E Selo Yambuta besianga e sungididi kia sadila e nzimbu za nkayilu muna tunga mavula mekutusadisanga mu samuna e nsangu za Kintinu. Muna bonga e nona, muna mvu wa salu wa 2023, e nkubika zizayakene muna nsiku mia luyalu zina zisadilwanga muna mavula ma Mbangi za Yave, zasadidi tezo kia 500 za mafuku ma mafunda (500 milhões) ma nzimbu za dólares muna sumba e lekwa, tunga yo vangulula e fulu ya nsambila, lunga-lunga Maseka ma Kintinu ye Maseka ma Tukutakanu Twampwena mu nza yawonso. a Vana ntandu, nzimbu zayingi zasadilu mpe kwa ampangi muna nkutakani zawonso omu nza muna lunga-lunga Maseka mau ma Kintinu.

 Kuna diak’e sambu, e nzimbu za nkayilu zisadilwanga mpe muna tunga yo lunga-lunga mavula ma Betele oma mesadisanga muna kubika yo yikama e salu kia samuna e nsangu zambote mu nza yawonso. Salu yayingi muna mavula yavevolwa kinumana e nzimbu za nkayilu zatoma sadilwanga muna tunga yo vangulula Maseka ma Kintinu ye Maseka ma Tukutakanu Twampwena. Kana una vo i wau, nzimbu zayingi zivuilu o mfunu muna vangulula, vongesa yovo yalula mpangi za Betele. Ekuma e salu kiaki kinina o mfunu? Aweyi mpangi za Betele beyikamenanga e salu kiamfunu muna nkutakani. Yambula twazaya.

 Mavula mayingi mazingidi kala vioka mvu 30 yovo mvu 40. Mpangi Nicholas osadilanga muna Departamento italanga salu kia ntungilu mu nza yawonso wasila vo: “Ekolo ntangwa iviokanga, kana nkutu mavula mana metoma lungwa-lungwanga, fwa mefwanga. E salu kia vangulula kisadisanga kinumana e mavula mazingila mvu miayingi.”

 Divavanga mpe vo mavula ma Betele makala betela ye nsatu za nkubik’a Yave. Tuka kiatungilwa mavula mayingi ma Betele omu nza yawonso, o lutangu lwa ateleki mu wokela kaka luna. Muna yikama lunungunuku lwalu, akwa ntima mia mvevo ayingi bevuilu o mfunu kinumana basadilanga muna mavula mama. Muna kuma kiaki, e mavula ma Betele mana twayindulanga vo mafwana kwandi, owau dimonekanga vo makete kikilu.

 O lutaninu i diambu diamfunu mpe. Ekolo tufinamanga ku mfoko a lumbu yambaninu, e sumbula mu wokela kaka ina. (Luka 21:11) O sadila ndekwa zampa za ntungilu ekolo tuvangululanga mavula, disadisanga mu tanina awana besadilanga muna mavula mama. E salu kiaki kisadisanga mpe mavula kinumana makala se fulu kiambote kia kubikila e salu kia vana lusadisu kwa awana bebwilwanga e sumbula yo kwamanana yikama avani a lusadisu vava vebwanga e sumbula.

 Muna lutumu lwa Selo Yambuta, salu kiamfunu kia tunga kiasadilu muna mavula 43 omu mvu wau wa salu wa 2023. Ediadi disongele vo omu nza yawonso bula kati kwa mavula mawonso makedi ye salu kia tunga e fulu ya nsambila. Tala yaka nona isonganga o mfunu wa salu kiaki kia tunga e fulu ya nsambila.

 Angola. O mpangi Matt, mosi muna Buka kia Afidi a Vula wavova vo: “Tuna ye lau dia mona e ndungan’a ungunza wa Kangai 2:7 mu mpila ya mfunu. Mu kolo kia mvu kumi, o lutangu lwa ateleki luwokele nkumbu 60! Muna yikama ateleki awaya, o lutangu lwa mpangi za Betele lwa kulamene nkumbu tatu. Kansi, wau vo e vula dieto diakete kikilu, ke dilendakana ko mu bokelesa mpangi zayingi tuvuidi o mfunu mu kwiza sadila kwaku Betele. Muna kuma kiaki, mpangi zayingi za Betele e salu besalanga iviokele e tezo.”

 Vasolwa ampangi kinumana bafimpa una ufwete lungisilwa e nsatu za lunungunuku lwalu. Kuna lubantiku mpangi zazi bamona vo diambote e vula tuna diau owau diavongeswa. Kansi, vava batoma fimpulula e diambu diadi, babakula vo o vongesa e vula ke mpila yambote ko ya sadila nzimbu za nkayilu. Muna kuma kiaki, bamona vo diambote mu sumba e vula dimosi dina lukufi yo vangulula dio. Mpangi Matt wavova vo: “Vava e ngindu za vangulula e vula edi tuna diau zasunzulwa kwa Afidi a Vula, twatokana kikilu. Kadi twamona vo o tunga e vula yeto kibeni, nanga ke diadi kala betela ko ye nsatu zeto. Owau tumwene vo e vula diadi dilungisa e nsatu zeto.” Kieleka, Yave osambulanga nzengo zazi.”

