Nga una ye vuvu kiasikila mu kuma kia kusentu? Wantu ayingi ngolo bevanganga mu kala ye ngindu zasikila kanele vo mu lumbu yampasi tuzingilanga. Kansi, nga tulenda kala ye vuvu vo mambu toma metoma? Ingeta. O Nkand’a Nzambi ukutuvananga e vuvu kiasikila mu kuma kia kusentu.

•  E Bibila nkia vuvu kivananga?

•  Nga dia uzowa mu kwikila muna vuvu tuvewanga muna Bibila?

•  E vuvu kiaki aweyi kilunganena?

•  Nkia ntangwa kilungana e vuvu kiaki?

•  E vuvu tuvewanga muna Bibila aweyi kilenda kutusadisila o unu?

 E Bibila kitoma vovelanga mambu mayingi mampasi bemonanga o wantu. Kansi, kisianga nsilu vo e mpasi zazi mana zimana. Tala yaka nona.

•   Diambu: Kondwa kwa nzo

   E Bibila kivovanga vo: “Betunga nzo yo zingila mo.”—Yesaya 65:21.

   Ediadi disongele vo kuna sentu: Wantu bezingila muna nzo za yau kibeni.

•   Diambu: Kondwa kwa Salu ye Umputu

   Bibila kivovanga vo: “Awana nsolele betoma yangalela e salu ya moko mau.”—Yesaya 65:22.

   Ediadi disongele vo kuna sentu: Wantu awonso bekala ye salu yambote yo vua nsendo muna salu yau.

•   Diambu: Kondwa kwa Unsongi

   Bibila kivovanga vo: “Akuluntu mpe beyadila muna unsongi.”—Yesaya 32:1.

   Ediadi disongele vo kuna sentu: Wantu awonso ke bemweswa diaka mpasi ko mu kuma kia se kia nitu, nswaswani za makanda, kondwa kwa nzimbu ye tezo kia sikola batanga. Wantu awonso bekadila kuna unsongi muntu yo nkwandi.

•   Diambu: Yunduka ye Nzala

   Bibila kivovanga vo: “Vekala ye ulolo wa masa ova ntoto; yamuna nsuka za miongo.”—Nkunga 72:16.

   Ediadi disongele vo kuna sentu: Wantu awonso bekala ye madia mafwana. Ke vekala muntu ko ofwa nzala ngatu yunduka mu kuma kia nzala.

•   Diambu: Nsoki ye umpumbulu

   Bibila Kivovanga vo: “Bevuanda, konso muntu kuna nsi a nsing’andi a vinyu ye kuna nsi a nsand’andi, ke vekala muntu ko okubamwesa wonga.”—Mika 4:4.

   Ediadi disongele vo kuna sentu: Wantu awonso mu lutaninu ye luvuvamu bekala, kadi wantu ambi befukiswa emvimba ye “ansongi bevua nza.”—Nkunga 37:10, 29.

•   Diambu: Vita

   Bibila kivovanga vo: “E zula ke kizangula nsosolo ko mu nuanisa zula kiankaka, ke belongoka diaka nuana vita ko.”—Yesaya 2:4.

   Ediadi disongele vo kuna sentu: Luvuvamu lukala mu nza yawonso. (Nkunga 72:7) Ke vekala diaka muntu ko odila mu kuma kia yitu yovo nkundi andi ovondelo muna vita, ngatu zingila nze muntayila a vita.

•   Diambu: Mayela

   Bibila kivovanga vo: “Ke mosi ko ovova vo: ‘Yayela ngina.’”—Yesaya 33:24.

   Ediadi disongele vo kuna sentu: Wantu ke bemona diaka mpasi ko mu kuma kia uvanguki, ngatu mu kuma kia mayela. (Yesaya 35:5, 6) E Bibila kisianga nkutu nsilu vo “o lufwa ke lukala diaka ko.”—Lusengomono 21:4.

