Yindula diambu edi: David odiatisanga e kalu mu nzila ina kazeye ko. E sinsu muna nzila isongele vo ke kiau ko i zunga kazolele kwenda. David obakwidi vo ovididi e nzila. Nanga ekolo kakedi mu nkangalu, nzila yankaka kalende.

Kele vo ngeye i David, adieyi wadi vanga?

Vena ye nzengo zayingi olenda baka:

1. Yuvula kwa muntu ankaka.

2. Tala muna mapa

3. Kwamanana diatisa kalu ye vuvu vo osolola e nzila ifilanga kuna ozolele kwenda.

Muna nzengo tatu zazi, ezi zansuka za uzowa kikilu.

Ezi zazole zisundidi wete ke mu nzengo zantete ko. Diambote mu kala ye mapa kadi olenda yo tala ekolo okangalanga. Diadi dilenda kusadisa mu zaya e nzila ofwete landa.

Nkand’a Nzambi ulenda kusadisa muna solola e nzila ofwete landa

O nkanda wau una vo i nkanda usundidi kayaneswa mu nza, ulenda:

• kusadisa vava onwananga ye mambu mampasi

• kusadisa mu toma kuyizaya yo kala ye ngangu muna zingu

• kusonga e mpila yambote ofwete natina e zingu kiaku

Tuyantikanga yuvula yuvu tuka muna lumbu kina tuzayanga o vova.

• Ekuma e zulu dinina dia bule?

• Ekuma e ntetembwa zikeziminanga?

Ekolo tukulanga, tuyantikanga yuvula yuvu mu kuma kia nza tuzingilanga.

• Ekuma mambu mambi mevangamenanga?

• Ekuma wantu befwilanga?

Nga tulenda solola e mvutu za yuvu yayi muna Nkand’a Nzambi?

Wantu ayingi bevovanga vo Nkand’a Nzambi wazala ye tusansu twa luvunu, waviokela e ntanga ye wampasi mu bakula. Kansi, e diambu akweyi dina? Mu Nkand’a Nzambi yovo mu mana wantu bewanga mu kuma nkia nkanda wau? Nga wantu awaya vuna bevunuanga?

Muna bonga e nona, wantu ayingi bebanzanga vo Nkand’a Nzambi uvovanga vo Nzambi oyalanga e nza yayi. Nga diadi dialudi? E nza yayi yabeba kikilu. Yazala ye mpasi, mayela, lufwa, usukami ye sumbula. Nga Nzambi anzodi olenda vanga mambu mama?

Nga ozolele zaya e mvutu? Olenda sivika mu zaya dina Nkand’a Nzambi uvovanga mu kuma kia ndiona oyalanga e nza yayi.

Nanga obakwidi vo malongi mena mu finkanda fiafi mu Nkand’a Nzambi matukidi. Mbangi za Yave bena ye vuvu vo Nkand’a Nzambi malongi mambote kaka uvananga. Tulenda wo bund’e vuvu kadi i nkanda ‘wavumunwinwa kwa Nzambi, una yo mfunu muna longa, muna tumba, muna ludika.’ (2 Timoteo 3:16, 17) E diambu diangangu olenda vanga i fimpa e mvovo mia nkanda wau una vo wankulu, kansi ke uviokelanga ntangwa ko.