Vitila badia e lambu dia Nduta muna mvu wa 33 wa tandu kieto, antumwa mu salu kia samuna e nsangu zambote batuka. Bayoya kikilu bakala. Muna kuma kiaki, Yesu wayenda yau muna nzaza kuna Betesaida kimana bavunda. Kansi, vava e nzaza yalwaka vana kumu, Yesu wamona vo ulolo wa wantu babalanda. Kana una vo Yesu wazola kala va yandi kaka ye alongoki andi, watambula wantu awaya. Wawuka e mbevo batwasa yo yantika kubalonga. Yesu lumbu kiamvimba kabalonga oma ma Kintinu kia Nzambi. Vava kuma kwafwa, ntumwa zandi bayiza kwa yandi yo kumvovesa vo: ‘O nkangu nzala bena zau. Ubasindika kimana benda sumba lekwa kia dia.’

Yesu wavova vo: ‘Ke bendi ko. Nubavana lekwa kia dia.’ Antumwa bamyuvula vo: ‘Nga ozolele vo twenda kubasumbila madia?’ Filipo, mosi muna antumwa, wavova vo: ‘Kana nkutu vo twakala ye nzimbu zayingi, ke twadi lenda sumba madia mefwana ulolo wa wantu awaya ko.’

Yesu wabayuvula vo: ‘Mbolo kwa tuna zau?’ Andere wavova vo: ‘Mbolo tanu ye mbizi zole za maza. E madia mama ke mefwana ko.’ Yesu wavova vo: ‘Nuntwasila e mbolo zozo ye mbizi.’ Wavova kwa nkangu vo bavuanda vana titi mu buka ya makumatanu-makumatanu ye nkama-nkama. Yesu wabaka e mbolo ye mbizi, watala kuna zulu yo samba. I bosi, wavana zo kwa ntumwa. Antumwa bakayanesa zo kwa wantu. Yau awonso 5.000 ma  akala ye akento yo wana badia yavana bayukuta. Kuna mfoko, alongoki bakutika madia masuva kimana malembi vetwa. Bazadisa yitunga 12. Ediadi sivi diampwena kikilu, ke wau ko?

Wantu basivika kikilu ye bazola nkutu kitula Yesu se ntinu au. Kansi, Yesu wazaya wo vo ke yayina ko i ntangwa ina Yave kasikidisa mu kala se ntinu. Muna kuma kiaki, wasindika o nkangu yo vovesa ntumwa zandi vo benda kuna sambu diankaka dia Mbu a Ngalili. Bakota muna nzaz’au. Yesu wayenda vana mongo yandi mosi kaka. Ekuma? E kuma kadi luzolo lwa samba kwa Se diandi kakala lwau. Kana nkutu nkia mpila salu kakalanga kiau, Yesu wavaulanga e ntangwa ya samba.