•   Diambu: Safula e kalu kia wantu

   Bibila kivovanga vo: “O makanga ye nsi ayuma iyangalala, o nzanza umona e kiese yo mena e mvuma nze safoni.”—Yesaya 35:1.

   Ediadi disongele vo kuna sentu: E nza yawonso ikituka se paradiso kimana wantu bazingila vo nze una kakana o Nzambi kuna lubantiku.—Tuku 2:15; Yesaya 45:18.

 Ke diambi ko avo i wau oyindulanga. Kansi, tukasakese watoma fimpa mana Bibila kivovanga mu kuma kia kusentu. Ekuma? Kadi e nsilu mina mu Bibila miaswaswana ye nsilu besianga o wantu. E nsilu mina muna Bibila nsilu mia Nzambi. Tala e kuma minina miaswaswana:

•   Nzambi wafwana bundwa e vuvu. E Bibila kivovanga vo Nzambi “kalendi vuna ko.” (Tito 1:2) Vana ntandu, Nzambi kaka una ye lendo kiasakula mambu mevangama kuna sentu. (Yesaya 46:10) Muna Bibila muna ye nona yayingi isonganga vo mana Nzambi kesakulanga, ntangwa zawonso melunganga. Muna zaya diaka mayingi, tala e video Aweyi Tulenda Kadila ye Ziku vo Bibila kia Ziku?

•   Nzambi ovuidi lendo kia manisa e mpasi zeto. Bibila kivovanga vo Nzambi ovuidi nkuma wavanga “mawonso kazolele vanga.” (Nkunga 135:5, 6) Muna mvovo miankaka, ke vena diambu ko dilenda kakidila Nzambi mu lungisa nsilu miandi. Vana ntandu, Nzambi ozolele kutusadisa kadi otoma kutuzolanga.—Yoane 3:16.

 Nanga olenda kukiyuvula: ‘Avo Nzambi ozolele kutusadisa ye ovuidi nkuma muna kutusadisa, ekuma twakinu mwena mambu mayingi mampasi?’ Muna baka e mvutu za kiuvu kiaki, tala e video Ekuma Nzambi Keyambulwilanga e Mpasi?

 Nzambi osadila Kintinu kiandi, i sia vo, luyalu lwa zulu muna lungisa e nsilu miandi. Wasola Yesu Kristu se Ntinu muna Kintinu kiaki. Wamvana nkuma wa lunga-lunganga ntoto ye wantu bezingilanga vo. Vava Yesu kakala ova ntoto, wawuka ambevo, wadikila wantu bakala mu nzala, waningamesa e tembwa yo futumuna nkutu mafwa. (Maku 4:39; 6:41-44; Luka 4:40; Yoane 11:43, 44) Mawonso mama kavanga i kini kia mana kevanga muna Kintinu kia Nzambi.

 Muna zaya nluta ovua muna Kintinu kia Nzambi, tala video Nki i Kintinu kia Nzambi?

 Ke kolo ko! Aweyi tulenda kadila ye ziku? E Bibila kiasakula mambu mayingi mesonga vo Kintinu kia Nzambi se kiyantika yala e nza. (Luka 21:10, 11) O mambu mevangamanga owau i mau masakulwa muna Bibila.

 Muna zaya diaka mayingi, tanga e longi edi “Nkia Ntanga Kintinu kia Nzambi Kiyala e Nza?”

 Nsoneki mosi a Bibila watezanesa e vuvu tuvewanga muna Bibila ye “mbwa a nzaza a mioyo mieto.” (Ayibere 6:19) Nze una mbw’a nzaza isimbilanga e nzaza kimana yalembi natumunua kwa tembwa, e vuvu tuvewanga muna Bibila mu kuma kia kusentu kilenda kutusadisa vava tuwanananga ye mambu mampasi o unu. E vuvu kieto kilenda kututanina, kiakala muna lukendalalu ye muna ntangw’ampasi nkutu.—1 Tesalonika 5:8.