Muna zingu kiandi kiawonso, Samuele wasikila ye kwikizi muna Yave. Vava kakala nleke, kazola tanginina fu yambi ko ya wan’a Ele, i sia vo, Kofene yo Finekase. (1 Sam. 2:22-26) Samuele wakwamanana nungunuka, Yave wakala yandi. (1 Sam. 3:19) Kana nkutu muna kinunu kiandi wakwamanana sadila Yave ye kwikizi kiawonso, kanele vo wan’andi ke bavanga wo ko.—1 Sam. 8:1-5.

E mbandu a Samuele adieyi ikutulonganga? Avo u nleke, kala ye ziku vo Yave obakulanga e mpasi onuananga zau ye una omonanga. Olenda kusadisa mu kala yo unkabu. (Yes. 41:10, 13) Avo u se yovo ngudi una ye mwana wayambula sadila Yave, olenda fiaulwiswa mu zaya vo Samuele kakomekena wan’andi ko ana bakala vo se ambuta mu tatidila e nkanikinu mia nkal’ambote mia Yave. Kansi, wayambula mawonso vana moko ma Yave, wasikila ye kwikizi yo yangidika Yave wa Se diandi dia zulu. Dilenda kala vo e mbandu aku ambote ilenda fila o mwan’aku mu vutuka kwa Yave.

TALA E VIDEO, LONGOKA MUNA MBANDU AU—SAMUELE. I BOSI, VANA E MVUTU ZA YUVU ILENDE:

• Aweyi Samuele kasongela o unkabu ekolo kakala kindende?

• Aweyi o Danny kasongela o unkabu?

• Aweyi Samuele kasongela e mbandu ambote muna kinunu?

• Aweyi o mase ma Danny basongela e mbandu ambote?