Kiese yo Nkembo kwa Nzambi Muna Tukutakanu

Tuka muna lubantiku lwa mvu mia 1880, Alongoki a Nkand’a Nzambi bamona vo, vana ntandu a tukutakanu tuvangamanga muna nsi zau, diamfunu dia yikananga y’akwau muna lukwikilu esi nsi zakaka. Bayantik’o kubika nkungi mia konso mvu mia Alongoki a Nkand’a Nzambi batukanga muna nsi zawonso za Estados Unidos, oku kwakwiziwa mpe kuna Canadá. Zakalanga se ntangwa za lufiaulwisu lwa mwanda; lumbu yayingi bavewanga tuludiku twa Nkand’a Nzambi, yau awonso batambulanga lukasakeso lwafwana. O luvubu lwa minkwikizi miampa lukedi se diambu diamfunu muna konso nkungi. Miasadilwanga mpe se ntangw’a vana kimbangi kiampwena kwa wantu awonso.—Roma 1:11, 12.

O unu, a Mbangi za Yave bekubikang’o tukutakanu ntangwa ke ntangwa. Tezo kia 18 yaku 25 ma nkutakani zibadikilwanga kumosi ziyikilwanga vo zunga, yikingulwanga yo sadilwa kwa selo ya zunga. Nkumbu miole muna mvu, mukubikwanga tukutakanu, nkutakani za zunga, zikutakananga kia Sabala ye kia Lumingu.

Nkumbu mosi muna mvu muna konso nsi vekubikwanga nkungi miampwena mia lumbu tatu yovo lumbu yá, miyikilwanga vo nkungi mia mvivu (congressos de distrito), mina vo mazunda ye mazunda ma wantu balenda kutakana va fulu kimosi. E nkungi miami mitoma kumikanga a Mbangi za Yave muna mwanda ye awana beyangalelanga e salu yau, yo vana kimbangi kw’awonso.

E nkubika ya tukutakanu twatu yovo ya nkungi ivangwanga kwa Buka kia Selo Yambuta (Corpo Governante) kia Mbangi za Yave mu kubika konso mambu men’o mfunu kwa Mbangi za Yave omu nza yawonso. Muvanwanga malongi, ye mbokena ye fuka isongang’oma ma zingu kia lumbu ke lumbu, meyikilwanga vo nsonga za mambu zisongwanga kwa akengi a zunga ye kwa Mbangi zazikuka za nkutakani. Akaka mpe bezingulanga mana bebwilwanga muna zingu kiau kia Kikristu omu nza yayi yambi, ye ndandu za salu kiau kia uselo. Muna nkungi mia mvivu muvangamanga diambu dimosi diamfunu: nsonga za fuka ya Nkand’a Nzambi ya mambu mavangama muna tandu kiavioka y’oma mevangamanga owau, mesonganga e mpila ina Akristu betadilang’o mambu mana bebwilwang’omu lumbu yayi.

Vekubikwanga mpe madia, ye malavu manzenzi, mesumbilwanga mu nkub’a filukau fiakete. Ediodio divananga akutakani e ntangw’a mokena yo tung’o ungudi muna ntangw’a vundu. E salu yawonso yivangamanga muna fulu yayi yisalwanga e ngovo kwa Mbangi za Yave akwa mvevo. E nzimbu zifutwanga muna fulu yivangilwang’o tukutakanu zitukanga muna tukau twamvevo. E ngovo bekotanga ka kulombwanga nkuba za nzimbu ko.

Olenda zayiswa e lumbu ye fulu kwa nkutakani a Mbangi za Yave ya zunga kiaku. Bekuzayisa mpe e nkubika za mambu mu kuma ki’ekalu dia kwendela ye fulu ya fonga.

O tukutakanu twatu tusadisanga a Mbangi za Yave y’awana belungananga yau kumosi mu vwa e mona-meso kia mambu mena kuna mbazi a nkutakani au, yo zaya owu win’e kintwadi kia mpangi zau muna nza yawonso.—1 Petelo 2:17.

• Nkia ndandu bakalanga yau Alongoki antete a Nkand’a Nzambi muna nkungi miau?

• Vova e nkubika za tukutakanu twa zunga ye za nkungi mia mvivu.

 [Mafoto zina muna lukaya 18]

Fuka kia Nkand’a Nzambi mu lukutakanu lwa zunga, kuna Estados Unidos

Lukutakanu lwa nsi zayingi kuna Polônia

Lukutakanu lwa nsi zayingi kuna Argentina

Lukutakanu lwa zunga kuna Japão

Akutakani se bebakang’e nkanda mia Sociedade, kuna Suíça

Luvubu kuna lukutakanu lwa nsi zayingi kuna Afrika do Sul

Nsunzul’a nkand’ampa, kuna Canadá.

Akutakani beyimbilanga, kuna Espanha