Nz’ampa Y’esivi Yisemwa Kwa Nzambi
Tini kia 10
Nz’ampa Y’esivi Yisemwa Kwa Nzambi
1, 2. E vita ya Armangedo vava imana komba e nkubik’a tandu kiaki ameyi mevangama?
O NZAMBI una kefukisa mavangu mama mambi muna Armangedo, adieyi dilanda? Tandu ki’esivi kia mpa kiyantika. Ana bevuluka muna Armangedo bekota muna nz’ampa, kadi basongele kwikizi kiau muna luyalu lwa Nzambi. O lubantiku lua tandu kiaki kiampa lwa kiese lukala, ekolo kipongok’e nsambu za Nzambi kwa kanda dia wantu!
2 Kuna nsi a Kintinu lua Nzambi, ana bevuluka, be kitul’o ntoto se paradiso. Besadila ngolo zau muna salu kiambote kitwasa nluta kw’awonso bezingila mo. O ntoto yikitulwa se fulu kiambote kia luvuvamu kiyangidika awonso.
Ndungidi Ivingila Mambi
3. Nkia luvevoka lukala vana vau ku nima Armangedo?
3 Mama mawonso melendakana vava kifwaswa e nza ya Satana. Ke kukala diaka malongi maswaswana ma luvunu ko, mevambanisang’o wantu ngatu yintwadi yambi yovo tuyalu. Ke kukala diaka amwangi a nsamu mia Satana ko muna vunginika wantu; awonso bavangidingi e salu kiaki bevila kumosi yo mavangu ma Satana. Se badiki: o tembwa kiawonso kiambi kia Satana kivempoka! Nkia mpila luvevoko lukala!
4. Songa e nsobani ikala muna malongi.
4 E ngindu za lufwasu za luyalu lwa muntu zivingilwa kw’elongi dia luvangameso dia Nzambi. “O wan’aku awonso bekal’alongoki a Yave.” (Yesaya 54:13) Muna wang’elongi diadi diavimpi, mvu ke mvu, “e nza izala yo zayi wa Yave, una mefuka kalunga o maza.” (Yesaya 11:9) O wantu ke belongoka diaka oma mambi ko, kansi o “wantu a nza belongwa unsongi.” (Yesaya 26:9) Ngindu zambote yo mavangu mambote i mevangwa kaka lumbu ke lumbu.—Mavangu 17:31; Filipe 4:8.
5. Adieyi dibwila amimpanga mayi yo mambi mawonso?
5 Ozevo, ke vekala diaka avondi ko, ngatu nsoki, abangiki, nsanzi, yovo konso vangu dia umpumbulu. Ke vekala muntu omona mpasi mu kuma kia mavangu ma wantu akaka ko. Ngana 10:30 owu ivovele: “O nsongi kenikunwa nkutu ko: E yimpumbulu ke ikala muna nsi ko.”
O Vimpi Walunga Uvutulwa
6, 7. (a) Nkia mambu kemanisa o luyalu lua Kintinu? (b) Aweyi kasongela dio o Yesu ekolo kakal’ova ntoto?
6 Muna nz’ampa, e mpasi zawonso zayiza mu kuma kia ntelameno zifukiswa. Kasikil’owu, o luyalu lwa Kintinu lumanisa mayela yo ununu. O unu, ekana nkia mpila vimpi nkutu i kavw’o muntu, ekolo kenunanga, o meso mandi ke metoma mona diaka ko, o meno mandi mefwasuka, o matu ke metoma wa diaka ko, o nkanda nitu ufitama, e nitu aku muna kati ke iwutuluka diaka ko yavana ofwa.
7 Kansi kadi, e mpasi zazi zawonso twavwila s’evwa dia mase meto mantete ke kolo ko se zivioka. Ng’osungamene oma kasonga o Yesu mu kuma kia vimpi una kakal’ova ntoto? O Nkand’a Nzambi uvovanga: “Oluakilu kwa ndong’ayingi, ina ye mbevo za malu, mpofo, mababa, avanguki, y’akaka diaka, engi, babatubidi vana malu mandi; ubawukidi: yavan’e ndonga isivikidi, una bamwene mababa se mevovanga, avanguki se mvimpi, ye mbevo za malu zidiatanga, ye mpofo se zimonanga.”—Matai 15:30, 31.
8, 9. Songa e kiese kikala muna nz’ampa vava kivutulwa o vimpi wa lunga?
