TALA diambu dibwanga ovava. O Mose olambwidi nkau andi muna Mbu Ambwaki. Ana bavulukidi kuna sambu diandi i Aneyisaele. Kansi, Faro yo makesa mandi badimukini muna mbu. Yambula twatala una diavangamena ediadi.

Twalongokele vo vav’o Nzambi katwika vuku kia 10 muna Angipito, o Faro wayambula Aneyisaele bavaika muna Engipito. Tezo kia 600.000 m’akala ma Aneyisaele bavaika muna Engipito, ye ulolo wa akento yo wana. Vakedi mpe ye ndong’ayingi ya wantu akaka bakwikila muna Yave bavaika kumosi yo Aneyisaele. Banete mameme, nkombo ye ngombe zau.

Una ke bavaikidi ko, Aneyisaele balomba mvwatu, wolo ye palata kwa Angipito. Angipito bamwene kikilu o wonga mu kuma kia vuku kia nsuka kiababwila. Ikuma, bavana kwa Aneyisaele konso eki babalomba.

I bosi, Aneyisaele balueke kuna Mbu Ambwaki. Bavundidi. Muna kolo kiaki, o Faro ye ntaudi zandi bayibanza wau bayambula Aneyisaele. Bavovele vo ‘tuyambwidi abundu eto.’

Ozevo, o Faro osobele diaka e ngindu. Vana vau, okubikidi ekalu diandi dia vita, ye makesa mandi. Olende Aneyisaele ye 600 za makalu ma vita ye makalu makaka ma Engipito.

Vava Aneyisaele bamona Faro yo makesa mandi se mekwizanga, bamwene kikilu o wonga. Ke bakala y’owu wa tinina ko. Mbu Ambwaki kuna ntwala, oku nima Angipito mu kwiza bena. Kansi, o Yave osidi etuti vana kati kwa nkangu andi ye Angipito. Ozevo, Angipito ke balenda mona Aneyisaele ko mu kubavang’e mbi.

O Yave ovovese Mose vo, wanda nkau aku muna Mbu Ambwaki. Vava kavanga wo, o Yave otwese tembwa kiangolo kia este. O maza ma mbu mabulanini, yo ningama kuna sambu edi ye diakaka.

Aneyisaele bayantikidi sauka o mbu vana ntoto ayuma. Bazingil’o sauka kadi mazunda ma wantu bakala ye bulu yau yawonso. Vava bamana sauka, Angipito balendele mona diaka Aneyisaele. Abundu au mu tina bena. Ikuma vo, bakotele muna mbu mu kubalanda.

O Nzambi okôlele malulu ma makalu mau. Angipito bamwene wonga, bakazidi oku vo: ‘Tutina, kadi o Yave mu nwanina kena Aneyisaele.’ Kansi, e ntangwa yisakidi.

O Yave ovovese Mose kawanda nkau andi muna Mbu Ambwaki nze una omwene muna fwaniswa kiaki. Vava kavanga wo, o maza mavutukidi. Mafukidi Angipito yo makalu mau ye makesa mawonso malanda Aneyisaele muna mbu. Ke vavuluka kana mosi ko muna Angipito.

Nkia mpila kiese bamona nkangu a Yave muna vuluka! Akala bayimbidila Yave nkunga wa matondo oku vo: ‘O Yave osundidi e vita. Otubidi mvalu y’akwa mvalu muna mbu.’ O Mireyame wa nsang’a Mose obongele nsansi vana koko; akento awonso bavaikidi banlende ye nsansi zau. Bakinini ye kiese yo yimbila nkunga una wayimbilanga akala: ‘O Yave osundidi e vita. Otubidi mvalu y’akwa mvalu muna mbu.’