Yosua 6:1-27
6 Yeriko yatoma bindikwa mu kuma kia Aneyisaele; ke vakala muntu ko wakotanga ngatu vaika.+
2 Yave ovovese Yosua vo: “Tala, ngiekwele Yeriko vana koko kwaku ye ntinu ye makesa mandi.+
3 Yeno makesa mawonso nuzieta e mbanza, nzieta mosi nuzieta yo. I wau wuwu nuvanga mu lumbu sambanu.
4 Kubika nganga nsambwadi zinata mpungi nsambwadi za mpoka za mameme bavita kuna ntwal’a Nkela. Kansi e lumbu kiansambwadi, nuzieta e mbanza nzieta nsambwadi, anganga basika e mpungi.+
5 Vava besika mpoka za mameme—oyeno avo nuwidi e zú dia mpungi—nkangu wawonso ufwete kaza e kazu kianene kia vita. Ozevo e yaka kia mbanza kibwa vana ntoto,+ o nkangu utomboka, konso muntu kuna katadidi.”
6 Yosua wa mwan’a Nuni okutakese anganga yo kubavovesa vo: “Nuzangula nkel’a kangu, nganga nsambwadi banata mpungi nsambwadi za mpoka za mameme bavita kuna ntwal’a Nkel’a Yave.”+
7 Ovovese nkangu vo: “Nuvioka, nuazieta e mbanza, makesa+ mavita kuna ntwal’a Nkel’a Yave.”
8 O Yosua vava kavovese nkangu, anganga nsambwadi asiki a mpungi nsambwadi za mpoka za mameme vana ndose a Yave, baviokele kuna ntwala yo sika e mpungi, e nkel’a kangu dia Yave ibalende.
9 Amakesa bavita kuna ntwal’anganga ana basikanga mpungi, ana bakala kunima balende e Nkela, ekolo mpungi zasikwanga lembi vuena.
10 Yosua okanikini nkangu vo: “Ke nukazi ko ngatu tumbula ndinga. Ke nuvaikisa diambu muna nua mieno ko, yamuna lumbu kina ikunuvovesa vo, ‘Nukaza!’ I bosi nukaza.”
11 Ozietese Nkel’a Yave muna mbanza, nzieta imosi. I bosi bavutukidi muna ndo, muna balele.
12 Muna lumbu kialanda, Yosua osikamene mu mene-mene, anganga bazangwidi Nkel’a+ Yave,
13 e nganga nsambwadi ana banatanga mpungi nsambwadi za mpoka za mameme bavitidi kuna ntwal’a Nkel’a Yave, bele asikinge e mpungi. O makesa mabavitidi kuna ntwala, ana bakala kunima balende e Nkel’a Yave, ekolo mpungi zasikwanga lembi vuena.
14 E lumbu kiazole bazietele mbanza nzieta mosi, i bosi bavutukidi muna ndo. I wau bavangidi mu lumbu sambanu.+
15 Vava kuma kwakia muna lumbu kiansambwadi, basikamene mu mene-mene yo zieta e mbanza, nzieta nsambwadi una bateka vanga. E lumbu kiakina i kiau kaka bazietele mbanza nzieta nsambwadi.+
16 Muna nzieta ina yansambwadi anganga basikidi mpungi, Yosua ovovese nkangu vo: “Nukaza+ kadi Yave unuvene e mbanza.
17 E mbanza ye yawonso ina mo ifwete fukiswa emvimba;+ yawonso ya Yave. Rakabi+ kaka wa nkembi* ovuluka ye awonso bena yandi muna nzo, kadi wasweka wantu ana twatuma.+
18 Oyeno nutoma kuyikenga muna yawonso ifukiswa,+ ke nulokokela lekwa kiakanua fukiswa ko yo bonga kio,+ yo kitula ndo a Isaele se lekwa kifukiswa, nuatwasila mo lubukumuku.+
19 Kansi e palata yawonso ye wolo ye salanganu ya nsongo ye ya sengwa, yavauka kwa Yave.+ Ifwete siwa muna lundilu dia Yave.”+
20 Una kisikilu mpungi,+ o nkangu ukazidi. Vava nkangu uwidi e zú dia mpungi, bakazidi e kazu kia vita, e yaka kia mbanza kibwidi vana ntoto.+ I bosi nkangu utombokele muna mbanza, konso muntu kuna katadidi, babakidi yo.
21 Bafwasidi muna nsosolo yawonso ikedi muna mbanza, akala, akento, aleke, ambuta ye ngombe yo mameme yo mabuluku.+
22 Yosua ovovese wantu wole ana balanga nsi vo: “Nukota muna nzo a nkembi,* nuvaikisa o nkento ye yawonso kena yau, nze una nuandila e ndofi.”+
23 Matoko m’alangi bakotele muna nzo, bavaikisi Rakabi yo se diandi, ngudi andi ye mpangi zandi ye yawonso kakedi yau; ozevo, bavaikisi e yitu yandi yawonso,+ babanete kuna mbazi a ndo a Isaele.
24 I bosi bayokele e mbanza ye yawonso yakala mo. Kansi, e palata, wolo ye salanganu ya nsongo ye ya sengwa, basidi yo muna lundilu dia nzo a Yave.+
25 Rakabi wa nkembi* ye nzo a se diandi ye yawonso kakedi yau kaka yavuluzwa kwa Yosua;+ Rakabi ozinganga muna Isaele yamu unu,+ kadi wasweka alangi ana Yosua katuma mu langa Yeriko.+
26 E ntangwa yayina, o Yosua odidi e ndofi* vo: “Wasibwa vana vena Yave o muntu otungulula e mbanza yayi ya Yeriko. Vava kesia e nkubilwa, mwan’andi antete ofwa, vava kesia mo mavitu,+ mwan’andi ansuka ofwa.”
27 Yave wakala yo Yosua,+ e tunda diandi diazayakana mu nza yawonso.+
Mvovo vana yand'a lukaya
^ Yovo “nkento a ndumba.”
^ Yovo “nkento a ndumba.”
^ Yovo “nkento a ndumba.”
^ Nanga, “wadisa ndofi yayi kwa nkangu.”
