Yave wa Nzambi i Mvangi eto. Yandi wavanga e lekwa yawonso, ina tumonanga ye ina ke tumonanga ko. Vitila kavanga e lekwa tumonanga, Yave wavanga mbasi zayingi. Nga ozeye aki nani i ambasi? Ambasi i vangwa ya mwanda bena ye nitu nze ya Nzambi. Kuna zulu bezingilanga. Ke tulendi kubamona ko, nze una ke tulendi muena Nzambi ko. E mbasi antete kavanga o Yave wakituka se nsadisi andi. E mbasi yayi yasadisa Yave vava kavanga ntetembwa ye lekwa yankaka. Wavanga mpe ntoto, e fulu eki tuzingilanga.

I bosi, Yave wakubika o ntoto kimana wazingilwa kwa bulu ye wantu. Wavanga e ntangwa kimana yavananga o ntemo ova ntoto. Wavanga mpe miongo, kalunga ye nkoko.

Adieyi diavangama kuna kwalanda? Yave wavova vo: ‘Yambula yavanga e titi ye nti.’ Vana vau, o ntoto wazala ye nti mia mpila mu mpila miyimanga e bundu, mvuma ye makaya mediwanga. I bosi, Yave wavanga bulu yawonso. Wavanga e bulu idiatanga, ina itimukanga, ina izingilanga muna maza ye ina iyatatanga. Wavanga bulu yakete, nze mpuku ye bulu yanene nze nzau. Nkia bulu otoma zolanga?

Kuna kwalanda, Yave wavova kwa mbasi antete vo: ‘Tuvanga o muntu kimana kazingila ova ntoto.’ O wantu beswaswana ye  bulu. Bekala ye ngangu za vanga e lekwa, za vova, seva yo samba. Yau belunga-lunga e nza ye bulu. Nga ozeye e nkumbu a muntu antete kavanga? Yambula twazaya.