Muna lukaya lwantete lwa nzil’eto muna internete, muna ye malongi ye video zikubikilu ye kani dia tunta e sungididi kia akwa luzolo lwambote muna salu kia umbangi. (Mav. 13:48) Nkumbu miayingi, e ntu mia mambu misiwanga mo, mivovelanga mambu mevaikiswanga muna nsangu yovo mambu mana o wantu bevovanga yo yindula.

Aweyi olenda sadila o lukaya lwantete lwa jw.org muna salu kia umbangi?

• Kotanga muna nzil’eto konso lumingu. Talanga o mambu mampa mavaikisu vana vasonama “Ziula Wazaya” yo vava zaya una olenda mo sadila muna sadisa muntu osongele luzolo lwambote. (Muna solola e mambu mampa masilu muna lukaya lwantete, bosa vana vasonama “Mayingi Diaka.”) O zaya mana mena muna nzil’eto, dikusadisa mu kala ye mambu maswaswana olenda sadila mu mokena ye wantu muna salu kia umbangi.

• Sadila e malongi ye video zina muna lukaya lwantete muna yantika e moko. E mambu mama mekutuvananga e ngindu mu kuma kia mana o wantu a zunga kieto beyindulanga.

• Songa o lukaya lwantete kwa wantu. Yika mambu masikididi yo songa kwa muntu una kalenda vavulwila muna nzil’eto.

• Twika e link. Wantu akaka ke bezolanga mokena yeto ko, kansi bezolanga tala mana mena muna nzil’eto muna internete. Muna kuma kiaki, kukadi ye lukatikisu ko lwa twikila muntu e link ya lukaya lwantete, longi yovo video imosi ina muna lukaya lwalu.