Abarayama walonga mwan’andi Isaki vo kazolanga Yave yo bunda e vuvu muna nsilu miawonso mia Yave. Kansi, vava Isaki kalungisa mvu 25, Yave wavovesa Abarayama vo kavanga diambu dimosi diampasi kikilu. Nkia diambu?

Nzambi wavovesa Abarayama vo: ‘Bonga mwan’aku mosi kaka yo kumfutumuna se lukau, vana mongo mosi ikusonga kuna nsi a Moria.’ Abarayama kazaya ko e kuma Yave kanlombela diambu diadi. Kana una vo i wau, walemvokela Yave.

Vava kuma kwakiá, Abarayama wanata Isaki ye selo yandi yole kuna Moria. Vava badiata lumbu tatu, bayantika mona e miongo kuna vala. Abarayama wavovesa selo yandi vo bavingila ekolo yandi yo Isaki bayenda kela kimenga. Abarayama wavana e nkuni kwa Isaki, yandi wanata e mbele. Isaki wayuvula se diandi vo: ‘Akweyi kina e bulu tukela kimenga?’ Abarayama wavutula vo: ‘E mwan’ame, o Yave okubika e bulu.’

Vava balwaka vana mongo, batunga e ziku. Abarayama wakanga moko ye malu ma Isaki yo kunsia vana ntandu a ziku.

I bosi, Abarayama wasimba e mbele. Vana vau, mbasi a Yave wambokela tuka kuna zulu oku vo: ‘Abarayama! Kusie nleke o koko ko, owau nzeye wo vo ongeye Nzambi ovuminanga, kadi otambulwidi vana mwan’aku se kimenga.’ I bosi, Abarayama wamona  meme diavakama muna kanka muna mpaka zandi. Vana vau, wakutulula Isaki yo futumuna meme diadina se lakau vana fulu kia Isaki.

Tuka muna lumbu kiakina, Yave wayantika yikila Abarayama vo nkundi andi. Nga ozeye ekuma? E kuma kadi Abarayama wavanganga mawonso Yave kanlombanga, kana nkutu vava kabakulanga ko e kuma Yave kanlombele diambu diadi.

Yave wavutukila o nsilu kasia kwa Abarayama oku vo: “Sambula ikusambula, sayanisa nsayanisa mbongo aku.” Ediadi disongele vo Yave wadi sambula wantu awonso ambote muna nzil’a kanda dia Abarayama.