Ke vavioka kolo ko, vava Faro kawá vo Aneyisaele bavaikidi muna Engipito, wasoba e ngindu. Wakanikina makesa mandi vo: ‘Nukubika makalu mame mawonso kimana twenda kubalanda. Ke twadi kubayambula ko vo benda.’ Oyandi yo makesa mandi bayantika landa Aneyisaele.

Yave wafilanga nkangu andi, muna fuku wasadilanga e tuti, muna mwini wasadilanga tiya. Wabafila vana ndambu a Mbu Ambwaki yo kubavovesa vo baningama vana.

I bosi, Aneyisaele bamona Faro ye makesa mandi bekubalandanga. Mu vonza kikilu bakala, oku sambu edi Mbu Ambwaki oku sambu dina makesa ma Engipito. Bakaza kwa Mose oku vo: Fwa tufwa! Wadi kutuyambula kuna Engipito.’ Kansi, Mose wabavovesa vo: ‘Ke numoni wonga ko. Nuvingila nwamona una Yave kekunuvuluzila.’ Mose wabundanga kikilu e vuvu muna Yave, nga ke wau ko?

Yave wazayisa Aneyisaele vo bakubama. Muna fuku wauna, Yave wayalula e tuti yo sia dio vana kati kwa Angipito ye Aneyisaele. Kuna sambu dia Angipito, mu tombe bakala. Kansi, kuna sambu dia Aneyisaele, mu ntemo bakala.

 Yave wavovesa Mose vo kalambula o koko muna mbu. I bosi, Yave watwasa tembwa kiangolo mu fuku wawonso. O mbu wavambana vana kati yo ziula e nzila. Ulolo wa Aneyisaele basauka o mbu vana ntoto ayuma vana kati kwa yaka ya maza.

Makesa ma Faro balanda Aneyisaele muna mbu ayuma. I bosi, Yave wakakidila makesa ma Faro. O malulu ma makalu mau mayantika koloka. E makesa bakaza vo: ‘Tutina, kadi Yave mu kubanwanina kena.’

Yave wovovesa Mose vo: ‘Lambula koko kwaku muna mbu.’ Vana vau, e yaka ya maza yabwila makesa ma Engipito. Faro ye makesa mandi mawonso bafwa. Ke vavuluka kana mosi ko.

Kuna sambu diankaka dia mbu, e ndong’ayingi ya wantu bakembelelanga Nzambi muna nkunga oku vo: ‘Nuyimbidila Yave, kadi sunda kasundidi; otubidi mvalu ye akwa mvalu muna mbu.’ Ekolo nkangu wayimbilanga, akento bakinanga yo sika e nsansi. Wantu awonso mu kiese bakala kadi owau bavevokele kikilu.