Longi dia 7

Aweyi Olenda Finamena Nzambi muna Sambu

Ekuma dinina diamfunu dia sambanga e ntangwa zawonso? (1)

Kwa nani tufwete sambanga ye mu nkia mpila? (2, 3)

Nkia mambu mena mamfunu mu lomba muna sambu? (4)

Nkia ntangwa ofwete samba? (5, 6)

O Nzambi nga owanga e sambu yawonso? (7)

1. O samba disongele vo vova kwa Nzambi kuna vumi wawonso. Ofwete sambanga e ntangwa zawonso kwa Nzambi. I wau wuwu olenda finamena kwa yandi nze nkundi anzodi. O Yave wasunda mu nene yo nkuma, kansi owanga e sambu yeto. Nga osambanga e ntangwa zawonso kwa Nzambi?—Nkunga 65:2; 1 Tesalonika 5:17.

2. E sambu mpe dimosi muna mena mevavwanga muna nsambil’eto. Ozevo,  tufwete sambanga kaka kwa Yave wa Nzambi. O Yesu vava kakal’ova ntoto, wasambang’aka kw’eS’andi, ke kwa konso muntu ko. Oyeto mpe tufwete dio vanga. (Matai 4:10; 6:9) Kansi kadi, e sambu yeto yawonso yifwete lombelwa muna nkumbu a Yesu. Muna songa vo tutondanga e fulu kia Yesu ye mpe vo tuna yo lukwikilu muna kimenga kiandi kia lukulu.—Yoane 14:6; 1 Yoane 2:1, 2.

3. Vava tusambanga, tufwete vova kwa Nzambi oma mena muna ntim’eto. Ka tufwete lombolola e sambu ko ngatu vo tanga kio muna nkanda wa sambu. (Matai 6:7, 8) Tufwete samba muna konso mpila yafwana, muna konso ola ye vana konso fulu. O Nzambi olenda wa kana nkutu vo tusambila muna nsi a ntima. (1 Samuele 1:12, 13) Diamfunu dia sola e fulu kiavuvama, vana vakondel’o wantu, muna sambu kia yeto kibeni.—Maku 1:35.

4. Nkia mambu ofwete lomba? Muna mawonso malenda yivisa kikundi kiaku yo yandi. (Filipi 4:6, 7) E sambu-kialongwa kisonganga vo tufwete sambil’e nkumbu y’ekani dia Yave. Tulenda mpe lombela e nsatu zeto za nitu, yo lomba mpe luloloko lwa masumu meto yo lusadisu vava tubangamanga muna lutonto. (Matai 6:9-13) Katufwete lombela kun’eloko ko. Tufwete lomba kaka oma mena ngwizani yo luzolo lwa Nzambi.—1 Yoane 5:14.

5. Ongeye olenda samba kwaku konso ntangwa ina vo o ntim’aku ukufila muna kembela yovo vutula matondo kwa Nzambi. (1 Tusansu 29:10-13) Ofwete samba vava una muna mpasi yovo vava lukwikilu luaku lutontwanga. (Nkunga 55:22; 120:1) Diamfunu dia teka samba vava o dia. (Matai 14:19) O Yave okutuwondelelanga mu samba e “ntangwa zawonso.”—Efeso 6:18.

6. Vava tusumukanga esumu diampwena tuvwanga o mfunu a samba. Muna kolo kiakina tufwete samba kwa Yave vo katufwil’e nkenda yo kutuloloka. Ovo tufunguna masumu meto yo vanga ngolo muna lembi mo vutukil’o vanga, o Nzambi ‘okutuyambulwila.’—Nkunga 86:5; Ngana 28:13.

7. O Yave sambu y’akwa kwikizi kaka kewanga. E sambu yaku muna wakana kwa Nzambi, ofwete siang’e ngolo wa zingilanga mun’owu wa nsiku Miandi. (Ngana 15:29; 28:9) Diamfunu mu kuyisakidika vava o sambanga. (Luka 18:9-14) Ofwete sia e ngolo za vanga mana osambilanga. I wau wuwu osongela vo una yo lukwikilu ye mpe vo ludi kikilu ovovanga. I mpana kekuvan’e mvutu o Yave.—Ayibere 11:6.