E ntokani zasaka zilenda kutwasila mpasi za mayela yo lukendalalu. Zilenda kutwasila nkutu mpasi zisundidi zina oteka tokanenanga.

•  Kuluta sia sungididi ko muna nsangu zambi. Ke dina mfunu ko mu vava zaya mawonso mebwanga muna ntangw’a mpasi. Avo osidi e sungididi kiasaka muna nsangu zambi, e ntokani zaku ziwokela yo kufila mu dimbula e vuvu.

   Nkanikinu wa Bibila: “Mwand’a kosomoka, ngolo za muntu usukisanga.”—Ngana 17:22.

   “Diasazu mu kituka mbundu wa landa e nsangu zampa ye zambi, kansi e fu kiaki kiambi kikilu. E ntokani zame zakuluka vava yayambula landa nsangu zayingi.”—John.

   Yindula edi: Nkumbu nkwa ovavanga landa e nsangu zampa?

•  Kala ye nkubika zasikididi. Sikamanga mu ntangwa yambote, toma dianga, salanga e salu ya nzo yo leka mu ntangwa yambote. Okalanga ye nkubika zambote dikusadisa mu kala ye ngindu zavuvama yo kulula e ntokani.

   Nkanikinu wa Bibila: “E makani ma nkwa fululu nluta metwasanga.”—Ngana 21:5.

   “Vava vuku kia COVID-19 kiayantika, ke yakalanga diaka ye nkubika zambote ko. Ediadi diamfila mu viokesanga ntangwa yayingi muna nsaka. I bosi yabakula mfunu watoma sadilanga e ntangw’ame, muna diadi yavanga nkubika za salu yame ya lumbu ke lumbu.”—Joseph.

   Yindula edi: Nga e nkubika za salu yaku zikuyangidikanga kuna mfoko a konso lumbu?

•  Kala ye ngindu zasikila. O banzikila mambu mambi ye mpasi zilenda bwa, ntokani zaku kaka dikudikila. Vana fulu kiakalanga ye ngindu zazi, yindula mambu mole yovo matatu mana olenda vutulwila matondo.

   Nkanikinu wa Bibila: “Nuvutulanga matondo.”—Kolosai 3:15.

   “O tanga Bibila dikunsadisanga mu yambula sia sungididi muna nsangu zambi yo sia kaka e sungididi muna mambu mambote. Ediadi dilenda moneka vo diambu diakete kwandi, kansi ditoma kunsadisanga!”—Lisa.

   Yindula edi: Nga mambu mambi kaka mekubwilanga osianga e sungididi yo vilakana mambu mambote?

•  Yindula una lenda sadisila akaka. Avo okedi ye ntokani zasaka, diasazu dikala mu vava kala va fulu kia ngeye mosi kaka, ke mu yindula ko una olenda sadisila akaka.

   Nkaninkinu wa Bibila: “Ke nuvavingi kaka wete wa yeno kibeni ko, kansi wete dia akaka mpe.”—Filipi 2:4.

   “O vanga mambu muna wete dia akaka, kiese dikuntwasilanga. Avo mpangidi diambu diambote difila akaka mu kala ye kiese, vana vau omono mpe ikulula e ntokani zame. Vava ikuyivananga emvimba mu sadisa akaka, kikalanga diaka ye ntangwa ya tokana ko.”—Maria.

   Yindula edi: Vana vena wantu ana ozeye, aki nani bena ye nsatu zayingi? Adieyi olenda vanga muna kubasadisa?

•  Tatidila mavimpi maku. Kala ye fu kia nananga e nitu yo toma vunda. Dianga madia mavimpi. O toma lunga-lunganga mavimpi dilenda kusadisa mu kalanga ye vuvu yo kulula e ntokani zasaka.

   Nkanikinu wa Bibila: ‘O nana e nitu nluta ditwasanga.’—1 Timoteo 4:8.

   “Omono yo mwan’ayakala ke tulendanga vanga mambu mayingi ko mana tuzolele, muna diadi, o nana e nitu mu kati kwa nzo i diambu tuluta vanganga. Ediadi dikutusadisanga mu kalanga ye kiese yo songaziana e ngemba.”—Catherine.

   Yindula edi: Nga vena ye diambu ozolele tomesa muna diambu dia sola madia yo nana e nitu kimana wakala ye mavimpi mambote?

 Vana ntandu a sadila mambu mama muna kulula e ntokani, wantu bevuanga nluta mu longoka nsilu mia zingu kiambote kikala kuna sentu kesianga e Bibila. Tala e longi, “E Kintinu kia Nzambi Ameyi Kilungisa?”