Zasoneka Yoane 6:1-71
6 I bosi, Yesu wele kuna simu dia Mbu a Ngalili yovo Tiberia.+
2 Ndong’ayingi inlende,+ wau bamwene masivi kavangidingi muna wuka e mbevo.+
3 Yesu otombokele kuna mongo, ovuende ko ye alongoki andi.
4 E Nduta,+ i sia vo nkinzi wa Ayuda, ifinamene.
5 Yesu osengwele meso, omwene ndong’ayingi ikwizanga kwa yandi, ovovese Filipo vo: “Akweyi tusumbila e mbolo bedia o wantu awaya?”+
6 Kansi, ovovele diambu diadi muna kuntonta, kadi wazaya dina kevanga.
7 Filipo umvutwidi vo: “E mbolo za 200 za denali* ke zikubafwana ko kimana konso muntu kabaka fiakete.”
8 Mosi muna alongoki andi, Andere wa mpangi a Simone Petelo, umvovese vo:
9 “Kindende kimosi kina vava, una ye mbolo tanu ye nzonzi zakete. Kansi, ekiaki nki ova vena e ndonga yayi?”+
10 Yesu ovovele vo: “Nuvuandisa o wantu.” Vakedi titi yayingi vana fulu kiakina, akala bavuende vo, tezo kia 5.000.+
11 Yesu obongele mbolo, vava katondele, okayidi zo kw’awana bavuende; ovangidi mpe diau dimosi ye nzonzi zakete, badidi mu tezo kina bazolele.
12 Vava bayukwiti, ovovese alongoki andi vo: “Nukutika nkesona zisuvidi, valembi vetwa lekwa.”
13 Bakutikidi nkesona zina zisuvidi muna mbolo zau zitanu badidi, bazadisi yitunga 12.
14 O wantu vava bamwene e sinsu yina kavangidi, bayantikidi vova vo: “Kieleka, yandi i Ngunza ona okwiza ova nza.”+
15 Yesu wau kazeye wo vo bekwiza muna kumbaka kimana bantumbika se ntinu, okatukidi vo,+ wele diaka kuna mongo yandi mosi kaka.+
16 Muna nkokela, alongoki andi bakulumukini kuna mbu,+
17 bakotele muna nzaza, kimana basauka kuna simu dia mbu, kuna Kafanau. Vava o kuma kufwidi, Yesu kakilwakidi ko kuna bena.+
18 O mbu unikukini mu kuma kia tembwa kiangolo kivevomokene.+
19 Vava balweke tezo kia kilometa tanu yovo sambanu* muna mbu, bamwene Yesu odiatilanga vana ntandu a mbu yo finama e nzaza; bamwene o wonga.
20 Kansi, ubavovese vo: “I mono; ke numoni wonga ko!”+
21 Muna kuma kiaki, bazolele kunkotesa muna nzaza, vana vau e nzaza ilweke kuna nsi ina bakanini o kwenda.+
22 Muna lumbu kialanda, e ndonga yasala kuna simu diankaka dia mbu imwene vo ke vakedi nzaza yankaka ko, ina yakete kaka, Yesu kakotele mu nzaza kumosi ye alongoki andi ko, kansi alongoki andi yau kaka bayele.
23 E nzaza za akwa Tiberia zizidi finama vana fulu kina badila e mbolo vava o Mfumu katonda.
24 Vava e ndonga imwene vo Yesu kena vo ko ngatu alongoki andi, oyau mpe bakotele muna nzaza zau, bele kuna Kafanau mu vava Yesu.
25 Vava bansolwele vana simu dia mbu, bamvovese vo: “E Rabi,+ nkia ntangwa olweke kwaku?”
26 Yesu ubavutwidi vo: “Kieleka, kieleka, inuvovese vo, numpavidi ke mu kuma kia sinsu ko nuamwene, kansi mu kuma kia mbolo nuadidi yo yukuta.+
27 Nusala, ke mu kuma kia madia mekuyifwila ko, kansi mu kuma kia madia mezingila yamuna moyo a mvu ya mvu,+ mana o Mwan’a muntu kekunuvana; kadi i yandi wasiwa e dimbu kia luyangalalu kwa Se, wa Nzambi.”+
28 Bamvovese vo: “Adieyi tufwete vanga muna lungisa mana Nzambi kevavanga?”
29 Yesu ubavutwidi vo: “Idiau diadi kevavanga Nzambi, nukwikila muna ndiona katuma.”+
30 Bamvovese vo: “Nkia sinsu+ ovanga kimana twamona yo kwikila muna ngeye? Nkia salu osala?
31 O mase meto badia e mâna muna makanga,+ wauna wasonama vo: ‘Madia* matuka kuna zulu kabavana badia.’”+
32 Yesu ubavovese vo: “Kieleka, kieleka, inuvovese vo, Mose kanuvana madia* matuka kuna zulu ko, kansi o Se diame wanuvana madia maludi matuka kuna zulu.
33 Kadi e madia* matuka kwa Nzambi i ndiona okulumukini kuna zulu, kavana e nza o moyo.”
34 Bamvovese vo: “E Mfumu, utuvananga madia* mama lumbu yawonso.”
35 Yesu ubavovese vo: “Mono i madia ma* moyo. Ndiona okwiza kwa mono, kefwa nkutu nzala ko, ndiona okwikila omu mono ke mona nkutu vuina ko.+
36 Wauna inuvovese vo, numbwene kansi yeno ke nukwikila.+
37 Awonso ana o Se diame kampene, kwa mono bekwiza, ndiona okwiza kwa mono, kikunyinga nkutu ko;+
38 kadi nkulumukini kuna zulu,+ ke mu vanga luzolo lwame ko, kansi lwa ndiona wantuma kaka.+
39 I lwau lwalu o luzolo lwa ndiona wantuma, yalembi vidisa kana mosi muna awonso kampana, kansi se yabafutumuna+ muna lumbu kia mbaninu.
