O MOSE wele avungula mameme. Olweke kuna mongo a Korebe. Omwene nti ukweme yo tiya, vo i nti ke ubomokanga ko.

O Mose vo: ‘Diasivi e diambu diadi. Yambula yafinama, yamon’e mbona yayi yanene.’ Vava kafinama e ndinga itukidi muna kati kwa nti yivovele vo: ‘Kufinam’oko ko: vula nsampatu omo malu, kadi e fulu kiaki otelamene, ntoto avauka.’ Nzambi wavovanga muna mbasi. O Mose wiyifukidi o lose.

Nzambi umvovese vo: ‘Mbwene mpasi za nkangu ame wina muna Engipito. Ikubakôla. Wiza wau, yatuma kwa Faro, wavaikisa nkangu ame, muna Engipito.’ Yave ofila nkangu andi muna nsi ambote ya Kenani.

O Mose ovutwidi Nzambi vo: ‘Omono i nani? Aweyi mvangila e diambu diadi?’ Vava nluaka kwa wan’a Isaele, oyau ovo bekumpovesa vo, “Nani utumini” ‘Aweyi ikubavovesa?’

Nzambi umvutwidi vo: “I wau wuwu voves’o wan’a Isaele vo, o YAVE wa Nzambi a mase meno, o Nzambi a Abarayama, wa Nzambi a Isaki, wa Nzambi a Yakobo untumini kwa yeno.” O Yave umvovese mpe vo: “Eyayi i nkumbu ame yamu mvu ya mvu.”

O Mose ovutwidi vo: ‘Ovo ke bekunkwikila ko vava mvova vo ngeye umfididi,’ aweyi mvanga?

O Nzambi unyuvwidi vo: “Nki kiokio vovo koko kwaku?”

O Mose ovutwidi vo: “Nkau.”

O Nzambi vo: “Tuba wo ova ntoto.” Otubidi wo vana ntoto, ukitukidi se nioka. O Yave osongele Mose esivi diakaka. Umvovese vo: ‘Kotesa koko kwaku ku nsi a kinkutu.’ Vava kakatwidi ko, o koko kupembele nga mvul’ampembe. Kukitukidi nze kimbevo kia wazi. I bosi, o Yave wavana Mose e wisa kia vanga esivi dietatu. Umvovese vo: ‘Vava ovanga masivi mama Aneyisaele bekwikila vo mono itumini.’

O Mose ovutukidi kuna nzo, ovovese Yitero vo: ‘Unsindika, do, yavutuka kwa yitu yame ina muna Engipito, yamona una bena.’ O Yitero, osindikidi Mose, ovutukidi kuna Engipito.