 Ampangi kuna vula dia Angola fulu kiankaka bevua o mfunu kuna sentu. Kansi, e vula diampa divangululwanga ye nzo zankaka zatungwa kuna lumbu lwa Betele ye nzo za mfutila babaka, zisadisanga mpangi za Betele mu kala ye fulu yafwana mu kwamanana lungisa e nsatu za lunungunuku lwa ateleki muna nsi yawonso.

 Japão. E vula diantete dia Japão dia tungwa se vioka mvu 40 ye ke disidi vangululwa ko una ufwene. Muna kuma kia ngolo zayingi bavanga ampangi muna toma dio lunga-lunga, diviokele nkutu e tezo kia mvu diafwana zingila. Muna kuma kiaki, e salu kiampwena kia vangulula e vula diadi mu diata kina.

 Ekolo mvu miviokanga e zingu muna mavula mu soba kaka kina. Kuna nim’a mvu wa 2015, mpangi zawonso za Betele lambilwa balambilwanga. Muna kuma kiaki, “kunku” yakete kaka yakalanga muna masuku ma vula dia Japão. Owau mpangi za Betele yau kibeni belambanga madia mau. Muna sadisa ampangi balambanga madia mau mu sazu, e kunku ya masuku ma Betele mu vongeswa ina. Mpangi ankento Kumiko osadilanga kuna vula dia Japão wavova vo: “E kunku kiampa kikunsadisanga mu mona vo mu nzo a mono kibeni ngina. Kikunsadisanga mpe mu toma yikama e nkubika zampa za Betele.”

 E salu kia vula dia Japão kiyekwa kiampwena kiyilungisanga muna salu kieto kia nz’amvimba. (Matai 28:19, 20) E vula dia Japão i dimosi muna mavula mole kaka menietekanga e Bibila kiamvimba. Muna kuma kiaki, o tunga masini ma zengela papele yo kakidila e mbundukutu i salu kiamfunu kisalwanga owau. Ediadi ditanina o vimpa wa mpangi ana besadilanga masini ma nietekena e nkanda. Tezo kia fuku dimosi dia mafunda (um milhão) ma nzimbu za dólares zasadilwa muna sumba yo tunga masini mama. Kansi, ampangi bevanganga mawonso kinumana e vula diakwamanana nieteka yo twika nkanda mieto muna nsi zankaka.

 Ekolo e vula ditungululwanga, ampangi bevanganga mawonso kinumana e salu kia nieteka e Bibila kiakwamanana. Mpangi Trey, mosi muna Buka kia Afidi a Vula wavova vo: “Ekolo kivangululwanga e vula, e nkubika eto nsekola zayingi za Bibila isunzuidi kala omu nza yawonso. Muna kubika masini mampa yo kwamanana vaikisa madia ma mwanda, divavanga vo departamento zayingi zasalanga entwadi.” Kana una vo diampasi kikilu, tezo kia 220.000 ma Bibila zanietekwa tuka muna ngonde a Malusu ye Agositu ye mvu wa 2023. Muna kolo kiakina e salu kia vangulula e vula dia nietekena e nkanda mu diata kiakala. E salu kiaki kiawonso ke kiafwasidi nzimbu zayingi ko.

 O tatidila e kura i diambu diankaka diamfunu muna salu kia vangulula mavula meto. Paines solar zampa zisiwanga muna mavula mankaka. Ediadi disadisanga mu lunda tezo kia 120.000 ma nzimbu za dólares konso mvu. Muna lembi sadilanga kura yayingi, pelo ya nkandu tatu isiwanga muna zianela, ediadi disadisanga mu lunda tezo kia 10.000 ma nzimbu za dólares konso mvu. Kana una vo e diambu diadi dia tatidila kura diwokese ntalu a nzimbu muna salu kia vangulula mavula, kisadisa mpe mu lunda tezo kia mafuku matatu ma mafunda ye ndambu ma nzimbu za dólares muna kolo kiawonso kizingila e paines solar. Disadisanga mpe mu kulula e vonza kia safula e kalu kia wantu.

 E salu kia tungulula kisalwanga muna mavula mama mau mole kisonganga e salu ina tuvuidi o mfunu muna yikama e salu kia samuna e nsangu zambote. Kansi, e salu ke kilweke ntete ku mfoko ko. Mpangi Aaron osadilanga muna Departamento italanga e salu kia tunga fulu ya nsambila mu nza yawonso wavova vo: “Mayingi tuvangidi kala, kansi twakinu ye salu kiayingi kifwete salu.” E salu kiaki aweyi kisadilwa? O mpangi Aaron wavova diaka vo: “Vana ntandu a tukau twamvevo tusadisanga kinumana twasala e salu kiaki kiamfunu, tuvutulanga mpe matondo kwa awonso ana bayikama e salu kiaki muna mvu miavioka ye awana besingikanga mambu ma zingu kiau kimana bayikama kio kuna sentu. E ngolo bevanganga mpangi zeto ye nkayilu miau i sinsu kiakieleka kisonganga vo Yave osambulanga e salu kieto.”—Nkunga 110:3.

 E salu kieto kiawonso kia tunga yo vangulula e fulu ya nsambila mu nkayilu mia mvevo kisadilwanga. Miayingi muna nkayilu miami mu nzil’eto donate.dan124.com mivaninuanga. Tuvutwidi matondo mu kuma kia ntim’eno a mvevo.