40 Kadi i lwau lwalu o luzolo lwa Se diame, konso ona otambulwila o Mwana yo songa lukwikilu muna yandi, moyo a mvu ya mvu kevua,+ mono ikumfutumuna+ muna lumbu kia mbaninu.”
41 I bosi Ayuda bayantikidi kunyidimina, wau kavovele vo: “Mono i madia* makulumuka kuna zulu.”+
42 Bavovele vo: “Ndioyo, ke yandi ko i Yesu wa mwan’a Yosefe? O se diandi yo ngudi andi tubazeye.+ Aweyi kavovele vo: ‘Kuna zulu nkulumukini’?”
43 Yesu ubavutwidi vo: “Nuyambula yidima.
44 Ke vena muntu ko olenda kwiza kwa mono, avo o Se, ona wantuma kantuntidi ko,+ omono ikumfula muna lumbu kia mbaninu.+
45 Angunza basoneka vo: ‘Yau awonso belongwa kwa Yave.’*+ Konso ona owanga malongi ma Se yo tambulwila mo, kwa mono kekwizanga.
46 Ke vena muntu ko wamona Se,+ nanga ndiona kaka watuka kwa Nzambi; i yandi wamona Se.+
47 Kieleka, kieleka, inuvovese vo, konso ona okwikilanga, una yo moyo a mvu ya mvu.+
48 “Omono i madia ma* moyo.+
49 Mase meno badia mâna muna makanga, kansi bafwa.+
50 Omama i madia* matukidi kuna zulu, konso muntu odia mo, ke fwa ko.
51 Omono i madia ma* moyo mana matukidi kuna zulu. Konso ona odia mo, ozinga yakwele mvu; o madia ivana i nitu ame kimana wantu a nza bavua o moyo.”+
52 I bosi Ayuda bayantikidi filana e mpaka, oku vo: “Muntu ndioyu, aweyi kalenda kutuvanina e nitu andi twadia?”
53 Yesu ubavovese vo: “Kieleka, kieleka, inuvovese vo, avo ke nudidi nitu a Mwan’a muntu ko yo nua menga mandi, ke nuna yo moyo omu yeno kibeni ko.+
54 Konso ona odia e nitu ame yo nua mpe menga mame, una yo moyo a mvu ya mvu, mono ikumfula+ muna lumbu kia mbaninu;
55 kadi e nitu ame i madia makieleka, o menga mame i malavu makieleka.
56 Konso ona odia e nitu ame yo nua mpe menga mame, okalanga yame ntwadi, omono mpe ngina yandi e ntwadi.+
57 Wauna o Se ona wantuma kenena o moyo, omono muna Se ikadilanga o moyo, ndiona mpe odia nitu ame, omu mono kekadila o moyo.+
58 I mau mama o madia* makulumuka kuna zulu. Ke mau ko mase meno badia yo fwa. Konso ona odia madia mama, ozinga yakwele mvu.”+
59 I mambu mama kavovele muna sambilu, wau kalongelenge muna Kafanau.
60 Vava bawidi wo, ayingi muna alongoki andi bavovele vo: “E diambu diadi diampasi; nani olenda dio wá?”
61 Yesu wau kabakwidi vo alongoki andi bayidimini mu kuma kia diambu diadi, ubavovese vo: “Nga sakuba dinutesese?
62 Ozevo, adieyi nuvanga avo numwene Mwan’a muntu otombokanga kuna kateka kala?+
63 O mwanda i wau uvananga moyo;+ e nitu ke ina nkutu mfunu ko. E mambu mama inuvovese i mwanda yo moyo.+
64 Kansi ankaka muna yeno ke bakwikidi mo ko.” Kadi tuka kuna lubantiku Yesu wazaya awana ke bakwikilanga ko ye ndiona okunyekola.+
65 Ovovele mpe vo: “Kiaki i kuma inuvovesèle vo, kavena muntu ko olenda kwiza kwa mono, avo o Se kanyambwidi ko.”+
66 Muna kuma kiaki, ayingi muna alongoki andi bavutukìdi muna lekwa basisa,+ ke bakangalanga yandi diaka ko.
67 Dianu vo, Yesu ovovese kwa Kumi ye Zole vo: “Oyeno mpe nuzolele kwenda?”
68 Simone Petelo umvutwidi vo: “E Mfumu, kwa nani tukwenda?+ Mambu ma moyo a mvu ya mvu, nge una mau.+
69 Oyeto tukwikidi, tuzeye wo mpe vo ngeye u Mvauki a Nzambi.”+
70 Yesu ubavutwidi vo: “Ka yeno kumi ye zole ko yasola e?+ Kansi mosi vana kati kweno, nkumbi.”*+
71 I Yuda wa musi Kereote kayika, wa mwan’a Simone, kadi yandi okunyekola, kana una vo wakala mosi vana vena e Kumi ye Zole.+
Mvovo vana yand'a lukaya
^ Mvovo wa sina: “mbolo.”
^ Mvovo wa sina: “mbolo.”
^ Mvova wa sina: “mbolo.”
^ Mvovo wa sina: “mbolo.”
^ Mvovo wa sina: “mbolo a.”
^ Mvovo wa sina: “mbolo.”
^ Mvovo wa sina: “mbolo a.”
^ Mvovo wa sina: “mbolo.”
^ Mvovo wa sina: “mbolo a.”
^ Mvovo wa sina: “mbolo.”
^ Yovo “Nkadi ampemba.”
