Vava Yesu kalonga mu tezo kia mvu mosi ye ndambu, diavava vo kabaka nzengo zamfunu. Aki nani kesola mu sala yandi entwadi? Aki nani kelonga kimana bavita o ntu muna nkutakani ya Akristu? Muna baka nzengo zazi, Yesu luludiku lwa Yave kavuanga o mfunu. Muna kuma kiaki, wayenda kuna mongo va fulu kia yandi mosi kaka yo samba fuku wamvimba. Muna mene, Yesu wabokela akaka muna alongoki andi yo sola ntumwa 12. Nga osungamene nkumbu zau? E nkumbu zau i zazi: Petelo, Andere, Yakobo, Yoane, Filipo, Batolomai, Toma, Matai, Yakobo wa mwan’a Alefayo, Tadai, Simone yo Yuda wa mwisi Kereote.

Antumwa awaya Kumi ye Zole bayantika kangala yandi kumosi. Vava katoma kubalonga, wabatuma benda longi yau mosi kaka. Yave wabavana nkuma wa vaikisa nkuya yo wuka yimbevo.

Yesu wayikilanga ntumwa zandi Kumi ye Zole vo akundi. Watoma kubabundanga e vuvu. Afarisi babanzanga vo antumwa ke bakota sikola ko ye mpasi wantu. Kansi, Yesu wabalonga e  salu kina basalanga. Kumosi bakala yo Yesu muna ntangwa yasunda o mfunu muna zingu kiandi, vitila lufwa lwandi ye kuna nim’a lufuluku lwandi. Nze Yesu, ayingi muna ntumwa Kumi ye Zole esi Ngalili bakala. Akaka muna yau akento bakala yau.

Antumwa wantu alembi lunga bakala, vilwa bavanganga. Ezak’e ntangwa, bavovanga lembi teka yindula yo baka nzengo zambi. Ezak’e ntangwa, ke bakalanga ye luzindalalu ko. Batantananga nkutu kana nani muna yau osundidi o mfunu. Kansi, wantu ambote bakala, batoma zolanga Yave. Yau bakituka se nkubilwa ya nkutakani ya Akristu vava Yesu kavutuka kuna zulu.