8 Nkia mpila kiese kikala muna nz’ampa vava kifokolwa empasi zeto zawonso! E mpasi tumonanga mu kondwa kwa vimpi wambote, ke zikutubangika diaka ko. “O ntungi kevova ko vo, Yela nyela.” “O meso ma mpofo metemoka, o matu m’afwa matu mekakuka. O nkw’evola olemoka nze mvudi, o lubini lu’ebaba luyimbila.”—Yesaya 33:24; 35:5, 6.
9 Nga ke dia kiese ko vo mene ke mene olenda sikama yo vimpi wambote? Nga ke dia luyangalalu ko kwa anunu dia zaya vo bevutulwa o nkuma a kileke yo kala s’alunga tuka muna nitu yo muna nyindu nze una wateka kala Adami yo Eva? O Nkand’a Nzambi usiang’o nsilu: “E nitu andi isundidi o wete ke mu nitu a mwana ko; Ovutuka kuna lumbu ya kileke kiandi.” (Yobi 33:25) Nkia mpila kiese kikala vava ivetwa e pelo ya mwena óculos, ye sadilu ya ngwilu, aparelhos de surdez, ye nti a nsikinwa z’avanguki muletas, ye kunda ya diatila cadeiras de roda ye nlongo! Ke vekala diaka mfunu a nzo zawukila ko, yovo nganga a wuka ngatu nkatudi a dinu.
10. Adieyi dibwil’o lufwa?
10 Awana bevwil’o vimpi wau wambote ke bezola fwa ko. Elo ke befwa ko, ekuma vo, wantu ke bekala diaka mu sibu kia lembi fwana ko ngatu kia lufwa. Kristu “yala keyala kaka, yavana kevwa vindakes’atantu awonso kunansi a malu mandi. O ntantu osukinin’o tumbulwa i fwa.” “Vo i lukau luangovo lua Nzambi, moyo a mvu ya mvu.”—1 Korinto 15:25, 26; Roma 6:23; tala diaka Yesaya 25:8.
11. O nkanda Lusengomono aweyi kesongelanga mu mvovo miakete e nsambu za nz’ampa?
11 Muna yika fiakete e nsambu ketwasa kwa kanda dia wantu muna Paradiso, o Nzambi ndiona utuvwidi o mfunu, wavova muna nkand’ansuka wa Nkand’a Nzambi vo: “Kakunguna [Nzambi] mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.”—Lusengomono 21:3, 4.
O Mafwa Mevutuka
12. O Yesu aweyi kasongela e wisa kia fula mafwa kavewa kwa Nzambi?
12 O Yesu ka wuka kaka akwa mayela yo singika avanguki ko. Kavutula mpe moyo kw’awana afwa bakala muna ziami. I kasongela wuwu e wisa ki’esivi kavewa kwa Nzambi kia fula mafwa. Osungamene una Yesu kayenda ku nzo a muntu mosi wafwilw’o mwan’a nkento? Yesu wavova kwa mwan’a wafwa: “E dumbelele, ivovese vo, Zangumuka!” Nkia diambu diabwa? “E dumbelele, vana vau kitelamene, kidiete.” Awana bamona mambu mama “bayizengenekene nzengenek’ayingi.” Ke balenda sweka e kiese bamona ko!—Maku 5:41, 42; tala mpe Luka 7:11-16; Yoane 11:1-45.
13. Nkia mpila wantu befulwa muna mafwa?
13 Muna nz’ampa, mukala “lufuluku lu’asongi y’ana balembi songa.” (Mavangu 24:15) Muna ntangwa ina o Yesu osadila e wisa kamvana o Nzambi kia fula mafwa, kadi yandi oku vo: “Mono i lufuluku, yo moyo: on’okwikilang’omu mono, o fwa nkutu i kafwa, moyo aka kekala.” (Yoane 11:25) Wavova mpe diaka vo: “Awonso bena muna nkala [muna nyindu a Nzambi] bewa nding’andi [Yesu], bavaika.”—Yoane 5:28, 29.
14. Wau vo o lufwa ke lukala diaka ko, nkia mambu mevempoka?
14 Kiese kiayingi kikala ova ntoto wawonso vava buka ye buka ya mafwa bevutuk’o moyo yo yikana y’akwau! Ke kubokelwa diaka nkoki mia mafwa ko muna twas’e nkenda kwa aya ben’omoyo. Kansi kadi: vebokelwa nkoki mia kiese ki’awana befutumuka yo mwes’ekiese kwa azolwa au. I sia vo, e salu kia zik’o mafwa suka kisuka, o mawulu ma mvumbi ye fulu kiyokelwanga mvumbi, ye ziami ke ikala diaka ko!
