EKOLO osilanga umbangi mu nzo ke nzo, owilu mazu ma kalu dia mapolisia kuna kwandá. E mazu mama mu wokela kaka mena. Ekolo omokenanga ye mfumu a nzo ilende, o mpangi ovaikidi yandi oyambwidi sia e sungididi muna moko wau kamwene e kalu dia mapolisia diningamene vana ndambu. Polisia mosi okulumukini, ofinamene yo yuvula vo: “Nga yeno i wantu wole tuwilu bekwendanga mu nzo ke nzo mu vovela mambu ma Bibila? Wantu ayingi beyidimanga mu kuma kieno!” Kuna luzitu lwawonso, nuvene e mvutu yo kuyisunzula vo nu Mbangi za Yave. Adieyi divangama kuna kulanda?

O lusansu luvananga e mvutu za kiuvu kiaki. Aweyi luyalu lwa nsi aku lubadikilanga Mbangi za Yave? Nga luna ye luvevoko lwa nsambila? Avo i wau, nanga i mu kuma kia ngolo bavanga mpangi zaku z’akala ye z’akento mu ‘tanina yo sikidisa e nsangu zambote.’ (Fili. 1:7) Kiakala nkia fulu ozingilanga, obadika e mfundu besundanga Mbangi za Yave dilenda kumika lukwikilu lwaku. Mu kunku kiaki, tufimpa miaka muna mfundu miami. E mfundu tusundanga misonganga e ziku vo Kintinu kina kikilu, kadi ke twadi mio sunda ko muna ngolo za yeto kibeni.