Zasoneka Yoane 20:1-31
20 Muna lumbu kiantete kia lumingu, Maria Mandala olweke vana ziami*+ muna mene-mene, una e tombe kiakinu, omwene e tadi diakatulwa vana ziami.+
2 Wele ntinu kwa Simone Petelo ye kwa nlongoki akaka, ona Yesu katoma zolanga,+ ubavovese vo: “Bakatwidi o Mfumu muna ziami,+ ke tuzeye ko kuna bansidi.”
3 O Petelo yo nlongoki akaka bele kuna ziami.
4 Yau wole bele kumosi e ntinu, kansi o nlongoki ankaka osundidi Petelo e ntinu, yandi wantete olweke kuna ziami.
5 Oyenzamene, okengelele, omwene mo nlele mia lino,+ kansi kakotele mo ko.
6 Simone Petelo mpe wizidi anlandi, okotele muna ziami. Omwene mo nlele mia lino.
7 O nlele una kazingwa muna ntu ke wakala vamosi ko ye nlele miankaka, kansi wazingama vana fulu kiankaka.
8 I bosi, o nlongoki ona wavita o lwaka kuna ziami, okotele mo mpe, omwene, okwikidi.
9 Kadi ke bayibakulwila e sono ko, eki kivovanga vo kafwete fuluka muna mafwa.+
10 Dianu vo, alongoki bavutukidi kwau muna nzo zau.
11 Kansi, Maria otelamene kaka kuna mbazi, vana mbel’a ziami, odilanga. Ekolo kedilanga, oyenzamene, okengelele muna ziami,
12 omwene mbasi zole+ bavuete nlele miampembe, bavuende vana vasiwa e vimbu dia Yesu, omosi kuna ntu, wankaka kuna malu.
13 Bamvovese vo: “E nkento, ekuma odidilanga?” Ubavutwidi vo: “Bakatwidi o Mfumu ame, kizeye ko kana akweyi bansidi.”
14 Vava kavovele wo, ovilukidi, omwene Yesu watelama, kansi kabakwidi ko vo i Yesu ndioyo.+
15 Yesu umvovese vo: “E nkento, ekuma odidilanga? Nani ovavanga?” Wau kabenze vo mvati a nsengo, umvutwidi vo: “E Mfumu, avo ngeye umbongele unzayisa kuna unsidi, ngienda kunkatula.”
16 Yesu umvovese vo: “E Maria!” Vava kavilukidi, umvovese muna Kiyibere vo: “Raboni!” (i sia vo, “Nlongi!”)
17 Yesu umvovese vo: “Yambula kunsimba, kadi kiatombokele ntete kwa Se ko. Kansi wenda kwa mpangi zame,+ ubavovesa vo: ‘Kwa Se diame itomboka,+ i Se dieno mpe, Nzambi ame+ ye Nzambi eno mpe.’”
18 Maria Mandala wele samuna e nsangu kw’alongoki vo: “Mbwene o Mfumu!” Ubasamunuini mpe mana kamvovese.+
19 Vava o kuma kwayantika bwita, muna lumbu kiantete kia lumingu, alongoki bakutakene vamosi, e yelo yazikama yakala mu kuma kia wonga wa Ayuda, Yesu wizidi, otelamene vana kati kwau, ubavovese vo: “Yambula luvuvamu lwakala yeno.”+
20 Vava kavovele wo, ubasongele moko yo luvati lwandi.+ Alongoki bamwene kiese wau bamwene o Mfumu.+
21 Yesu ubavovese diaka vo: “Yambula luvuvamu lwakala yeno.+ Wauna o Se kantumina,+ omono mpe inutumini.”+
22 Vava kavovele ediadi, ubavumunuini, ubavovese vo: “Nutambula o mwand’avelela.+
23 Konso ona nuloloka masumu, Nzambi okunloloka; konso ona nulembi loloka masumu, Nzambi ke kunloloka ko.”
24 Kansi, o Toma,+ mosi muna alongoki Kumi ye Zole, ona wayikilwanga vo Dipasa, kakala yau ko vava Yesu kayiza.
25 Alongoki ankaka bamvovese vo: “Tumwene o Mfumu!” Kansi ubavovese vo: “Avo kimwene dimbu ya nsonso ko muna moko mandi yo sia nlembo miame muna dimbu ya nsonso yo sia nlembo miame muna luvati lwandi,+ kikwikila nkutu ko.”
26 Vava kiavioka lumbu nana, alongoki andi bakutakene diaka muna nzo yo zika e yelo, o Toma wakala yau. Kana una vo e yelo yazikama, Yesu wizidi, otelamene vana kati kwau, ovovele vo: “Yambula luvuvamu lwakala yeno.”+
27 I bosi, ovovese Toma vo: “Sia nlembo aku ovava, tala moko mame, lambula koko kwaku wasimba luvati lwame, yambula katikisa, kwikila.”
28 O Toma umvutwidi vo: “E Mfumu ame, e Nzambi ame!”
29 Yesu umvovese vo: “Okwikidi wau umbwene. Akwa kiese awana ke bamwene ko, kansi bakwikidi.”
30 Kieleka, Yesu sinsu yayingi mpe kavanga vana vena alongoki, ina ke isonamene muna nkanda wau ko.+
31 Kansi, eyayi isonamene kimana nuakwikila vo Yesu i Kristu wa Mwan’a Nzambi, wau nukwikilanga, nuavuila o moyo muna nkumbu andi.+
Mvovo vana yand'a lukaya
^ Mvovo wa sina: “ziami kia luyindulu.”