Nza ya Luvuvamu Lwa Kieleka
15. O ungunza wa Mika aweyi utoma lunganena?
15 Kukala yo luvuvamu lua kieleka muna mpila zingu kiawonso. E vita, yawana betumanga zo, y’avangi a nwaninwa awonso vioka bevioka. Ekuma? Ekuma kadi ke kukala diaka mpambula za zula, ye makanda ye nswaswani za nkand’anitu ko. Muna ntangwa ina, milungana mvimba e mvovo emi, “e zula ke kizangwila nsosolo muna zula ko, ke belongwa diak’o nwana vita ko.”—Mika 4:3.
16. O Nzambi aweyi kemanisin’e vita?
16 Ediadi dilenda moneka vo di’esivi muna vangama, wau vo o lusansu luawonso lwa wantu lua bungula menga muna vita. Kansi o mama mevangamanga mu kuma kia sia vo o wantu beyalwanga kwa luyalu lua muntu ye lua nkwiya. Tal’oma mevangama muna nz’ampa, muna wisa kia luyalu lua Kintinu: “Nwiza nwatala mavangu ma Yave . . . Osima vita yakuna nsuk’a nza; Ta ketolola yo butuna dionga; O makalu, mau keyoka.”—Nkunga 46:8, 9.
17, 18. Nkia tezo lukala o luvuvamu vana kati kwa wantu ye bulu muna nz’ampa?
17 Vekala mpe yo luvuvamu vana vena o muntu ye bulu nze i una wakala muna Edeni. (Etuku 1:28; 2:19) Wa, owu kavovel’o Nzambi: “E lumbu kina ikubakangil’ekangu ye bulu ya futa ye nuni z’ezulu, ye ma iyatatanga va ntoto . . . ikubalekesela kuna mavolo.”—Osea 2:18.
18 Nkia tezo lukala o luvuvamu? “E dievwa dinangina yo mwan’ememe, e ngo ibubamena yo mwan’a nkombo; mwan’a ngombe yo mwan’a nkosi ye mbizi amazi ikala kumosi; e kingyanangyana kikubafila.” E bulu ke imwesa diaka wantu wonga ko ngatu kwa bulu y’akwau. ‘E nkosi odia titi nze ngombe’!—Yesaya 11:6-9; 65:25.
Ntoto Ukitulwa se Paradiso
19. O ntoto nki ukitulwa?
19 O ntoto wawonso ukitulwa se paradiso ya wantu. I kuma kiki o Yesu kakanikina kwa muntu wambund’e vuvu vo: “Okala yame muna Paradiso.” O Nkand’a Nzambi uvovele vo: “Ekanga ye nsi a kaya iyangalala, o nzanz’angidinginza umon’e kiese yo savuka nze nasisi. . . . kadi van’ekanga vefusuk’o maza, ye nkoko vana nzanz’angidinginza.”—Luka 23:43; Yesaya 35:1, 6.
20. Ekuma o wantu ke befwila diaka nzala ko?
20 Muna luyalu lwa Kintinu kia Nzambi, e nzala ke ibangika diaka wantu ko. “O ulolo wa masa ukala muna nsi, yakuna ntandu a miongo.” “O nti evinza uyima mbongo andi, o ntoto uyima mbongo andi, bevôva muna nsi au.”—Nkunga 72:16; Yezekeke 34:27.
21. Adieyi divangama mu kuma kia kondw’a nzo, ye fobolo ya nzo ye belo ya vonza?
21 O usukami ke ukala diaka ko, ngatu wantu bakondwa nzo yovo zingila muna fobolo ya nzo, ngatu zingila diaka mu belo yazala yo umpumbulu. “Betunga nzo yo kala mo; bekuna mpatu za vinyo, yo dia bundu yau. Ke betunga ko, wakaka kakala mo; ke bekuna ko wakaka kadia.” “Kansi bekala konso muntu kunansi a nsing’andi a vinyo yo kunansi a nsad’andi; ke vekal’on’okubazakamesa ko.”—Yesaya 65:21, 22; Mika 4:4.
