NKUDIKA
1914
VITILA mvu miayingi, alongoki a Nkand’a Nzambi bateka dio samuna vo muna mvu wa 1914 mambu mampwena mebwa. Nkia mambu? Adieyi disonganga vo mambu mampwena mabwa muna mvu wa 1914?
Muna Luka 21:24, Yesu wavova vo: “Yerusaleme idiatakeswa kwa zula, yavan’e tandu ya zula ilunga.” Yerusaleme yakala se mbanz’a Yuda yayadilanga Kintinu kia nzo a Davidi. (Nkunga 48:1, 2) Atinu awaya baswaswana bakala ye atinu a zula yakaka. “Vana kunda kia Yave” bavwandanga se asunzudi a Nzambi. (1 Tusansu 29:23) Yerusaleme mbanza ya kimfumu kia Yave yakalanga.
O luyalu lwa Nzambi nkia ntangwa ye aweyi lwa ‘diatakeselwa kwa zula’? Ediadi diabwa muna mvu wa 607 vitila Kristu vava esi Babele bafwasa mbanza Yerusaleme. E “kunda kia Yave,” ye kintinu kia nzo a Davidi kiasal’enkatu. (2 Ntinu 25:1-26) Nga muna kolo kiakina e kintinu kia nzo a Davidi ‘kiadiatakeswa’ emvimba? Ve, ekuma kadi ungunza wa Yezekele wavova mu kuma kia Sedekeya wa ntinu a nsuka wa Yerusaleme vo: ‘Katula banda kia unganga . . . Ke kivewa kwa muntu ko, yavana ndion’ovwidi kio keluaka; ikumvana kio.’ (Yezekele 21:26, 27) Yesu Kristu i ndiona ‘ovwidi’ nswa watambula e kunda kia Davidi. (Luka 1:32, 33) O ‘diatakesa’ kintinu kiaki kwafokoka vava Yesu kayala se Ntinu.
Nkia ntangwa dialungana ediadi? Yesu wasonga vo esi zula beyala yamu ntangwa yasikidiswa. E ungunza wa Daniele kapu kia 4 usonganga e mpila ya zayila kolo kiaki. E kapu kiaki kisonganga ndozi ya ungunza kalota Nebukandesa wa Ntinu a Babele. O ntinu wamona nti wampwena wakeswa. E sinza kiandi kia siwa kasu kia tadi kimana kialembi mena. Mbasi mosi wavova vo: ‘Vamvioka kolo nsambwadi.’
Muna Nkand’a Nzambi, ezak’e ntangwa o nti usadilwanga se sinsu kia luyalu. (Yezekele 17:22-24; 31:2-5) Muna kuma kiaki, o nti wakeswa wasonganga e mpila kiadi katulwilwa kintinu kia Nzambi kia yalwanga muna Yerusaleme. Kansi, e mona-meso yasonga vo ‘Yerusaleme mu kolo kiakete yidiatakeswa’
E sono kia Lusengomono 12:6, 14 kisonganga vo ekolo tatu ye ndambu, “1.260 ma lumbu” kisunzulanga. Disongele vo “ekolo nsambwadi” 2.520 ma lumbu kiafwana zingila. Kansi o ‘diatakesa’ luyalu lwa Nzambi kwa esi zula ke kwafokoka mu 2.520 ma lumbu ko, tuka lufwasu lwa Yerusaleme. Ozevo, o ungunza wau kolo kia ndá uyikanga. Muna Ntalu 14:34 ye Yezekele 4:6, tutanganga vo “konso lumbu mvu mvu,” ozevo e “kolo nsambwadi” 2.520 ma mvu kiazingila.
E kolo kiaki kia 2.520 ma mvu kiayantika muna ngonde ya Oktoba ya mvu wa 607 vitila Kristu, vava esi Babele bafwasa Yerusaleme yo bangul’e kunda kia kintinu kia nzo a Davidi. Ekolo kiaki kiamanisa muna ngonde ya Okutoba ya mvu 1914. Muna mvu wauna, e “tandu ya zula” yamanisa, o Yesu Kristu wayadikwa kun’ezulu se Ntinu. *
Nze una kavova Yesu, e ‘ngyal’andi’ muna Kintinu ki’ezulu mu mambu mebwanga ova nza yizayakenena
^ tini. 4 Tuka ngonde ya Okutoba ya mvu 607 Vitila Kristu yamuna ngonde ya Okutoba ya mvu 1 Vitila Kristu, mvu 606 miavioka. Wau vo ke vakala mvu wa mpavala ko, tuka muna ngonde ya Okutoba ya mvu 1 Vitila Kristu yamuna ngonde ya Okutoba ya mvu 1914, mvu 1.914 miavioka. Muna bundakesa mvu 606 ye 1.914 dia mvu tulungisa 2.520 ma mvu. Muna zaya diaka mambu makaka mu kuma kia lufwasu lwa Yerusaleme muna mvu wa 607 Vitila Kristu, tala elongi dina yo ntu a diambu vo “Cronologia” muna nkanda Estudo Perspicaz das Escrituras, wavaikiswa kwa Mbangi za Yave.
