MUNA kutusadisa twazaya Masia, Yave wa Nzambi wavumunwina ungunza wayingi uyikanga luwutuku, salu ye lufwa lwa Mvuluzi ndioyo. Ungunza wau wawonso walungana muna Yesu Kristu. O ungunza wau wakieleka ye wa ziku  muna mawonso. Yambula twafimpa ungunza wakaka wazayisa mambu mabwa muna luwutuku ye muna nsansuk’a Masia.

Yesaya wa ngunza wavova vo Masia mun’ekanda dia Davidi wa Ntinu kewutukila. (Yesaya 9:7) Yesu mun’ekanda dia Davidi mu kawutukila kieleka.—Matai 1:1, 6-17.

 Mika wa ngunz’a Nzambi wavova vo, mwana ndioyo okala se ntinu yo wutukila muna “Betelemferata.” (Mika 5:2) Vava kawutuka Yesu, muna Isaele mbanza zole zakala mo zayikilwanga vo Beteleme. Imosi yakala kuna node a Nazarete, e yakaka mfinangani ye Yerusaleme a Yuda. E Beteleme yafinama ye Yerusaleme i yau yayikilwanga vo Betelemferata. Nze una diasakulwa, Yesu muna mbanza yayina kawutukila.—Matai 2:1.

Ungunza wakaka wa Nkand’a Nzambi wateka vova vo Mwan’a Nzambi ‘obokelwa muna Engipito.’ Yesu vava kakala nsedia wanatwa kuna Engipito. Kansi, vava kiafwa Erodi, wavutulwa muna Isaele, muna diadi ungunza walungana kieleka.—Osea 11:1; Matai 2:15.

E sono ina muna ndandani muna lukaya lwa 200, kuna nsi a ntu a diambu “ Ungunza” itoma songanga mawonso mateka vovwa mu kuma kia Masia. Tezanesa e sono yayi ye ina kuna nsi a ntu a diambu “Ndungana.” Ediadi disiamisa lukwikilu lwaku muna Nkand’a Nzambi.

Ekolo olongokanga e sono yayi sungamena vo mambu mama masonama tuka mvu miayingi vitila ngutuk’a Yesu. Yesu wavova vo: “Mambu mawonso yasonamena muna Nsiku a Mose, yo muna ngunza, yo muna Nkunga, melungana.” (Luka 24:44) Nze un’otangidi muna Nkand’a Nzambi, mawonso masakulwa muna unguza wau malungana!