwa diaka. I bosi, ikembesa e nsi ya awana bena o moyo.
21 “‘Ikutwasila lufwasu kuna kinsalukisa, ongeye kukala diaka ko.+ Oyau bekuvava, kansi kusinga moneka diaka ko,’ u kavovele o Mfumu Yave.”
Mvovo vana yand'a lukaya
^ I sia vo, mvu wa kumi ye mosi wa kinkole kia Yoyakine wa Ntinu, Yezekele ye Ayuda ankaka. (Tala Yezekele 1:2).
^ Mvovo wa sina: “O wan’aku bena.”
^ Mvovo wa sina: “mevondelwa.”
^ Mvovo wa sina: “Nebukadrezare,” mpila yankaka yasonekena yo.
^ Mvovo wa sina: “nkangu ayingi.”
^ Yovo “nsosolo miandi.”
^ Yovo “kinkutu kiakondwa o moko.”
^ Mvovo wa sina: “bevuata e.”
^ Yovo “nkung’a mafwa.”
^ Mvovo wa sina: “ziami.”