22. O Nkand’a Nzambi aweyi usasilanga e nsambu zitwasa luyalu lua Nzambi?
22 O wantu besambulwa muna mawonso mama yo makaka mpe muna Paradiso. O Nkunga 145:16 uvovanga vo: “Obundula koko kwaku [Nzambi], yo yukutisa kinzola-nzola kia mioyo miawonso.” O ungunza wa Nkand’a Nzambi i kuma uvovelanga vo: “Alembami bevwa nza; Beyangalela muna mawete mayingi. . . . Asongi bevwa nza, besikila vo yakwele mvu.”—Nkunga 37:11, 29.
Oma Mantete Mevunzunwa
23. E Kintinu kia Nzambi aweyi kivunzakesela e mpasi zawonso twamona?
23 O luyalu lua Kintinu kia Nzambi luvunzakes’e mpasi zawonso zimwene ekanda dia wantu muna kolo kiokio kia mazunda masambanu ma mvu maviokele. E kiese kikala mu ntangwa yina kivilakesa mpasi zawonso zamon’o wantu. E zingu ke kibangikwa diaka muna yindula mpasi zavioka ko. E ngindu ye salu ya kiese ya lumbu ke lumbu ivilakesa o luyindwilu lwa mpasi.
24, 25. (a) Ameyi kavova o Yesaya? (b) Ekuma tulenda kwikila vo o luyindwilu lua mpasi zawonso luvila?
24 O Nzambi ona utuvwidi o mfunu ovovele vo: “Kadi, nsem’ezulu diampa [luyalu lua mpa lu’ezulu luyala wantu] ye nz’ampa [kintwadi kia wantu ansongi]: oma mantete ke meyindulwa ko, ngatu kota muna ntima. Kansi nuyangalala yo kembela yakwele mvu muna kina nsema.” “E nza yawonso ivundidi yo vuvama: bebonga nkunga.”—Yesaya 14:7; 65:17, 18.
25 Ozevo, muna Kintinu kiandi, o Nzambi, ovilumuna e mpasi zawonso zatuka kolo. Okutusonga kikilu o mfunu katuvwidi yakwele mvu, opongola nsambu zandi zisenda mpasi zawonso twamona. E mpasi zina twamona zandwelo zikala muna yindulwa, ovo tuzola zo yindula.
26. Ekuma tusendelwa kwa Nzambi muna mpasi zawonso zavioka?
26 I wau wuwu kekutusendel’o Nzambi muna mpasi zawonso twamona mu nza yayi. Yandi ozeye wo vo ke kuma kieto ko twawutukila twalembi lunga, kadi twavwil’esumu dia mase meto mantete. Ke mu kuma kieto ko twawutukila omu nza yayi ya Satana, kadi kele vo Adami yo Eva basong’e kwikizi kiau, nga mu paradiso twadi wutukila. Ozevo muna nkenda zampwena, o Nzambi osenda mpasi zeto.
27. Nkia ungunza ulungana e ndungan’esivi muna nz’ampa?
27 Muna nz’ampa, o wantu bevwila luvevoko olu luyikilu muna Roma 8:21, 22: “Muna vuvu kia nsema kibeni wavevoka muna kibundu kia uwolezia, yamuna vevoka kwa nkembo a wan’a Nzambi. Tuzeye wo vo o nsema wawonso ubuminanga yo kala yo nsongo kumosi yamu wau.” O wantu bemona e ndungana a sambu eki: “E kintinu kiaku kiza. O luzolo luaku luavangam’ova nza nze koko’zulu.” (Matai 6:10) E tezo kia zingu ki’esivi ova ntoto a paradiso kikala nze i kun’ezulu.
[Yuvu ja longokela]
[Mafoto zina muna lukaya 23]
Muna nz’ampa, anunu bevutukil’o nkuma a kileke
[Foto ina muna lukaya 24]
O mayela mawonso yo uvanguki ufukiswa muna nz’ampa
[Foto ina muna lukaya 25]
Muna nz’ampa a mafwa befulwa
[Foto ina muna lukaya 26]
‘Ke belongwa diaka nwana ko’
[Mafoto zina muna lukaya 27]
Wantu ye bulu bekala yo luvuvamu muna Paradiso
[Foto ina muna lukaya 27]
‘Nzambi obundula koko kwandi yo yukutisa kinzola-nzola kia mioyo miawonso’
[Foto ina muna lukaya 28]
Kintinu kia Nzambi kisenda e mpasi zawonso twamona
